JOB 15
15
Elifaz Nih Job Kha A Sik
1Cun Teman mi Elifaz nih a leh i:
2“Thli lawng a khatmi fimnak
in maw mifim nih
a leh awk a si hnga?
Nichuahlei thli in maw aa khahter
ko lai?
3A ṭhahnem lomi bia le santlai lomi
bia alnak kha maw a lehhlum
lengmang ko lai?
4Mi cu Pathian ṭih kha na thlauh i
a sin i thlacam kha na dawnh.
5Na ṭhat lonak nih na chimmi bia hi
an chimter i
Hlennak hi naa thimmi holh a si.
6Keimah nih si loin, nangmah kaa
hrimhrim nih nangmah cu
sual an phawt,
Nangmah hmur hrimhrim nih
an mawhchiat.
7“Nangmah hi minung vialte lakah
hrin hmasa bikmi na si maw?
Asiloah, tlang hna an sem hlanah hin
dah na chuah?
8Pathian pumhnak chung biathli cu
na thei bal maw?
Nangmah lawng hi maw minung
fimnak a ngeimi cu na si?
9Kan hngalh lomi zeidah na hngalh?
Kan fian lomi zeidah na fian hlei?
10Ṭuakparmi hna le tar hna cu
kan sinah an um,
Na pa nakin a upa deuhmi an si.
11Pathian nih an hnemhnak bia,
na sinah nem tein chimmi cu
naa za lo maw?
12Zei nih dah cu tluk lawmmam in
na ral an ṭhatter i
Na mit au na kan renghhnawh len ko?
13Zei nih dah na thinhunnak kha
Pathian cungah an chuahnawhter i
Cu bantuk bia hna cu na kaa in
na chuahter len hna?
14Minung cu zeidah a si i
a thian khawh lai cu?
Nu hrinmi fa cu zeidah a si i
a din khawh lai cu? #Job 25.4-6
15Pathian nih a mithiang hna hmanh
kha a zum hna lo i
Van hna hmanh kha a hmaiah suallo
an si lo ahcun,
16Zeitindah fihnung a si i a thu a man i
ṭhat lonak cu ti bangin a dingmi
minung chinchin cu, a si khawh lai?
17“Kan hmuhsak lai, ka ngai hmanh,
ka hmuhmi thil cu kan chimh lai;
18(Mifim mi nih an rak chimmi, an upa
hna nih thup lo tein an rak chimhmi
hna biatak cu kan chimh lai.
19An ram chungah cun ramdangmi
an rak um lo i
Pathian sinin a tlautertu hna zong
an rak um lo).
20Mi a rial lengmangmi miṭhalo cu
a nun chung paohpaoh ah harnak
a tong zungzal ko lai.
21Ṭihnak thawng kha a hna chungah
an au lai i
Him tein ka um tiah aa ruah lioah,
mifir nih an chuahhnawh lai.
22Muihnak chungin luatnak ding
ruahchannak a um lo,
Amah cu vainam nih khan hmun
khatkhat in a orh peng ko.
23Langta hna rawl caah hlonh a si i,
Cu bantuk mi nih cun, ka rawhnak
ding kha a fiang, tiah a hngalh.
24Chikkhatte ah muihnak ni nih cun
a tlun hnawh i
Harnak le lungretheihnak nih
a ṭhawngmi siangpahrang bantukin
amah cu tuk awkah an bawh ko.
25Amah nih cun Pathian kha a kuttum
a chuahhnawh i
Lianngan Bik cu zeirello in a um;
26A lu aa khun riangmang i a phaw
laipawng chahpi he cun
a zuanhnawh.
27Amah cu khuapi kha a latu hna le
A ngeitu nih an tliktak cangmi inn
a tlaitu kha a si,
28Sihmanhsehlaw cu khua hna le
inn hna cu ral nih
a hrawh ṭhiamṭhiam hna lai.
29Sau a rum lai lo i a chawva nih
sau an nguh lai lo,
Vawlei chung zongah hram a thla
lai lo;
30Muihnak in a luat lai lo i meizik nih
a nge kha a hrem dih hna lai i
Thli nih a par kha a choih dih hna lai.
31A rian a nganmi kha i bochan in
amah le amah i hleng hlah seh,
Zeicahtiah a rianṭuanmi cu
pakpalawng ah a cang lai.
32A ungkung hna cu a caan lopi ah
an uai lai i a nge hna cu
an hring lai lo.
33An hmin hlanah a thei a ṭhilmi
mitsur ruang bantuk a si lai i
A par a thlongmi oliv kung bantuk
a si lai.
34Zeicahtiah Pathian zei ah a rel lomi
hna cu an dihlak in an car i
Ziknawhmi thil in an sakmi an inn cu
mei nih a kangh hna lai;
35Mi ṭhat lonak ding kha fapawi in
an i pawi i ṭhat lonak kha an hrin,
An paw chungin a chuakmi fa cu
hlennak kha a si,” tiah a ti.
Currently Selected:
JOB 15: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
