JEREMIAH 6
6
Jerusalem le Judah Rawhnak A Nai
1Maw Benjamin mi hna, Jerusalem in
chuak u law himnak hmun ah
zam tuah u,
Tekoa ah muko tum u law
Beth-hakkerem ah alan thlai tuah u;
Zeicahtiah chaklei in ṭhat lonak kha
a hung lang cuahmah, rawhralnak
nganpi cu.
2Zion fanu, a mui a ṭha i no cipcep tein
a ummi cu a donghnak a nai ai.
3Amah sinah cun tuukhal hna kha
an tuurun cio he an rak chuak
tawn i
A velchum ah cun an thlam kha
an bunh hna,
An hmun cio ah khan an saṭil run
kha an tlong tawn.
4Amah doh awkah khan i tim u,
Tho u law, chun ah tu u sih.
A tlai tuk cang, ni aa mer cang i
zanlei thladem hna cu an sau cang.
5Cucaah i tim u law zan ah tu u sih,
A inn ṭhaṭha hna cu hrawk dih
hna u sih.
6Mahtihin Ralkapbu Bawipa nih a ti,
“Jerusalem khua thingkung kha
hau hna u law
Ral tuknak chuntlung kha a pawngah
serhnawh u.
A chungah hin zeidang um loin
hremnak lawnglawng a um caah
Hi khua hi dan ka tat lai.”
7Tikhor nih ti thar a chuah
lengmang bangin
Hi khua nih hin a ṭhat lonak kha
a tharter lengmang ve;
A chungah hin zaang-ennak le
i velhnak thawng kha
a leng zungzal i
Ka hmuhmi cu zawtnak le hma lawng
kha an si ko.
8Maw Jerusalem, i ralring tuah,
Cu ti a si lo ahcun kan chuahtak
lai i
Ahohmanh um lonak ram, ṭiaotakmi
ah kan ser sual lai.”
9Hi bangin Ralkapbu Bawipa nih a ti,
“Mitsur ruang bantukin Israel mi
a tangmi hna cu an mua sua
cikcek hna,
Mitsur thei a lotu bantukin
a nge hna kha na kut in
vun pur rih tuah hna.”
10Cun kei nih ka leh i, “Aho nih dah
ka chawnh hna le ralrinnak ka pek
hna tikah ka bia an ngaih duh lai?
Annih nih an hna an i phih cang i
an ngai bal lai lo.
Na bia cu ngaih an duh lo i na chimmi
cu nihchuak ah an rel.
11 Bawipa, na thinhunnak cu
ka chungah a khat,
A in in ka ing kho ti lo,” ka ti.
Cu tikah Bawipa nih a ka thawh i,
“Ka thinhunnak cu khua lak i
aa chawkmi ngakchia hna
cungah le
Aa pummi tlangval hna cungah khan
bung ko kun.
Pasal si hna seh, nupi si hna seh,
cu chungah cun an i tel ve lai i
A tar ngaingaimi ṭuakparmi hna zong
kha an i tel ve ko lai.
12An inn hna cu midang pek an si lai,
An lo hna le an nupile hna zong;
Zeicahtiah hi ram chung i a ummi hna
hi dan ka tat hna lai,” tiah a ti. #Jer 8.10-12
13Annih cu a hme bik in a ngan
bik tiang, hrokhrawl in hmuhmi
miaknak kha a duhmi an si;
Profet le tlangbawi hna hmanh kha
lih in rian a ṭuanmi an si.
14Ka mi hna cu, an hma kha
an menpiak ko hna,
Sihmanhsehlaw a leng parpavuan
lawng in a si;
‘A dam ko lai,’ an ti, zeidah a dam
ko lai?
Zeihmanh a dam lai lo! #Eze 13.10
15Annih nih hi fihnung a simi thil
hna kha an tuah tikah
an ning a zak maw?
Zak hlah ee, an ning a zak
hrimhrim lo;
hmaisen zong kha an hngal lo.
Cucaah a tlumi hna sinah
an tlu ve lai;
dan ka tat hna tikah an dih lai,
tiah Bawipa nih a ti.
16Hi bangin Bawipa nih a ti,
“Lam tonnak ah khan dir tuah
u law hlanlio lam kha kawl hna u,
‘Ṭhatnak ah a phanmi lam cu
khuazei ah dah a si?
tiah hal hna u.
Cu lam cu zul u law nan caah
dinhnak nan hmuh lai,’ ti hna u.
Sihmanhsehlaw annih nih
an i thawh i,
‘Cu lam cu kan zul lai lo,’ an ti. #Mat 11.29
17Cun ka thawh hna i, ‘Nan caah
ralvengtu ka chiah hna lai,
Muko aw thawng kha ngai u,’
ka ti hna.
Sihmanhsehlaw annih nih
an i thawh i,
‘Zei ah kan rel lai lo,’ an ti.
18Cucaah cun, maw miphun hna,
ngai u law,
Nannih a hmutu vialte hna, an cung i
a tlung laimi thil hi hngal tuah u.
19Maw vawlei, ngai tuah,
Hi mi hna cungah hin, anmah
khuakhanmi theitlai, rawhralnak
cu ka tlunter lai;
Zeicahtiah ka bia kha zei ah an rel
lo i ka cawnpiaknak kha an hlawt.
20Sheba in a rami frankinsen zihmui le
ram hla piin a rami fu thlum hna cu
ka caah zeidah an ṭhathnem?
Nan khangh thawinak cu ka cohlang
hna lai lo,
Nan raithawinak zong ka lawmhmi
an si lo.
21Cucaah hi mi hna hi an hmaiah
i chuih awk lungtum
ka chiahpiak hna lai i
an i chuih lai i an tlu lai;
Pale hna le fale hna le innpa le
hawikom hna kha
hmun khat ah an thi lai,” tiah
Bawipa nih a ti.
22Hitihin Bawipa nih a ti,
“Zohhmanh, chaklei ram in miphun
pakhat a ra lio,
Van hramdeng in miphun ngan
pakhat a cawlcang lio;
23Li le fei kha an i put,
Mipuar an si i zaangfahnak
an ngei lo.
An rang kha an i cit hna i an thawng
cu rili thawng bantuk a si;
Raltuknak caah pa nih aa thuamh
bangin an i thuam,
Nangmah he doh awkah,
Maw Zion fanu!”
24Cu thawng an chimmi cu kan theih i
Kan kut hna cu thazang ngei loin
an uai dih;
Nu nih nau nganfah an inmi bantuk
nganfahnak nih a kan tlaih.
25Lo ah kal hlah u, lam zongah
i chawk hlah u,
Zeicahtiah ral cu vainam i put in
a kenkip ah aa chawk ko.
26Maw ka mi hna fanu, buri i aih law
vutcam i phulh tuah;
Fapa ngeih chunte a thih i an ṭah
bantukin fak piin ṭap tuah,
Zeicahtiah a kan hrawktu ding nih
a kan tuk dengmang cang.
27Jeremiah, nangmah cu ka mi hna
fiantertu le hneksaktu ah kan ser,
Va hneksak hna law an umtuning kha
va hliah tuah.
28An dihlak in midohhmang,
milungkhong,
Mi congoih i a vak lengmangmi an si.
29Sohor nih a chem i somei cu a vaam,
Thiantertu nih khan thir dar cu
a titter hna,
Sihmanhsehlaw zeihmanh
a ṭhahnem lo, zeicahtiah suan le
dar le thir kha an i ṭhen hlei lo.
30Annih cu ngun ek tiah ti an si,
Zeicahtiah Bawipa nih a hlawt hna.
Currently Selected:
JEREMIAH 6: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
