HOSEA 9
9
Israel Cungah Dantatnak
1Israel mi hna, lawkih mi bantukin
puai nan tuahmi hi ngol u.
Zeicahtiah nan Pathian cu nan hlawt i
a cungah khan zumhawktlak loin
nan um.
Nan ram chung dihlak ah hin
hlawhhlangnu bantukin
Baal sinah nan i zuar i
an phalhmi hna rawl kha
nan i lawmhpi.
2Sihmanhsehlaw rawl siseh,
oliv chiti siseh a za in
nan ngei lai lo i
mitsur hang kha a um lai lo.
3 Bawipa ram chungah hin Israel mi hi
khua nan sa kho lai lo i
Izipt ram ah khan nan kir ṭhan lai,
asilole Assiria ram ah rawl
thiang lo kha nan ei lai.
4Midang ram ah cun Bawipa sinah
mitsur hang thawinak kha
an pechan kho lai lo,
an raithawinak zong kha
an pe kho lai lo.
An raithawinak paoh kha ruakhngah
camceh nih a thurhhnawmhtermi
rawl bantukin an si lai.
An rawl cu rawlṭam damnak
ca lawngah a si lai,
Bawipa biaknak inn ah kalpi
a si lai lo.
5Cun Bawipa puai ni, khual an i telnak
puai ni kha a phanh tikah
zeidah an tuah lai?
6Rawhralnak kha an luat hmanh ah
Izipt nih khan a rak i fimhlawm lai i
Memfis cu an thlan a si lai;
Rili chung thetse tlang nih khan
an lawng cu a hrawh hna lai,
An ram ah khan belh a kho lai i
an umnak hmun ah khan hling
an kho lai.
7Dantatnak ni cu a phan cang,
phuhlamnak ni cu a phan cang;
Israel cu ṭhumh a si cang.
Khi tikah nan sualnak a nganmi nih
khan profet cu mihrut ah a ser hna
lai i hmutu cu mimolh ah
a ser hna lai. #Luk 21.22
8Pathian nih a mi Israel mi hna kha
ralrinnak bia chimh awkah
keimah cu profet in a ka kalter,
Sihmanhsehlaw ka kalnak kip ah
va bantukin foih kha nan ka zuam.
Pathian ram chung hrimhrim ah hin
mi kha profet i a rel hna cu an si.
9Annih nih an tuahmi ah khan
an sual tuk hringhran ko,
Gibeah i a rak si bantuk te kha a si ko.
Pathian nih an sualnak kha a philh
lai lo i dan a tat hna lai. #Biac 19.1-30
10 Bawipa nih aa thawh i, “Israel hi
ka rak hmuh terte ah cun
thetse ram i a khomi mitsur thei
bantuk a rak si.
Nan pupa hna ka rak hmuh hmasa
terte ah hin theipi a hung tlai
hmasa bikmi hna
hmuh bantuk khi a rak si.
Sihmanhsehlaw Baal-Peor an phak
tikah Baal biak hram kha
an thawk i an duhmi an siasal
ka huat tluk khan
anmah cu ka huat hna. #Nam 25.1-5
11Israel sunparnak cu va bangin
a zuang lai i
Annih nih fa an hring ti lai lo;
Pumlawnglo in a ummi nu an um
ti lai lo i
fa pawi zong an um ti lai lo.
12Annih nih fa an ngeih hmanh ah
ka lakpiak hna lai i pakhat hmanh
ka nganh hna lai lo.
Hi mi hi ka kaltak tik hna ah
an cungah thil ṭhalo ngaingai
a tlung lai.
13Chiandeih fano cu kah awk ding
lawngah an hung chuah bangin,
Efraim nih a fale hna cu sam awk
ding caah a chuahpi hna lai.
14Pe ko hna, maw Bawipa, zei cu dah pe
hna tiah kan nawl lai?
Fa a hrulhter lengmangmi nau-inn
le a carmi hnuk kha pe ko hna.
15Ṭhat lonak an tuahmi vialte kha
Gilgal in aa thawk,
Huat hram ka thawh hnanak cu
khika khan a si.
Ṭhat lonak an tuahmi ruangah khan
ka ram chungin ka dawi hna lai.
Annih cu ka daw ti hna lai lo,
an hruaitu
hna nih an dihlak in an ka ral.
16Israel mi cu a hram a car i
thei a tlai ti lomi
thingkung bantuk an si.
Fa an ngei lai lo, an ngeih hmanh ah
an dawt ngaingaimi an fale hna cu
ka thah hna lai.
17Annih cu ka Pathian nih a hlawt
hna lai,
Zeicahtiah a bia kha an ngai lo,
Annih cu miphun hna lakah mivakvai
an si lai.
Currently Selected:
HOSEA 9: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
