JOB 23
23
Job Nih A Bia Kha Pathian Hmai Chuahpi A Duh
1Cun Job nih a leh i:
2“Nihin zong ka phunzainak
cu a fak ko,
Aihram loin ka um kho lo.
3Amah cu khuazei ah dah a um ti kha
hngal kho in,
A umnak ah khan zeitindah
fuh khawh a si hnga ti kha
hngal ning law cu
4A hmaiah khan ka bia cu
ka va chim hnga i
Ka bia cu tlamtling tein
ka va chim ko hnga.
5A ka lehnak ding bia kha ka theih hnga i
Ka sinah a chim ding bia kha
ka hngalh hnga.
6Keimah cu nam chih awkah
a ṭhawnnakpi cu a hmang
hnga maw?
A hmang lai lo, ka bia cu
a ka ngaihpiak deuh ko lai.
7A hmaiah cun miding mi cu thiam
an co tawn i
Ka bia a ka ceihtu bawi sin cun
luatnak taktak ka hmuh ve ko lai.
8Hmailei i ka kal ah, khika ah a um lo,
Hnulei i ka kal ah ka hmu kho
fawn lo;
9Kehlei i ka kawl ah ka hmu kho lo,
Orhlei i kaa mer ah ka hmu kho
fawn lo.
10Sihmanhsehlaw ka ṭuan ah siseh,
kaa dinh ah siseh, a ka hngalh ko,
A ka hneksak dih tikah, sui ka si kha
a lang.
11A lam kha ka ke nih fek tein an zulh,
a lam kha ka zulh i ka pial lo.
12A hmur in a chuakmi nawlbia kha
zeirello in ka um hna lo i
Ka lung chungah a kaa chuak bia kha
ka khon hna.
13Amah cu thlen khawh lo a si i
aho nih dah an mer khawh lai?
A duhmi cu a tuah ko.
14Ka ca i aa tinhmi cu a tlinter lai,
Cu bantuk tinhmi tampi cu
a lung chungah a um.
15Cucaah amah ton cu ka ṭih i
amah kong ka ruah tikah ka thin
a phang.
16Pathian nih ka lung kha a ka derter,
Lianngan Bik nih ka thin
a ka phanter.
17Muihnak kha ka mit a ka cawttertu
a si nain,
ka thin a ka phantertu cu
muihnak kha si loin Pathian kha
a si.
Currently Selected:
JOB 23: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
