BIACEIHTU 4
4
Deborah le Barak Nih Sisera An Tei
1Cun Ehud thih hnuah, Israel mi nih Pathian mithmuh i thil ṭhalo kha an tuah ṭhan hoi. 2Cun Bawipa nih Kanaan siangpahrang Jabin, Hazor i siangpahrang a simi kut chungah khan a zuarh hna; a ralbawi cu Harosheth-Hagoiim i a ummi Sisera a si. 3Khi tikah Israel mi nih Bawipa cu bawmhnak hal in an auh; zeitintiah Jabin nih thir rangleng za kua a ngei i Israel mi cu kum kul chung fak piin a hrem hna.
4Khi caan ah profetnu Deborah, Lappidoth nupi nih cun Israel mi cu bia a ceih hna. 5Efraim tlangram chung i Ramah le Bethel karlak i a ummi Deborah ungkung tangah khan a ṭhu tawn i an bia ceih awkah Israel mi cu a sinah an ra tawn. 6Mi a hei thlah hna i Abinoam fapa Barak kha, Naftali ram Kedesh khua in a auh i, “Bawipa, Israel Pathian nih nangmah cu, ‘Va kal law, Tabor Tlang ah na mi hna cu va pum hna, Naftali phun le Zebulun phun chungin thong hra va la hna, 7cun Jabin ralbawi bik Sisera cu a rangleng hna le a ralkap hna he nangmah kha Kishon tiva pawng i rak in doh awkah, ka hnuh lai i amah cu nangmah kut chungah kan pek lai,’ an ti lo maw?” tiah a ti. 8Cun Barak nih a sinah, “Na ka kalpi ahcun, ka kal lai; sihmanhsehlaw na ka kalpi lo ahcun, ka kal lai lo,” tiah a ti. 9Cun anih nih, “Kan kalpi hrimhrim lai; sihmanhsehlaw na kalnak lam nih hin nangmah sunparnak cu an phakpi lai lo, zeicahtiah Bawipa nih Sisera cu minu pakhat kut chungah a zuar lai,” tiah a ti. Cun Deborah cu a tho i Barak he Kedesh ah an kal. 10Cun Barak nih Zebulun le Naftali cu Kedesh ah a auh hna; cun mi sang khat a sinah cun an kal; Deborah zong a sinah a kal ve.
11Ken mi Heber cu Moses pu Hobab i tefa Ken mi hna sin khan aa ṭhen i Kedesh pawng Zaanannim ram i a ummi kuhthing hmun tiangin a puan thlam cu a va bunh.
12Abinoam fapa Barak cu Tabor Tlang ah a hung kal ti kha Sisera cu an chimh tikah, 13Sisera nih cun a rangleng vialte, thir rangleng za kua kha le amah sin i a ummi vialte kha Harosheth-hagoiim in Kishon tiva ah a pumh hna. 14Cun Deborah nih Barak cu, “Tho tuah, zeitintiah nihin hi Bawipa nih Sisera cu na kut chungah an pek ni a si. Bawipa cu na hmaiah a kal a si lo mei?” tiah a ti. Cucaah Barak cu Tabor Tlang cun amah a zultu mi sang khat he cun an vung kal. 15Cun Bawipa nih Sisera le a rangleng vialte le a ralkap vialte cu vainam in a sualsawhrok dih cikcek hna; Sisera cu a rangleng cungin a ṭum i a ke in a zaam. 16Cun Barak nih rangleng hna le ralkap hna cu Harosheth-hagoiim tiang a dawi hna i Sisera ralkap vialte cu vainam in an thi dih; pakhat hmanh an tang lo.
17Sihmanhsehlaw Sisera cu a ke in Ken mi Heber i nupi Jael thlam ah a zam; zeitintiah Hazor siangpahrang Jabin le Ken mi Heber chung hna karlak ah cun remnak a um. 18Cun Jael cu Sisera ton awkah khan a chuak i, “Rung pial ko, ka bawipa, ka sinah rung pial ko; ṭih hlah,” tiah a ti. Cucaah a sinah cun thlam chungah a vung pial i puan in a khuh. 19Cun anih nih, “Zaangfahnak in, ti din awk tlawm tein ka pe tuah, ka ti a hal ko,” tiah a ti. Cucaah cawhnuk saphaw thawl pakhat a hun i din awk kha a pek i a khuh ṭhan. 20Cun anih nih, “Thlam innka ah khan dir law, mi an rat i nangmah kha, ‘Hika ah hin aho tal an um maw?’ tiah an in hal ahcun, ‘An um lo,’ tiah na ti lai,” tiah a ti. 21Sihmanhsehlaw Heber nupi Jael nih cun puan thlam khenhnak fung le sobul aa lak i, a baa i aa hngilh hluahmah lioah khan a sinah cun a thli tein a va kal i a phuzep ah a khenh, a tleng i vawlei ah aa bunh. Cucaah a thi. 22Cun zohhmanh, Barak nih Sisera a dawi lioah khan, Jael nih ton awkah a va chuak i a sinah, “Ra hmanh, na kawlmipa cu kan hmuhsak lai,” tiah a ti. Cucaah a thlam chungah cun a vung lut; khika ah cun Sisera cu a phuzep i puan thlam khenhnak fung he khan a rak ril ko.
23Cucaah khi ni ah Pathian nih Kanaan siangpahrang Jabin cu Israel mi hna hmaiah a tei. 24Cun Israel mi hna kut cu Kanaan siangpahrang Jabin cungah a ṭhawng chin lengmang i Kanaan siangpahrang Jabin cu an hrawh.
Currently Selected:
BIACEIHTU 4: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006