ISAIAH 26

Pathian Nih A Mi Kha Teinak A Pek Hna

1Hi hla hi Judah ram chungah

an sak ni a phan lai:

Kan khuapi cu a ṭhawng,

Pathian hrimhrim nih a kulhnak

cu a ven!

2Khuapi kutka cu hung hna u law

zumhawktlak a simi miphun

kha luhter u,

dinnak a tuahmi miphun

kha luhter u.

3 Bawipa, nangmah nih,

an i tinhmi kha fek tein aa tlaih i

nangmah an bochanmi cu,

a tlingmi daihnak kha na pek hna.

4 Bawipa kha i bochan zungzal ko u,

amah nih an huhphenh zungzal

hna lai.

5Aa porhlawmi cu a ṭhumh hna,

an umnak khua ṭhawng kha

a hrawh i

a kulhnak vampang cu a chimh

hna i leidip lakah an tlu.

6Atu ah cun rak hremmi nih khan

a cung in an chawhhnawh i

an ke in an lamh.

Pathian Dinnak Thangṭhatnak

7 Bawipa, miṭha cu an lam na sialpiak hna i

an zulhmi lam cu na pheiter.

8Nangmah duhnak kha kan zul i

nangmah kha kan in bochan;

kan duhmi cu nangmah na si ko.

9Zan ah nangmah kha kan ngai;

vawlei le a cung i a ummi kha

an bia na ceih tikah

dinnak hi zeidah a si ti kha

an hngalh lai.

10Nang nih cun miṭhalo kha

na zaangfah ko hna nain,

dinnak tuah kha an cawng

duh hlei lo.

Miding mi an umnak ram hmanh

ah hin ṭhat lonak kha an tuah

ṭhiamṭhiam ko,

na lianhngannak kha an hngal

duh hlei lo.

11Na ral nih, dan a kan tat lai, ti awk

an hngal lo,

temhinnak pe hna law na timhmi

dantatnak kha inter hna.

Na mi kha zeitluk in dah na dawt hna

ti kha annih cu hmuhsak hna. #Heb 10.27

12 Bawipa, nangmah nih rumnak

na kan pek lai;

kan tuah khawhmi thil vialte hi

nangmah tuahmi lawngte an si dih.

13 Bawipa, kan Pathian, midang nih

an kan uk,

sihmanhsehlaw kan Bawi cu

nangmah lawnglawng na si.

14Atu cu an thi cang i an nung ṭhan

ti lai lo,

an thlarau cu a tho ṭhan lai lo,

zeicahtiah nangmah nih dan na tat

cang hna i na hrawh cang hna.

Ahohmanh nih an hngal ti hna lo.

15 Bawipa, nangmah nih kan miphun cu

na ṭhanter i

a ram cu a kam kip in na kauhter,

cucaah nangmah nih upatnak

na hmuh.

16 Bawipa, nangmah nih na mi cu dan na

tat hna i

harnak an in tikah na sinah

thla an cam.

17Nau ngan a fakmi nu nih

a ai bantukin,

nangmah nih na kan aiter, Bawipa,

18Kan ngan cu a fak ko, sihmanhsehlaw

kan hrinmi zeihmanh a um fawn lo.

Kan ram caah zeihmanh kan teimi

a um lo i kan tuah khawhmi

a um lo.

19Kan mi hna a thimi kha

an nung ṭhan lai!

An pum kha a nung ṭhan lai.

An thlan i a itmi vialte kha

an i hlau lai i

lunglawm in hla an sa lai.

Dapti nih vawlei cu a hrinter

ṭhan bantukin

a thi ciami cu Bawipa nih a nunter

ṭhan hna lai. #Dan 12.2

Biaceihnak le Kir Ṭhannak

20Ka mi hna, nan inn chungah lut u law innka i kharkhumh u. Pathian thinhunnak a dih hlantiang, caan tawite chung cu i thup u. 21Vawleicung mi kha an sual ruang i dantat awkah Bawipa cu a rung ṭum lai. Vawlei cungah a thli tein lainawnnak an tuahmi kha a puang dih lai i an thahmi hna kha vawlei nih a thup ti hna lai lo.

Currently Selected:

ISAIAH 26: HCL06

Highlight

Compare

Copy