HOSEA 12
12
1Efraim cu a tuurun thli menmen
a simi kha a khal i
Amah cu chun nitlak in nichuahlei
thil a dawi lengmangmi kha a si;
Assiria he khan biakamnak kha
a va ser i Izipt ram ah khan
laksawng chiti kha a vun phorh.
2 Bawipa nih Judah cungah bia pakhat
a ngei i
Jakob cu a ziaza ruangah khan
dantat aa tim;
thil ṭhalo a tuahmi kha
a lehrulh lai.
3A nu paw chung hmanh ah khan
a unau kha a chawhkanh i
Upa a hung si tikah Pathian kha
a zuam. #Gen 25.26 #Gen 32.24-26
4Vancungmi he khan an i pai i a tei.
Jakob cu a ṭap i thluachuahnak
ka pe tiah a hal.
Khi tikah Pathian cu Jakob sinah cun
Bethel ah khan a ra i amah he cun
an i chawn. #Gen 28.10-22
5Cucu Bawipa, Ralkapbu Pathian kha
a si i a min cu Bawipa a si.
6Cucaah atu cu Jakob tefa hna,
nan Pathian cu i bochan u law
amah sinah khan kir tuah u.
Amah sinah khan zumhawktlak in
um u law ding tein um ko u,
Cun nan Pathian nih rian a ṭuan lai
kha thinfual in hngak ko u.
7Israel mi hi Kanaan mi bantukin
mihrokhrawl an si,
Cuai deu kha an hman hna i
mihlen kha an duh.
8Asinain annih nih cun an i thawh i,
Kannih cu kan rum cang, chawva
tampi kan ngei cang;
Dinlonak in an rum tiah ahohmanh
nih an kan ti kho lai lo, an ti.
9Sihmanhsehlaw Izipt ram in
an chuahpitu hna
nan Pathian cu Bawipa hi ka si.
Thetse ram i nan um lio i nan sin i
ka rat tikah puan thlam chungah
nan um bantuk khan,
ṭhal thlam chungah
kan umter ṭhan ko hna lai. #Lev 23.42-43
10Profet hna sinah cun bia ka chim i
langhnak tampi ka pek hna.
Atu cu profet hna sin cun rawhralnak
kha ka tlunter lai.
11Gilead ah siasal kha an biak hna,
cu a biatu hna cu an thi lai.
Gilgal ah cawtum kha rai ah
an thawi hna,
cucaah biakṭheng hna cu lo lak
lungpon ah an cang lai.
12Kan pu Jakob cu Aram ram ah khan
a rak zam i
Khika ah nupi ṭhitnak caah mi tuu
kha a rak khal. #Gen 29.1-20
13 Bawipa nih Israel mi kha
Izipt ram chung i sal i an cannak in
chuah awkah
profet pakhat kha a thlah;
Cun profet pakhat in
a zohkhenh hna. #Exo 12.50-51
14Israel mi nih Bawipa kha fak piin
a thin an hunter;
Annih cu an sualnak ruangah khan
thihnak hmuh awk an tlak i
Pathian nih a ngaithiam hna lai lo.
Bawipa nih a cung i ningzahnak
an tluntermi ruangah khan
dan a tat hna lai.
Currently Selected:
HOSEA 12: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
