HOSEA 8
8
Israel Nih Siasal A Biak
1Muko kha tum tuah, Bawipa
hmunthiang cungah ral cu langta
bantukin an rung zuang.
Ka mi nih amah he ka sermi
ka biakamnak cu an hrawh i
Ka cawnpiaknak kha an doh.
2Annih nih keimah cu, kan Pathian
na si an ka ti i annih cu,
na mi kan si an ti,
3Sihmanhsehlaw a ṭhami thil kha
an duh lo.
Hi ruangah hin an ral nih an dawi
hna lai.
4Siangpahrang kha an ser hna,
sihmanhsehlaw keimah duhning
in a si lo,
bawi kha an chiah hna,
Sihmanhsehlaw keimah hngalh loin
an tuah;
Annih nih an sui le an ngun in
siasal kha an i ser hna.
5Nan cawfa pathian cu an thu,
maw Samaria;
Ka thinhunnak cu an cungah a alh
in a alh.
Suallo tein an nun khi zeitik
riamruam ah khin dik a hei si
te lai.
6Hi cawtum hi zei bantuk pathian dah
a si ee?
Zungthiam i an sermi pei a si ko hi,
pathian a si ṭung lo;
Samaria cawfa cu kuai cikcek in
den a si lai.
7Israel nih thli a tuh i phuchim a zun;
A dirmi rawl kung vui a ngei lomi nih
rawl fang zeihmanh an chuahpi lo.
An chuahpi hmanh ah an chuahpimi
cu ramdangmi nih an dolh dih lai.
8Atu cu Israel hi dolh a si cang,
miphun hna lakah a lo cang,
man ngei lo a si cang.
9Ramlak i a lemi laa bantukin
an lung a ṭhawng i
anmah tining lawngin kal an duh.
Assiria kha bawmhnak va hal
awkah an kal.
Israel mi nih hin huhphenhnak
hmuh awkah,
miphun dang sinah khan
an i zuar cang.
10Sihmanhsehlaw ka pumh hna lai i
dan ka tat hna lai.
Assiria siangpahrang nih a hrem hna
tikah an i lawng len te lai.
11Sual thianhnak caah tiin Israel mi nih
biakṭheng tam deuh an ngeih deuh
paoh ah, sualnak hmun kha a karh
chin lengmang ve a si ko!
12Cawnpiaknak kha rel cawk loin ca in
ka ṭialpiak ko hna nain
zeihmanh ah an rel hna lo.
13Annih nih raithawinak tuah le
sa ei kha an duh ngaingai,
Sihmanhsehlaw Bawipa keimah cu
an cungah ka lung a tling lo.
An sualnak kha ka philh lai lo i
dan ka tat hna lai;
Izipt ram ah ka kalter ṭhan hna lai,
asilole, Assiria ram ah rawl
thianglo kha an ei lai.
14Israel nih inn ṭhaṭha kha a sak hna,
sihmanhsehlaw a Sertu kha
a philh cang.
Judah nih kulhnak ralhau a ngeimi
a khua kha a karhter luaimai hna,
Sihmanhsehlaw a khua cu mei in
ka duah hna lai i
a inn ṭhaṭha hna cu
a kangh dih hna lai.
Currently Selected:
HOSEA 8: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
