EZEKIEL 23
23
Oholah le Oholibah
1 Bawipa bia cu ka sinah a phan i, 2“Mipa, hlanah hin nu pahnih an rak um i an pahnih cun nu khat fa an si. 3Izipt ram ah khan hlawhhlangnu ah an rak i cang i ngaknu an si ko lioah khan cuticun an um; khika ah khan an hnukpar cu an i muaiter hna i an hnuk cu an i thamter hna. 4A upa u cu a min ah Oholah a si i a ngakchia deuh u cu Oholibah a si. Annih cu keimah ta ah an cang i fapa le fanu hna kha an ka hrinpiak. Oholah cu Samaria a si i Oholibah cu Jerusalem a si. 5Oholah cu keimah ta a si ko nain hlawhhlangnu kha aa celh i a duhtu Assiria mi hna, 6ralbawi hna le uktu bawi hna le bawi nganngan hna, an dihlak in aa dawhmi rangcung ralkap a si i rang aa citmi hna kha, a duh hna. 7Assiria tlangval hna lak i pangpar a simi hna sinah khan hlawhhlangnu cu aa celh i an siasal khan aa thurhhnawmh i a duhnak nih a hruainak paoh ah khan a kal. 8Izipt ram i a vung i thiammi hornak lam kha ngol a duh lo, khika ah a no lioah khan pa nih an rak ihpi i a thiangmi a hnuk kha an rak hmehpiak i an rak sual. 9Cucaah a duhmi hna amah a duhtu Assiria mi hna sinah khan ka kaltak. 10Annih nih an tlaihhrem i a fapa hna le a fanu hna kha an lak hna i amah cu vainam in an thah. Amah cu nu lakah ningzak bia ah a cang i a cungah biaceihnak kha tuah a si cang.
11A naunu Oholibah nih khan amah cu aa ngiat i a duhnak le a hornak kha a u nak hmanh khan a zual deuh. 12Amah zong nih cun Assiria mi kha a duh hna, uktu bawi hna le bawi nganngan hna le ralbawi hna, rang cung i an thuam tlingte he aa citmi tlangval rangcung ralkap pa dawhdawh hna kha a duh hna. 13Amah zong cu aa thurhhnawmh cang ti kha ka hmuh; an pahnih tein an zulhmi lam cu aa khat; 14sihmanhsehlaw Oholibah nih khan a sualnak cu hla deuh chinchin a kalpi; 15-16vampang i suaimi pa hmanthlak hna kha a hmuh cangka hna in a duh colh hna i Khaldi ram ah khan lamkaltu a thlah colh hna. Cu hna cu si sen in suaimi Khaldi mi an si, an tai ah taisawm an i sawmh hna i an lu ah a zik a chuakmi ludomh an i domh. An dihlak in bawi ngan si dawh an si i Khaldi rammi taktak Babilon mi kha an lo hna. 17Cun Babilon mi hna cu a ihkhun kha i hrawm awkah a sinah khan an ra i an sualpi i an thurhhnawmh; an nor cikcek tiangin an thurhhnawmh. 18Hlawhhlangnu a si kha a ning a zak lo i a u nih a ka nor bantukin a ka nor cikcek hlantiang aa sualter hna. 19A no lio i Izipt ram i hlawhhlangnu a rak i celh kha philh lo tein a um i atu le atu hlawhhlangnu cu aa celh lengmang ko. 20An hlawhhlangpa kha a duh hna, an chiaṭha cu laa ta bantuk an si i an ci cu rangtum ci bantukin a luan in a luang. 21Cucaah Oholibah, na ngaknut lio i Izipt ram i na hnuk na rak i thamter hna bantuk le na hnukpar na rak i tonghter hna bantuk khan atu ah hornak in na nung ṭhan cang, a ti.
22“Cucaah Bawipa bia cu hihi a si: Oholibah, nangmah an duhtu hna, na luak chuak cikcek in an nortu hna kha na cungah an thin ka hunter hna lai i a kenkip in nangmah cu an in chuahhnawh lai: 23Babilon mi hna le hi Khaldi mi vialte hna le Pekod, Shoa le Koa phun mi hna le an sin i a ummi Assiria mi vialte hna hi, na cungah an thin ka hunter hna lai. Annih cu tlangval dawhdawh, bawi nganngan le uktu bawi hna le ralbawi hna, bawi min thangthang, rangcung i aa citmi an si. 24Nangmah cu raltuknak rang le rangleng le thilphorhnak leng he an in fuh lai, miphun kip chungin lakmi ralkap hna, phawpi le phawte le dar luchin aa chinhmi hna he cun an in fuh lai; a kenkiplo in an in dum lai. Biaceihnak nawl ka pek hna lai i cu nawl cu nangmah cungah cun an hman lai. 25Na cungah ka thinhunnak kha kan chuahhnawh lai i nangmah cu an thinlinhnak kha an in langhhnawh lai. Na hnar le na hna kha an in hleh lai i a donghnak ah vainam in an in thah lai. 26Na hnipuan kha an in phoih dih lai i na hlawn vialte kha an in chuh dih lai. 27Cuticun na zuanzamnak le Izipt ram i hlawhhlannak rian na ṭuan ning kha kan ngolter lai i cu bantuk thil cu zeitikhmanh ah na ngai ṭhan ti hna lai lo i Izipt ram kha na ruat ṭhan ti lai lo.
28“Mah hihi Bawipa Pathian bia an si: Na huatmi hna, na luakchuak cikcek in an nortu hna kut chungah khan nangmah cu kan chanh lai i 29an in huatnak cu an in hngalhter lai. Na hmuhmi thil vialte kha an in chuh lai i hni lo le puan loin an in kaltak lai; hlawhhlangnu naa celhnak pum kha a lang dih lai. Hi thil nangmah cungah a tluntertu hi na zuanzamnak le an hornak hi an si, 30hi bantukin thil a um hi ramdangmi kha na zulh hna i hlawhhlangnu kha naa celh i an siasal in naa thurhhnawmh caah a si. 31Na u ke neh kha na zulh i a hrai cu na kut chungah ka chiah lai.
32Mah hihi Bawipa Pathian bia an si:
Na u nu hrai kha na din lai,
a kau i a thukmi hrai kha;
A chungah cun nihsawhnak le
serhsatnak a khat,
Hrai nih a tlum khawh leng a si.
33Ritnak le ngaihchiatnak in a khat lai i
Rawhnak le ralnak hrai a si lai,
Cu hrai cu na u nu Samaria hrai a si;
Cu hrai cu a ne tiangin na din lai.
34Cun hrai cu cip cikcek in
na khuai lai i
Na hnuk kha a ah dih hna lai.
Mah hihi keimah biakhiahnak a si,
tiah Bawipa Pathian nih a ti.
35Cucaah cun mah hihi Bawipa Pathian bia an si: Nangmah nih na ka philh i na hnulei ah na ka hlonh caah na hornak le na zuanzamnak man cu nangmah nih na in lai,” tiah a ti.
36 Bawipa nih a ka thawh i, “Mipa, Oholah le Oholibah cu bia na ceih hna lai maw? Thil fihnung an tuahmi ruangah khan sualphaw hna. 37Annih nih va cung in pa an i duh i an kut chungah thisen kha a um. Annih nih an siasal sinah khan va cung pa duhnak an tuah i an ka hrinpiakmi ka fale hna kha an siasal hna cu an rawl caah an pekchanh hna. 38Cun hi zong hi ka cungah an tuah rih: ka hmunthiang kha an thurhhnawmh i ka sabbath kha an buar hna. 39Ka hmunthiang chungah khan an lut i an siasal hna pekchanh awkah khan an fapale hna kha an thah hna caah ka hmunthiang cu an buar; mah hihi ka inn chung hrimhrim ah an tuah. 40Ram hlapi in pa kha an sawm hna i lamkaltu nih an sawm hna bangin an ra. Hi pa hna caah hin naa kholh i na mit kha si naa thuh i na hlawn in naa ṭamh i 41a ṭha ngaingaimi ihkhun cungah khan na ṭhu i an hmaiah cun cabuai kha an hun i cu cabuai cungah cun keimah zihmui le chiti kha an chiah hna. 42Thanuam ngaiin a ummi hna cu an au an khuang; cu pin ah mi sawhsawh hna hleiah khan ramlak in an ratpimi hna Sabean mi kha an um ve; annih nih nu hna kut ah khan kutkhih an hruk hna i an lu ah khan pangpar ṭhi dawhdawh an khimh hna. 43Cun ka thawh i, “Va cung pa duh in a tarmi nu khi an sualpi duh ti hnga maw, anih nih tah a zuam ti hnga maw, ka ti. 44Annih nih hlawhhlangnu an luhhnawh bantuk khan an luhhnawh ṭhiam, nu zuangzam Oholah le Oholibah kha cuticun an luhhnawh hna. 45Va cung in pa an i duh ruangah le thisen an chuah ruangah khan miding mipa hna nih cun sual an phawt hna lai, zeicahtiah annih cu va cung in pa aa duhmi an si i an kut chungah thisen a um.
46“Mah hihi Bawipa Pathian bia an si: Ramhtu ralkapbu cu au hna; ṭihnak le ramhnak chungah khan annih cu kaltak hna. 47Ralkap nih khan annih cu lung in chep hna seh law an vainam in sam cikcek hna seh, an fapa hna le an fanu hna kha that hna seh law an inn kha khang dih hna seh. 48Cuticun ram chungin zuanzamnak kha ka thianh lai i annih bantukin zuangzam lo dingah nu dang kha ka cawnpiak hna lai. 49Na zuanzamnak ziaza caah cun dantat na si lai i na siasal hna ruangah cun dantat na si lai, cun keimah cu Bawipa Pathian ka si kha na hngalh lai,” tiah a ti.
Currently Selected:
EZEKIEL 23: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
