EZEKIEL 42
42
Khaan Thiang Hna le Lenglei Vampang
1Cun chaklei kam i a ummi lenglei tual ah khan a ka kalpi i Biakinn tual lei a hoihmi khaan hna ah khan a ka luhpi. Cu khaan hna cu chaklei i a ummi inn hna kha hmaitonh in an um. 2Chaklei kam i a ummi khaan hna cu an saulei dong za khat an si i an kauhlei dong sawm nga an si. 3Chunglei tual ta a simi hmun dong kul chungah khan lenglei tual ta a simi lungrual he hmaitonh in inn khaan dot thum in an um. 4Cu khaan hna hmaiah cun chunglei kamah lam pakhat a um i dong hra a kau i dong za khat a sau i a luhnak innka hna cu chaklei kamah khan an um. 5Cungdot khaan hna cu tangdot le a laifang khaan hna nakkhan an bi deuh. Zeicahtiah hnulei ah pil deuh in sak an si. 6Dot thum in an um i dot khatnak khaan si hna seh, dot hnihnak khaan si hna seh, dot thumnak khaan si hna seh, an i ruang hna lo, cucaah cun inntual i a ummi inn dang hna nih dohtu tung pipi an ngeihmi hna kha an ngei hna lo. 7Cun innkhaan hna hril lenglei thluahmah ah cun lenglei tual he hmaitonh in vampang pakhat dong sawm nga a saumi a um. 8Lenglei tual innkhaan hna cu dong sawm nga an sau i biakinnpi he hmaitonh in a ummi khaan hna cu dong za khat an sau. 9Hi khaan hna kehram thluahmah hin lam pakhat a kal i cu lam ah cun nichuahlei in luh a si, lenglei tual in innkhaan hna chung i nitlaklei in luh khawh nakding caah khan hi lam cu a si. 10Cu lam a kauhlei cu inntual vampang rup khan a si.
Thlanglei kam zongah, tual he hmaitonh in le inn he hmaitonh in khaan kha an um 11i an hmaiah khan lam pakhat a um. Chaklei khaan hna he khan an i lo dih, an saulei le an kauhlei aa khat dih, an innka hna nih thlanglei an hoih, kha dah ti lo cu, an chuahnak innka umtuning tehna, an pungsan tehna an i khat dih. 12Cucaah thlanglei kamah a ummi khaan hna chung luhnak caah khan lam donghnak chaklei vampang hram ah khan innka pakhat a um.
13Cun a ka thawh i, “Tual hmai i a ummi chaklei khaan hna le thlanglei khaan hna kha khaan thiang an si caah cu khaan hna cu Bawipa hmaiah a chuakmi tlangbawi hna nih thawinak thiang bik an einak hna hmun an si lai, cuka khaan hna cu thil thiang bik thawinak — rawl thawinak, sual thawinak le phungbuar thawinak — chiahnak hmun thiang an si lai. 14Tlangbawi kha hmun thiang i a luh tikah, khika ah a hmanmi thilthuam hna kha cuka i an chiahtak hna lo ahcun, lenglei tual ah khan an chuak lai lo, zeicahtiah cu thilthuam hna cu thil thiang an si, zapi sin i an va chuah hlanah khan thil dang in an i thlen awk a si.
Biakinn Hmun Bitkauh
15Biakinn chunglei hmun kha a tah dih tikah nichuahlei a hoihmi kutka khan a ka chuahpi i biakinn hmun kha a velchum in a tah dih. 16Nichuahlei kam kha tahnak fung khan a tah i a tahnak fung ningin dong za nga a si. 17Cun aa mer i chaklei kam kha a tah i a tahnak fung in dong za nga a si. 18Cun aa mer i thlanglei kam kha a tah i a tahnak fung ningin dong za nga a si. 19Cun nitlaklei ah aa mer i a tah i a tahnak fung ningin dong za nga a si. 20A kam li te khan a tah dih, a saulei dong za nga, a kauhlei dong za nga a si. A velchum in vampang nih a kulh i cu vampang cu hmun thiang le hmun thiang lo thleidannak ca i tuahmi a si.
Currently Selected:
EZEKIEL 42: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
