JEREMIAH 4
4
1“Maw Israel, ka sinah ra kir ko,
ka sinah ra kir ko, tiah
Bawipa nih a ti.
Ka hmaika in fih a nungmi
na siasal kha na ṭhial hna i
pial ti loin na um i,
2‘Bawipa a nun bangin,’ tiin biatak le
biading le dinnak in
chiat na ser ahcun,
Miphun hna nih nangmah bantukin
thluachuakmi si ve awkah
thla an cam lai i
Nangmah ah cun sunparnak
an hmuh lai.”
3 Bawipa nih hi bangin Judah ram mi
hna le Jerusalem khua chung mi
hna sinah a ti:
Nan dinhtermi vawlei cu let u law
hling lakah thlaici tuh hlah u. #Hos 10.12
4 Bawipa rian ṭuan awk caah nan cuarpar i
tan u, nan lung cuarpar i tan u,
Maw Judah ram mi hna le
Jerusalem khuami hna;
Cu ti a si lo ahcun, ṭhat lonak
nan tuahmi ruangah khan
ka thinhunnak kha
mei bangin a alh lai i
Hmih khawh lo in a kang sual lai.”
Judah Cu Ral Nih An Chim Lai
5Ram chung dihlak ah muko
kha tum u!
Fakpi le fiang tein au u!
Judah ram mi Jerusalem khuami kha,
Kulhmi khua ah tli u, tiah chim hna u.
6Zion lei lam cu hmuhsak hna u!
Himnak hmun leiah khan le u!
Rau hlah u!
Bawipa nih chaklei in ṭhat lonak le
rawknak nganpi a rak put lio.
7Rambur chungin chiandeih a hung
chuak cang
Miphun hna hrawktu aa thawh cang;
Nan ram kha hrawh awkah
a umnak hmun in a chuak cang;
Nan khuapi hna cu an chungah mi
um loin an rawk cikcek lai.
8Hi ruangah hin buri i aih u law ṭap
u law fak piin ai tuah u,
Zeicahtiah Bawipa thinhunnak ṭih a
nungmi cu kan sinin aa mer lo.”
9Khi ni ah cun siangpahrang le bawi hna cu an thin a phang lai i tlangbawi hna cu an khuaruah a har lai i profet hna cu an lung a dong lai, tiah Bawipa nih a ti. 10Cun kei nih ka thawh i, A, Bawipa Pathian, hi mi hna le Jerusalem khua cu, ‘Daihnak nan hmu lai,’ tiin na rak timi hna kha na hlen diam hna a si ko, zeicahtiah vainam tu nih pei an nunnak cu a chunh kun hna hi, ka ti.
11Khi tikah hi mi hna le Jerusalem
khuami hna cu hitin chimh an si lai:
Thetse ram tlangpar kawng in ka mi
hna leiah thli lin a hrang,
Cu thli cu vamhnak caah a si lo,
thianternak ca zongah a si lo;
12Vamhnak ca le thianhnak caah a
ṭhawng tukmi thli cu ka fial lai i
a hrang lai i
Atu cu an cung i ka chim duhmi bia
kha ka chim lai.
13Zohhmanh, khuadawm bantukin
ral cu hmaiah an fong,
An rangleng hna cu phuchim bantuk
an si;
An rangtum hna cu muvanlai nakin
an khul a rang deuh —
Aize! Kannih cu kan lo cang ai!
14Maw Jerusalem, palhnak na tuahmi
kha na lung chungin i thianh law,
Khamh na si ko rih hnga dah kaw!
Zei can dah na ruahnak ṭhalo cu na
chungah a cam lai?
15Dan ram in zualko pakhat a ra i
Efraim Tlang in thawng ṭhalo
pakhat a thang.
16Mah thil vialte hi miphun kha
thanh hna u,
Jerusalem rawknak kha thanh u:
Ram hlat piin ral namtu kha an ra i
Judah ram khua kha an auhnawh hna.
17Keimah kha a ka doh caah,
Ral nih a velchum in an kulh dih,
tiah Bawipa nih a ti.
18Na umtuning le na thil tuahmi nih
mah hihi na cungah an tlunter,
Mah hihi na dantatnak a si i
Mah thil vialte hi na ka doh ruangah
an chuak.
19Maw ka thin aw, maw ka thin aw!
Ka ngan a fah tuk caah a ngerh in
kaa ngerh.
Ka lung cu a tor dutmat i dai tein
ka um kho lo,
Zeicahtiah raltuk launak thawng,
muko thawng kha ka theih.
20Chiatnak nih chiatnak kha
a hun zulh colh,
Ram cu a ningpi in a rawk.
Ka thlam hna cu an tlu i an khuhnak
puan hna cu an tlek dih cikcek.
21Zei can dah alan cu thlai a si kha
ka hmuh peng ko lai i
Muko aw thawng cu ka theih lai?
22Ka mi hna cu mihrut an si, keimah
kong kha zeihmanh an hngal lo;
Annih cu fa lungping,
hngalhthiamnak ngei lomi an si.
Ṭhat lonak tuah bel an thiam ngai,
sihmanhsehlaw ṭhatnak cu
zeitindah ka tuah lai ti kha
an hngal lo.
23Khi tikah vawlei kha ka zoh i,
zohhmanh, a rawk dih i
a lawngpi a si ko;
Vancung khi ka hei zoh hna i
an ceunak kha a um ti lo.
24Tlang khi ka hei zoh hna i
an sawn len ko,
Mual vialte cu an i hnin dih.
25Khua ka zoh i mi an um lo, van i
a zuangmi va kha an zam dih.
26Theitlai ṭhatnak lo ṭha kha thetse
ram a si cang i
Khuapi vialte kha an rawk dih cang,
A thin a hungmi Bawipa
hmaika ah cun.
27 Bawipa nih hi bangin a ti, “Ram cu
a ning piin a ṭiao dih lai,
Sihmanhsehlaw a donghnak taktak cu
ka phakter lai lo.
28Cucaah vawlei cu a ngaih a chia lai i
cunglei van hna cu an nak dih lai;
Keimah nih ka chim cang i
ka timh cangmi a si caah
Kaa ngaihchih lai lo i ka lung zong
kaa let lai lo.”
29Rang cung ralkap hna le thalkah
thiam hna an thawng ah khua kip
cu an zam dih;
Lungkua chungah an lut, rambur
lakah an i thup, lungpang ah an kai;
Khua paohpaoh cu ṭiaotak an si dih,
an chungah ahohmanh an um ti lo.
30Maw nang, ṭiaotakmi, puan sen in naa
thuamh i sui hlawn in naa ṭamh i
Na mit hna cu thuhmi si in na kauhter
hna hi, a sullam zeidah a si?
Pakpalawng ah pei naa ṭamh ko cu.
Na tlangval hna nih an in nihsawh i
na nunnak kha lakpiak an in timh.
31Nau nganfah a ing liomi nu
aihramnak bantuk a simi
aihramnak,
A fater a hring liomi nu
nganfahnak bantuk a simi
aikionak kha ka theih.
Zion fanu, a thaw a suk in aa su i
a kuttum heh tiah a rengmi kha a si.
Aize! ka ba tuk ko cang,
thah len ko cu
ka ba tuk ko cang.
Currently Selected:
JEREMIAH 4: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
