EZEKIEL 43
43
Pathian Sunparnak Biakinn Ah A Kir Ṭhan
1Nichuahlei a hoihmi kutka ah cun a hei ka kalpi 2i Israel Pathian sunparnak cu nichuahlei in a rat kha ka hmuh. A aw cu ti thawng nganpi bantuk a si i vawlei cu a sunparnak cun a ceu. #Eze 10.3-4,18-19; 11.22-23; Biat 1.15 3A mui ka hmuhmi cu khuapi kha hrawh awk i a rat lio i ka hmuhmi bantuk kha a si. Kebar tiva pawng i ka hmuhmi bantuk kha a si i vawlei ah ka bawk. 4Bawipa sunparnak cu biakinn leiah cun a hung kal i nichuahlei hoih in a ummi kutka leiah khan a kal. 5Thlarau nih a ka cawi i chunglei tual ah khan a ka chiah i Bawipa sunparnak cu biakinn cu a khat. 6Cun biakinn chung cun pakhat nih a hun ka chawnh kha ka theih i mipa cu ka pawngah khan a dir. 7A ka thawh i, “Mipa, ka bawiṭhutdan umnak hmun, ka ke chiahnak hmun, Israel mi sinah zungzal in ka umnak ding hmun khi na hmu maw? Annih nih siseh, an siangpahrang nih si hna seh, ka sinah zumhawktlak loin an umnak le an thih tikah an siangpahrang hna ruak in ka min thiang cu an thurhhnawmh ti lai lo. 8An innleng cu ka innleng pawngah an chiah i an innka tung cu ka innka tung pawngah an bunh, cun keimah le annih karlak ah cun vampang a um i annih nih ka minthiang cu thil fihnung an tuahnak khan an thurhhnawmh i ka thinhun in ka hrawh hna. 9Sihmanhsehlaw atu cu ka sin i zumhawktlak loin an umnak kha an hlawt lai i an siangpahrang hna ruak kha ka sinin aa hlatnak hmun ah an ṭhial hna lai i zungzal in an lakah ka um cang lai. 10Cucaah mipa, Israel mi cu hi biakinn kong le a sawisam le a hmetngan ning cu chim hna, annih cu thilṭhalo an tuahmi kha an ning a zah nakhnga. 11Annih nih an tuahmi vialte kha an ning a zah ahcun annih cu biakinn le a chung thilri hna le chuahnak innka hna le luhnak hna le a sanning vialte le cuticun sak a si lai ti i ruahnak vialte kha tling tein na chimh hna lai; annih cu ṭha tein chim hna law an hmuh khawh dingin suaipiak hna law annih nih an lung in an i cinken lai i an tuah khawh lai. 12Hihi tlang cung i sak ding biakinn sawisam cu a si; a velchum in a umnak hmun cu hmun thiang bik a si lai,” a ti.
Biakṭheng
13Hihi biakṭheng cu a tungvang kha dong in tah tikah a si, (cu dong cu dong khat le zabok a si kha). Biakṭheng a sanlei cu hihi a si: a hram cu dong khat a sang i dong khat a kau. A velchum i a tlang cu khap khat a kau. #Exo 27.1-2; 2Cha 4.1 14Vawlei i a tonak in a hram tang nung bik cu dong hnih a si, a kauhlei cu dong khat a si, cun a dot hme deuh in a dot lian deuh tiang cu dong li a si i a kauhlei cu dong khat a si. 15Biakṭheng tappi cu dong li a sang i dong khat cio a sangmi ki nih khan an doh. 16Tappi cu dong hleihnih a sau i dong hleihnih a kau, cucu tungvangpalh tling cu a si. 17A hram dot cungnung deuh cu a kam li in a saulei dong hleili, a kauhlei dong hleili a si i a tlang cu dong cheu a chah. Biakṭheng hram cu dong khat a chah i nichuahlei a hoihmi lamhbak kha an um.
18A ka thawh i, “Mipa, hihi Bawipa Pathian bia an si: Biakṭheng cu ser dih a si tikah pumpek thawinak pekchanhnak ca le a cung i thi thehnak ding caah hihi zulh awk phunglam an si lai. 19Levi tlangbawi, Zadok tefa hna lawng kha ka rian ṭuan awkah ka pawngah an ra lai, tiah Bawipa Pathian nih a ti. Annih cu sual thawinak caah cawtum no pakhat na phawt hna lai; 20a thi cu tlawmpal in na lak i biakṭheng ki pali ah khan le a hram dot cungnung deuh a kil pali ah khan le a tlang a velchum ah khan na chiah hna lai i cuticun na thianh lai i a caah remnak na serpiak lai. 21Cun sual thawinak ca i chiahmi cawtum kha na lak lai i biakinn kulh chungah khan amah ca i chiahmi hmun ah cun mei in an khangh lai, sihmanhsehlaw Hmun Thiang Bik lengah khan a si lai. 22A ni hnih ni ah do a tlami mehehtum pakhat kha sual thawinak caah na pekchanh lai i cawtum in an thianh bantuk khan biakṭheng cu mehehtum in an thianh lai. 23Biakṭheng cu na thianh hirhiar tikah saṭil run chung i cawtum no dotla le tuukawng dotla kha na pekchanh hna lai. 24Bawipa hmaiah khan na pekchanh hna lai; tlangbawi nih cite an phulh hna lai i Bawipa ca i khanghthawinak caah an thawi hna lai. 25Ni sarih chung cu nifate sual thawinak caah saṭil run chungin meheh pakhat, cawtum no pakhat le tuukawng pakhat kha na hman lengmang hna lai; cu hna cu an dihlak in dotla lawngte an si lai. 26Ni sarih chung kha biakṭheng caah cun remnak an ser lai i cun a thiang cang tiah an ti lai i Pathian ca hman awkah an thleidan lai. 27Cu caan a dih tikah, a ni riat ni in a hmailei ah cun tlangbawi hna nih khan, biakṭheng cungah cun nan khangh thawinak hna le nan daihnak thawinak hna cu an thawi hna lai i ka cohlan hna lai,” tiah Bawipa Pathian nih a ti. #Exo 29.35-37
Currently Selected:
EZEKIEL 43: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
