EZEKIEL 8
8
LANGHNAK PAHNIHNAK
(8.1—10.22)
Jerusalem Sualnak le Dantatnak
1Kum ruknak kum, thla ruknak thla, ni nganak ni ah inn ah ka ṭhu i Judah upa hna kha an ka leng. 2Chikkhatte ah khin Bawipa kut cu ka cungah a hung um i minung a lomi pakhat kha ka hmuh. A tai toi vialte cu mei khi siseh law cu ko cu a lo i a tai cung vialte cu dar bantukin a tleu i a ceu. #Eze 1.27 3Kut bantuk a simi khi a hun samh i ka calsam in a ka tlaih. Thlarau nih van le vawlei karah a ka cawi i Pathian langhnak in Jerusalem ah a ka kalpi i chaklei hoihmi chungchin kutka luhnak ah khan a ka chiah; khika ah cun Hornak Siasal kha a um i cucu hornak lungthin thawhternak caah a si. 4Nelrawn i ka hmuhmi langhnak bantuk khan Israel Pathian sunparnak cu khika ah khan a um. #Eze 1.28 5Bawipa nih cun a ka thawh i, “Mipa, chaklei khi zoh tuah,” tiah a ka ti. A chim bang cun chaklei cu ka zoh i biakṭheng kutka chaklei ah cun, luhnak ah khan, Hornak siasal cu a um. 6A ka thawh i, “Mipa, zeidah an tuah kha na hmu maw? Hika ah Israel mi nih an tuahmi fihnung ṭeifiak nih keimah cu ka hmunthiang khan lamhlatpi ah a ka dawi i cu bantuk fihnung cu na hmuh chin lengmang ko rih hna lai,” tiah a ti.
7Cun siangpahrang inn pawl umnak luhnak ah khan a ka kalpi i kulhnak vampang ah cun awng pakhat a um kha ka hmuh. 8A ka thawh i, “Mipa, awng kha khoih tuah,” tiah a ka ti i 9a ka ti bantukin ka khoih i mitlum ah a cang. “Vung lut law hika ah an tuahmi thil fihnung hna kha vung zoh tuah,” tiah a ka ti. 10Cucaah ka vung lut i khika ah a lawn in a lawnmi saram hna le fihnung a simi saram hna le rungrul cangcel hna hmanthlak hna kha ka hmuh hna; cun Israel mi siasal hna cu vampang ah khan an i suai liangluang ko. 11An hmaiah cun Israel mi upa sawm sarih an dir i an laifang ah cun Safan fapa Jaazaniah kha a dir, pakhat nih zihmui kheng pakhat cio an i put i cu kheng chung cun rimhmui khu an chuak. 12A ka thawh i, “Israel mi upa hna nih mui lak i an tuahmi khi na hmu maw? Anmah cio nih an i suaimi milem an chiahnak ah hmunthiang cio i an tuahmi khi? Annih nih cun Bawipa nih a kan hmu lo tiah an ruah i ram hi a hlawt cang, tiah an ruah. 13Annih an tuahmi thil, hi nakin fih a nung deuh rihmi hna cu na hmuh chin rih hna lai,” tiah a ti.
14Cun Bawipa inn kutka, chaklei a hoihmi ah khan a ka kalpi i khika ah Tammuz#8.14 Tammuz hi Sumerian mi khuazingnu a si. a ṭah lengmangmi nu kha ka hmuh hna. 15A ka thawh i, “Mipa, mah khikhi na hmu maw?” tiah a ka hal. Cun a ka thawh ṭhan i, “Hi nakin a chia deuhmi fihnung kha na hmuh rih lai,” a ti. 16Cucaah Bawipa inn chung chungchin tual ah khan a ka kalpi i khika ah Bawipa hmunthiang i va luhnak ah cun, innleng le biakṭheng karlak ah, mi kul le panga tluk, hmunthiang cu hnulei chit in nichuahlei kha a zoh i a chuak liomi nika bawh buin a biami kha ka hmuh hna. 17A ka thawh i, “Mipa, khikhi na hmu maw? Hi thil fihnung hna hi thil hmetuai ah an rel caah maw Judah mi hna nih hin ram hi zaang-ennak in an khahter hi a si hnga? Ka thinhunnak damter an i zuam tik hmanh ah hin ka thin an ka phawh chin lengmang. 18annih cu ka thinhun in ka merhnawh hna lai i ka zaangfah hna lai lo i ka zuah fawn hna lai lo. Thang piin ka au hna hmanh seh law ka ngai lai lo,” tiah a ti.
Currently Selected:
EZEKIEL 8: HCL06
Highlight
Copy
Compare
Share
Want to have your highlights saved across all your devices? Sign up or sign in
<p>Lai (Hakha) Common Language Bible © Bible Society of Myanmar 2006</p>
Learn More About Lai (Hakha) Common Language Bible 2006
