JOB 5
5
1“Au tuah hna, an lettu ding an um
hnga maw?
Mithiang aho cu dah na fuh bik
hna lai?
2Asi taktak ko, thinhunnak nih
mihrut kha a thah hna i
Nahchuahnak nih lungthin tlawmmi
kha a nawn hna.
3Mihrut nih ngeihchiah hram an thlak
kha ka hmuh,
Sihmanhsehlaw an umnak cu
chiat ka serh colh.
4An fale hna cu an him deng naisai lo i
Hauka ah khan lamh chih an si,
Annih chanhtu ding kha ahohmanh an um lo.
5An rawl ṭuanmi cu rawlṭammi nih
an ei i
Hling lak hmanh kha an lak;
Cun tihalmi nih an chawva kha
an chuh hna.
6Zeicahtiah temhinnak cu leidip
chungin a ra lo i
Harnak cu vawlei in a kheu lo;
7Sihmanhsehlaw meici cu cunglei ah
a choi phung a si bantukin,
Minung cu harnak hmu dingin
hrin a si.
8“Kei cu, nang ka si ahcun, Pathian
kha ka fuh ko hnga i
Amah sinah khan ka konglam cu
ka chiah ko hnga;
9Amah nih thil lianngan hna le ruah
phak lomi thil hna le khuaruahharmi
thil kha rel cawk loin a tuah hna:
10Vawlei cungah ruah a surter i
Lo chungah ti kha a luanter hna;
11Minauta cu cungsang ah a chiah hna i
Ngaihchiami cu himnak ah
a cawi hna.
12Mizer hna khuakhannak cu
pakpalawng ah a canter,
Cucaah an kut nih an i tinhmi cu
an tlinter kho hna lo,
13Mifim hna cu anmah zernak lila ah
khan a foih hna i
Mihrokhrawl hna timhtuahnak cu
khulrang in a dong. #1Kor 3.19
14Chun ah muihnak he an i tong i
Chunlai ah zan bantukin
an i dap lengmang.
15Sihmanhsehlaw ngakṭah hna cu
an kaa chung khan a khamh hna i
Mipam hna cu a ṭhawngmi hna
kut chung khan a khamh hna;
16Cucaah sifakmi nih ruahchannak
an ngei i
Biadinglo nih khan a kaa a cip.
17“Zohhmanh, Pathian nih a
chimhhrinmi cu lunglawmmi a si;
Cucaah Lianngan Bik chimhhrinnak
cu zeirello in um hlah. #Phut 3.11; Heb 12.5-6
18Zeicahtiah amah nih hriamhma
an inter,
Asinain amah lila nih an men ṭhan;
Amah nih cun an tuk, sihmanhsehlaw
a kut nih an damter ṭhan. #Hos 6.1
19Amah nih harnak paruk chungin
an chuah lai,
Pasarih chung zongah ṭhat lonak
zeihmanh nih an tawng lai lo.
20Mangṭam a tlun tikah amah nih
thihnak chungin an khamh lai,
Ral chungah vainam ṭhawnnak
chungin an tlanh lai.
21Congoihnak a um tikah a phaw
an chonkanh lai i
Rawhralnak kha a rat tikah na ṭih awk
a herh lai lo.
22Rawhralnak le mangṭam an tlun tikah
na ni lai i
Vawleicung sahrang kha na ṭih hna lai lo.
23Lo chung lung hna nih cun hna
an in hnawh lai lo i
lo chung sahrang hna he cun
rem tein nan um lai.
24Na thlam cu a him kha na hngalh lai i
Na kawm kha na zoh lai i
zeihmanh a bau lai lo.
25Na tefa hna cu tampi an si lai kha le
Na hrinsor hna cu vawlei i ram
bantuk an si lai kha na hngalh
fawn lai.
26Rawl phal tommi cu amah caan te ah
phuhri a phanh bantukin.
Chan tling cikcek tein thlan khor
na phan lai.
27Zohhmanh, mah hihi kan dothlat
cikcek i ahmaanmi a si,
Biatak a si caah na ca i a ṭha dingah
i lak tuah,” tiah a ti.
Currently Selected:
JOB 5: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
