HOSEA 11
11
Pathian Nih Israel Mi A Dawt Hna
1Israel cu ngakchia a si lio in
ka dawt;
Ka fapa cu Izipt ram chungin
chuah awkah ka auh; #Exo 4.22; Mat 2.15
2Sihmanhsehlaw ka kawh deuh hna
paoh ah an ka hlat chin lengmang
Baal sinah khan raithawinak an tuah i
serchom siasal sinah khan
rimhmui kha an khangh.
3Efraim kal a rak cawnpiaktu kha
keimah ka si.
Kut in a rak pomtu hna kha
keimah ka si;
4Sihmanhsehlaw hruainak hri in
ka khih hna i dawtnak in
ka hruai hna kha an hngal lo.
Ngakchia bantukin ka bel ah ka hun
cawi hna i rawl khaih awkah
ka kunhnawh hna.
5Keimah lei i kir ṭhan cu an duh lo
caah Izipt ram ah cun pei dik
an kal ṭhan ko lai i
Assiria mi cu an siangpahrang
a si ko lai.
6Ral nih an khua kha an lak dih hna
lai i khua kutka hrenhnak
thingtluan hna cu
an khiah dih hna lai.
Lungthin cheuhnak ṭhalo kha ka mi
nih an zulh caah ral nih cun
an hrawh dih hna lai.
7Keimah cu an ka mertak cang i
cu ruangah a chuakmi thil kha
an hrial kho ti lai lo,
An cung i an i khinhmi seihnam rit
ruangah khan an ai len lai,
sihmanhsehlaw ahohmanh nih
an ṭhialpiak kho hna lai lo.
8Zeitindah kan hlawt khawh lai,
Efraim?
Zeitindah kan thlah khawh lai, Israel?
Admah ka rak hrawh bantuk khan
kan hrawh lai maw?
Zeboiim cung i ka rak tuah bantuk
khan na cungah ka tuah lai maw?
Ka tuah kho lai lo, ka chungah
ka lung cu aa thleng cang i
ka ngaihchiatnak cu
a alh in a alh cang. #Deu 29.23
9Ka thinhun in kan hrawk lai lo,
Israel cu ka hrawk ṭhan lai lo.
Zeicahtiah kei cu Pathian ka si,
minung ka si lo.
A Thiang Mi Keimah cu nan sin i
a ummi hi ka si,
Nan sinah thinhun in ka ra lai lo.
10An ral cu chiandeih bantukin
ka awnhhnawh hna lai i
ka mi nih cun an ka zulh lai;
Nitlaklei in khulrang in ka sinah
an ra lai.
11Khulrang in an ra lai, va zuan in
Izipt ram in an hung zuang lai i
laileng bantukin Assiria ram in
an rung zuang lai;
Cun an inn cio ah khan khua
ka sakter hna lai.
Hihi Bawipa bia hrimhrim a si.
12Efraim nih hlennak bia in a ka kulh i
Israel chungkhar hna nih
dehnak bia in an ka kulh;
Cun Judah cu Pathian kha zulh duh
loin aa chang i,
A thiang tiah a timi siasal kha
an biak ko rih hna.
Currently Selected:
HOSEA 11: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
