BIACEIHTU 5
5
Deborah le Barak Hla
1Cun khi ni ah Deborah le Abinoam fapa Barak nih hla an sa i,
2“Hruitu hna nih Israel mi cu
an hrui hna i
Mizapi hna nih lungtho tein an i pek caah,
Bawipa cu thangṭhat ko u.
3“Ngai tuah u, maw siangpahrang hna,
nan hna chi tuah u, maw bawi hna;
Bawipa cu hla in ka hloi lai,
Bawipa, Israel Pathian cu aw dawh in ka thangṭhat lai.
4“Bawipa nangmah nih Seir in na kal tikah,
Edom ram in na kal tikah,
Vawlei cu aa hnin i van cu an zut,
Asi, khuadawm nih ruah an surter hna.
5 Bawipa hmaiah tlang hna cu an i hnin,
Bawipa, Israel Pathian, hmaiah cun
khi Sinai tlang cu aa hnin. #Exo 19.18
6“Anath fapa Shamgar chan ah,
Jael chan ah, a bu in khual a tlawngmi hna cu an king i
Khualtlawngmi hna nih lamhleng in an kal.
7Israel chungah khuate mi hna cu
an king cang,
Nangmah, Deborah nih, Israel chungah nu bangin
na thawh hlantiang cu an king ko.
8Annih nih pathian thar kha an i thim hna tikah,
Kutka ah raltuknak kha a um.
Israel mi sang li chungah khan
Phaw siseh, fei siseh, hmuh awk a rak ram maw?
9Israel mi a haotu hna, mi lak i
lungtho tein aa pemi hna leiah hin
ka lung cu a um.
Bawipa cu thangṭhat tuah u.
10“Nannih laa raang hna cung i
aa citmi hna,
Nannih man fak puanphah cung i
a ṭhumi hna,
Nannih lam i a kalmi hna,
A kong cu chim tuah u.
11Ti toihnak hmun ah hlasatu pawl
aw zulh in,
Khika ah annih nih Bawipa teinak cu an nolh ṭhan,
Israel chung i a khuate mi hna i an teinak cu, an nolh ṭhan.
“Cun Bawipa mi hna cu kutka hna leiah cun an vung kal.
12“I hlau tuah, i hlau tuah, Deborah!
I hlau tuah, i hlau tuah, hla sa tuah!
Tho tuah, Barak, na raltang cu
hruai hna,
Maw Abinoam fapa.
13Khi tikah tuavon a tangmi hna cu
an vung kal;
Bawipa mi nih a ṭhawngmi kha doh awkah an kalpiak.
14Efraim in an i thawh, khika in nelrawn ah an kal,
Benjamin, nangmah le na mi hna cu an in zulh hna;
Makhir in haotu hna,
Cun Zebulun in ralbawi fung aa putmi hna cu, an vung kal;
15Issakhar bawile cu Deborah he an ra i
Issakhar cu Barak sinah zumhawktlak in a um;
Nelrawn chungah cun amah he naih tein an vung choi.
Reuben phun hna lakah cun,
Lungthin i hriahdah lennak kha a um.
16Zeicahdah tuurun hna ca i thonglawi
tummi hei ngaih awk ko ah cun,
Tuurun hna lakah cun na um peng ko?
Reuben phun hna lakah cun,
Lungthin i hriahdah lennak kha a um.
17Gilead cu Jordan ralchan ah a um ko;
Cun Dan zong cu zeicaahdah
sangphawlawng hna sinah cun a um ko hnga?
Asher cu rili kamah cun a ṭhu sawhsawh ko i,
A tilawng dinhnak pawngah cun
umhmun a khuar.
18Zebulun hi an nunnak hmanh thih tiangin,
raltuknak ah zei ah a rel lomi an si,
Naftali zong hi lo chung i a sannak hmun ah
a nunnak zei a rel lomi a si ve.
19“Siangpahrang an ra, an rak doh hna;
Khi tikah Taanak ah, Megiddo ti pawngah,
Kanaan siangpahrang cu an doh hna;
Ngun hranchaw zeihmanh an hmu lo.
20Vancung khin arfi nih an run tuk,
An lam khin Sisera cu an run tuk.
21Kishon tiva nih a fenh hna,
A luangmi ti tha, Kishon tiva tha nih cun, a fenh hna.
Hmailei ah ṭhawnnak he kal chin ko, ka nunnak!
22“Khi tikah rangtum ke thawng cu,
A rangtum ṭhawng hna an i chaih len thawng he,
Fak piin a thang.
23“Meroz cu chiat serh tuah, tiah Bawipa vancungmi nih a ti,
A chungah a ummi hna cu fak piin
chiat serh tuah hna,
Zeicahtiah Bawipa bawmh awkah
an ra lo,
A ṭhawngmi doh ah khan Bawipa kha
bawmh awkah an ra lo.
24“Ken mi Heber nupi Jael cu
Nu lakah thluachuak bik si ko seh,
Thlam um nu lakah thluachuak bik si ko seh.
25Ti a hal i hnuk a rak pek,
Bawi kheng in cawhnuk khal kha a rak pek.
26Thlam khenhnak fung kha aa lak,
A orhlei kut in rianṭuantu hna sobul khan;
Sisera cu a tuk i a lu kha a den,
a phuzep ah khan a khenh i tleng lakin a khenh.
27A kehram ah a bawk rup ko,
a tlu cang,
Cawl loin a ril ko;
A ke hramah a bawk rup ko,
a tlu cang,
A bawh rupnak ah, khika ah a thi diam ko.
28“Thlalang awng in a hei zoh,
Sisera nu nih cun khuaikhar awng
khan a hei cuanh:
‘Zeicahdah a rangleng hi
a rat bal hnga lo?
Zeicahdah a rangleng hna
ke thawng hi an rauh
ko hnga? a ti.
29A nu fim bik hna nih khan an leh,
Asilo, amah le amah aa let ṭhan ko,
30‘Hranchaw kha an hmu i an i phaw,
a si lai lo maw?
Pa pakhat caah nu pakhat maw pahnih cio dik;
Sisera caah si in chumhmi
puan hranchaw,
Puan hranchaw si in chumh i tenhmi,
Ka hngawng i i ngerh awkah,
si in chumhmi puan
tenhmi pahnih,’ a ti.
31“Cu bantukin na ral vialte cu,
maw Bawipa, rawk dih hna seh!
Sihmanhsehlaw na hawikom hna cu,
Ni khi a ṭhawnnak in a chuah bantuk khi si hna seh.”
Cun ram cu kum sawm li chung aa din.
Currently Selected:
BIACEIHTU 5: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006