EZEKIEL 28

Tair Rawhnak Chimchungnak

1Mah hihi Bawipa nih ka sinah a chimmi bia an si. A ka thawh i, 2“Mipa, Tair bawi sinah cun va chim law, hihi Bawipa Pathian bia a si, va ti:

Porhlawt ruamkainak in naa thawh i,

‘Kei cu pathian ka si,

Rilipi cungah pathian bantukin

bawiṭhutdan cungah ka ṭhu,’ na ti.

Nang cu minung na si ko i pathian na

si lo nain pathian tluk ah naa ruat.

3Ziah, Daniel nak fim deuh maw

na si?

Na caah a thuk tukmi biathli

zeihmanh a um lo maw?

4Na fim i na zer ngaingai ko, chawva

tampi naa chiah ko,

Na ro kuang chungah sui le ngun kha

naa khon tengtung ko hna;

5Chawlehnak i na fimnak thawngin

chawva cu naa pon tengtung

ko hna i, Na rumnak rup cun na

ruamkainak cu a ṭhang.

6Mah hihi Bawipa Pathian bia cu a si:

Pathian tluk ah naa ruah caah

7Na cungah ramdangmi kha

ka tlunter hna lai;

Annih cu miphun hna lakah

a puarhrang bik an si i

Na fimnak ṭhaṭha kha vainam in

an sam lai i

Naa porhlawtnak cu leidip lakah

an hrilh lai.

8Na thih nakhnga khor chungah khan

an in nam chih lai i

Rilipi chungah khan thihnak ningzak

na in lai.

9Nangmah an thattu hna nih an in

dir-onh tikah khan,

Pathian ka si, na ti ko rih lai maw?

Nangmah an thattu hna kut chungah

chungah cun, pathian na si lo,

minung na si ko.

10Thazang zeihmanh ngei loin ramdangmi hna kut chungah khan na thi lai. Zeicahtiah keimah nih ka chim cang. Mah hihi Bawipa Pathian bia hrimhrim a si, a ti.

11-12Mah hihi Bawipa nih ka sinah a chimmi bia an si. A ka thawh i, “Mipa, Tair siangpahrang cu hi mithi hla hi lawh law, amah cu hihi Bawipa Pathian bia a si, tiah chim tuah:

Nangmah cu tlinnak leiah zohchun

awk tlak na rak si,

Na fimnak cu a tlingmi a si i

naa dawhnak zong a tling.

13Pathian dum Eden dum chungah

khan na rak um i

Lungvar a phunphun in naa ṭamh:

Naa ṭamhnak lungvar hna cu sardin

le khrisolaih le lunghring le topaz le

karnelian le jasper a hringmi le

lapis lazuli le safaiar le karbankal le

emeral an si.

A ring cherhmarhmi na ṭhi cu sui

an si i

Naa menhmi na hniar hna cu hrin

na si ni i an in serpiakmi kha an si.

14Nangmah cu an cawngtu dingah

a sangmi cherub kan chiahpiak;

Pathian tlang thiang cungah khan

na um i

Mei bantukin sen himhiam in a linmi

lung lakah khan porhlaw ngaiin

naa chawk.

15Na chuah ri in na ṭhat lonak a langh

ni tiang,

Nang cu thil na tuahmi paoh ah

soisel awk zeihmanh na um lo.

16Na chawlehnak kha a ngan tuk cang i

phung zulh duh lonak kha na lung

chungah a khat i a pingah na kal,

Cucaah ningzahnak in Pathian tlang

cung khan kan ṭhumh i

Nangmah cawngtu cherub nih khan

an dawi i,

Mei bantukin sen himhiam in

a linmi lunglak khan an ṭhawl.

17Naa dawhnak nih khan na lung

an puamter i

Upatnak na hmuhmi karhter chinnak

caah na fimnak kha a ping in

na hman.

Vawlei ah khan kan hlonh i

siangpahrang dang zohchun awkah

khika ah khan kan kaltak.

18Chawlehnak ṭhalo na tuahnak ah

khan na sualnak cu a ngan tuk

caah Na hmunthiang kha

na thurhhnawmh hna.

Cucaah na chungah mei kha ka kau i

an kangh.

Mi vialte hmuh awk caah vawlei ah

cun vutcam bangin kan kaltak.

19Miphun hna lak i nangmah an hngaltu

hna kha an khuaruah a har:

Ṭih a nungmi donghnak kha na phan i

a zungzal in na lo lan ko lai,” a ti.

Sidon Cung Bia

20-21Mah hihi Bawipa nih ka sinah a chimmi bia an si. A ka thawh i, “Mipa, Sidon lei khi zoh law a cung i a tlung ding bia hi chim tuah. #Joe 3.4-8; Zek 9.1-2; Mat 11.21-22; Luk 10.13-14 22Mah hihi Bawipa Pathian bia an si, a ti:

Sidon, nangmah cu kan ralchanh i

Na mi hna lakah ka sunparnak cu

ka langhter lai.

Sidon cungah ka biakhiahnak

ka ser tik le

cu ti ka tuahnak thawngin ka thiannak

ka langhter tikah,

Mi nih Bawipa ka si kha an

ka hngalh lai.

23A cungah rai ka tlunter ciammam lai i

A khua chung lam ah thisen

a luang lai;

A khua chung lam ah khan ral kut in

an thi lai i

Vainam nih a kaa kip in a dum

hna lai; Khi tikah mi nih Bawipa ka

si kha an hngalh lai,” a ka ti.

24Israel mi hna nih an pawngkam i a ummi hna nihsawhnak, hling hriahnak le hling chunhnak kha an ing ti lai lo i annih nih Bawipa Pathian ka si kha an hngalh lai.

25Mah hihi Bawipa Pathian bia an si: Israel mi hna cu an i ṭheknak miphun hna chungin ka pumh ṭhan hna tikah, cu thawng cun miphun hna mithmuh ah ka thiannak kha ka langhter lai. Ka sal Jakob ka rak pekmi, an vawlei te ah khan khua an sa lai. 26Khika ah khan lungdai tein an um lai i inn an sak hna lai i mitsur dum an ser hna lai; annih a nihsawhtu hna an pawngkam i a ummi hna cungah khan biaceihnak ka tuah tikah, annih cu lungdai tein an um lai. Cuticun keimah cu Bawipa an Pathian ka si kha an hngalh lai.

Currently Selected:

EZEKIEL 28: HCL06

Highlight

Copy

Compare