EZEKIEL 3
3
1Cun a ka thawh i, “Mipa, na hmai i a ummi kha ei tuah, hi cazual hi ei tuah; cun va kal law Israel mi kha bia va chim hna,” tiah a ti. #Biat 10.9-10 2Cucaah ka kaa cu ka an i ei awkah cazual cu a ka pek. 3Cun aa thawh i, “Mipa, kan pekmi ca zual hi dolh law khim tein um tuah,” tiah a ti. Cucaah ka ei i khuaihliti bantukin a thlum.
4A ka thawh i, “Mipa, Israel mi sinah va kal law chimh ka duhmi hna kha va chim hna. 5An holh a hrang i a harmi hna sinah thlah na si lo, Israel mi sinah thlah na si ko. 6Miphun ngan pipi, an holh a hraan tuk ca le a har tuk ca i an chimmi zei a si tiah a sullam na hngalh khawh lomi hna sinah kan thlah lo. Annih sin tu ah khan rak in thlah ning law cu, annih nih cun na bia kha an rak ngaih ko hnga. 7Sihmanhsehlaw Israel mi nih cun na bia ngaih kha an duh lai lo, zeicahtiah keimah ka bia ngaih kha an duh lo i annih cu ningzah hngal lomi le lung a hak i a ṭhawng hringhranmi an si. 8Sihmanhsehlaw nangmah cu anmah he aa tluk ah kan ser lai. Ningzah an hngalh lo tluk le an lung a khon tlukin nang zong kan hahter ve lai i kan khonter ve lai. 9Na cal cu ṭeklung nak hak deuh in ka ser lai. Ral thawh hmangmi si hna hmanh seh law zeitikhmanh ah ṭih hna hlah, zeitikhmanh ah na thin in phanter hna hlah seh,” tiah a ka ti. 10Cun a ka thawh i, “Mipa, nangmah kan chimhmi hi ṭha tein ngai law na lung chungah i cinken tuah. 11Na phunhawi sal i a tangmi hna sinah khan va kal law bia va chim hna. An ngaih duh ah siseh, an ngaih duh lo ah siseh, ‘Hi hi Bawipa Pathian bia a si,’ tiah va chim hna,” tiah a ti.
12Cun thlarau nih a ka cawi i, Bawipa sunparnak cu a umnak hmun in a thawh tikah khan ka hnulei ah thawng ṭihnung ngai pakhat ka theih. 13Thilnung hna thla an i hnor thawng cu ka theih, leng kekual hna thawng cu ka theih fawn, cun thawng ṭihnung zong ka theih fawn. 14Thlarau nih a ka cawi i a ka zuanpi i lunglawmhnak he khat in ka kal i Bawipa kut cu ka cungah ṭhawng ngaiin a um. 15Cucaah saltang hna sinah cun Tel-abib ah ka phan i annih cu Khebar tiva pawngah an rak um. Ni sarih an sinah ka ṭhu i ka ar ko.
16-17Ni sarih a donghnak ah cun Bawipa bia cu ka sinah a ra phan i, “Mipa, nangmah cu Israel mi hna vengtu ah kan ser cang. Ka bia kha an sinah na kalpi lai i annih cu ralrinnak na pek hna lai. 18Miṭhalopa cungah thihnak ding bia khiahnak ka chim zong a si sual kho ko, a ziaza a ṭha lomi kha a hlawt i a nunnak kha khamh awkah ralrinnak kha na pek lo ahcun sualnak cu amah ta a si ko; a ṭhat lo ruangah a thi ko lai, sihmanhsehlaw a thihnak ruangah khan nangmah cu kan mawhchiat lai. 19Sihmanhsehlaw ralrinnak na pe nain a ziaza ṭhalo kha a tuah lengmang ṭhiamṭhiam ko ahcun, a ṭhat lonak ruangah khan a thi lai i sihmanhsehlaw nangmah tu cu na luat kho lai. 20Asiloah, miding mi pakhatkhat cu a pial kho ko i palhnak kha a tuah khawh ko, cucu a rilhnak a chuahtertu ka siter ko lai; nangmah nih ralrinnak na pek lo caah a thi lai. A sualnak ruangah a thi lai; dinnak a rak tuahmi kha relpiak a si lai lo i a thih ruangah khan nangmah cu kan mawhchiat lai. 21Sihmanhsehlaw miding mi kha sual lo awkah ralrinnak na pek hna i sual lo in an um ahcun annih nih ralrinnak kha an hmuh caah an nunnak kha an i khamh lai i nangmah zong nih na nunnak kha naa khamh ve lai,” tiah a ti.
Ezekiel A Holh Kho Lo
22 Bawipa kut cu ka cungah a phan i a ka thawh i, “Tho tuah, nelrawn ah khin vung kal law khika ah bia kan chimh lai,” tiah a ka ti. 23Cucaah ka tho i nelrawn ah cun ka vung kal; khika ah cun Khebar tiva pawng i ka rak hmuh bantuk khan Bawipa sunparnak cu a rak um kha ka hmuh i ka bawk. 24Cun thlarau ka chungah a rung lut i a ka dirter i 25“Va kal law na inn chungah inn vaa hrenhkhumh. Mipa, nangmah cu hri in khih le ṭem na si lai i mi zapi sinah na chuak kho lai lo. 26Na lei cu na dang cunglei ah ka hren chih lai i bia na chim kho lai lo; annih cu ral thawh hmangmi an si ko nain, a situ ding hna cu nangmah cu na si lai lo. 27Sihmanhsehlaw nangmah kha chimh awk thil ka ngeih tikah bia chim khawhnak kha kan pek ṭhan lai. Khi tikah na thawh hna lai i, ‘Mah hihi Bawipa Pathian bia a si,’ tiah na ti hna lai. Ngaih a duhmi nih ngai ko hna seh, a duh lomi nih duh lo ko hna seh; Zeicahtiah annih cu ral thawh hmangmi cu pei an si fam cu,” a ka ti.
Currently Selected:
EZEKIEL 3: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
