EXODUS 31
31
Pathian Umnak Thlam Ca Rianṭuantu Hna
(Exo 35.30—36.1)
1 Bawipa nih Moses cu a thawh i, 2“Judah phun chung mi Hur fapa Uri i fapa Bazalel kha ka thim cang. 3Thil dawh tein ser khawhnak dingah thiamnak le thil ti khawhnak le hngalhnak a ngeih nakhnga Pathian thlarau in ka khahter cang. 4Cun a thiamnak cu hihi a si lai: pungsan dawh ngaiin ser khawh le sui le ngun le dar in ṭamh khawh le 5lungvar in ṭamh khawh le thing kha dawh tein suai thiam le aa dawhmi thil phun dangdang ser khawh kha an si. 6Cun amah sin i a ṭuan ve dingah cun Dan phun chung mi Ahisamak fapa Oholiab kha ka thim cang fawn. Cun zungthiam dang vialte kha thiamnak phunphun ka pek hna i cucaah ser awk tiah kan chimhmi vialte kha an ser khawh hna lai. 7Cu ser awk tiah kan chimhmi cu, pumhnak thlam, biakamnak kuang, cu kuang a cung chin, pumhnak thlam chung thilri hman awk vialte, 8cabuai le a thilri vialte, sui thiang in sermi mei vannak tung le a thilri vialte, zihmui khanghnak biakṭheng, 9khangh thawinak khanghnak biakṭheng le a thilri vialte, kut ṭawlnak hmaihum le a thilri vialte, 10rumra a kai ngaimi thilthuam thiang, Aaron le a fapa han nih tlangbawi rian an ṭuan caan ah an hmanmi, 11thuhnak chiti le hmunthiang ca zihmui, hi an si. Hi thil vialte hi keimah nih kan chimhningte khan an tuah dih awk a si lai,” a ti.
Dinhnak Ni
12 Bawipa nih Moses kha a thawh i, 13“Israel mi cu, ‘Kaa dinh ni hi nan ulh hrimhrim lai, zeicahtiah hi ni cu nanmah le keimah, cun nan tefa le keimah karlak ah hmelchunhnak a si i cu hmelchunhnak nih a langhtermi cu Bawipa keimah nih nannih cu ka mi ca hrimhrim i kan sermi hna nan si hi a si. 14Cucaah cun dinhnak ni cu nan ca i ni zarh ah ser a si cang caah, nan ulh hrimhrim awk a si. A ul lomi cu thah a si hrimhrim lai. Dinh ni i rian a ṭuanmi paoh cu a phun hawi sinin thlei a si hrimhrim lai. 15Ni ruk chung rian nan ṭuan lai, sihmanhsehlaw ni sarih ni cu dinhnak ni, Bawipa ni zarh a si. Hi ni ah rian a ṭuanmi paoh cu thah a si lai. #Exo 20.8-11; 23.12; 35.2; Lev 23.3; Deu 5.12-14 16Israel mi nih dinh ni cu zungzal a hmunmi biakamnak caah nan techin nan fapar tiangin nan ulh lai. 17Hi ni cu Israel mi le keimah karlak i zungzal hmunmi hmelchunhnak a si, zeicahtiah Bawipa keimah nih van le vawlei cu ni ruk chungah ka ser hna i ni sarih ni ah cun ka rian cu ka ngol i kaa din,’ a ti, tiah na chimh hna lai,” a ti. #Exo 20.11
18Sinai Tlang cungah Bawipa nih Moses cu bia a chimh dih tikah, biakamnak lungtlap pahnih, Pathian hrimhrim nih a kutdong in a nawlbia a ṭialnak lungtlap kha Moses cu a pek.
Currently Selected:
EXODUS 31: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
