EXODUS 30
30
Zihmui Khanghnak Biakṭheng
(Exo 37.25-28)
1“Zihmui khanghnak caah biakṭheng pakhat in na ser lai: anri thing in na ser lai. 2Tungvangpalh a si lai i pe khat le a cheu a sau lai i pe khat le a cheu a kau lai i pe thum a sang lai. A ki fong kha a pum he cun an i tlai dih lai. 3A cunglei le a vampang pali le a ki hna cu sui thiang in na hut hna lai. Cun a velchum in sui hri na menh lai. 4A putnak ding caah sui kual pahnih na ser hna lai i a kap veve a cunglei tlang tangah khan na chiah hna lai, a putnak lang hrolhnak kha an si lai. 5Hi lang cu anri thing in na ser hna lai i sui na hut hna lai. 6Biakamnak kuang a chin he a ummi hmai i aa zarmi puanzar hmaiah khan hi biakṭheng cu na chiah lai. Hika hmun hi kan ton hnanak hmun a si lai. 7Aaron nih meiinn kha a zohkhenh hna tikah hi biakṭheng cungah hin zingfate in zihmui kha a khangh lai. 8Cun zanlei i meiinn a van hna zongah khan a khangh fawn lai. Hi zihmui khangh thawinak hi nan tefa chan vialte tiangin ngol loin nan tuah zungzal lai. 9Hi biakṭheng cungah hin khammi zihmui zeihmanh nan khang lai lo, saram khangh thawinak zeihmanh nan khang lai lo i ei awk thawinak zong zeihmanh nan pechan lai lo. Cun din awk thawinak zong zeihmanh a cungah hin nan thle lai lo. 10Kum khat ah voi khat in Aaron nih sual ngaihthiamnak thawinak kha a ki cungah hin a tuah lai. Sualnak ca le sual ngaihthiamnak ca i thawimi saram thisen khan Aaron nih hi biakṭheng caah hin ngaihthiamnak a hmuhpiak lai. Hmailei i a ra ding chan zongah hihi tuah hrimhrim awk a si lai. Hi biakṭheng cu a zarh hringhranmi biakṭheng a si, Bawipa sin i pekchanhmi biakṭheng a si.”
Biakinn Ca Ngunkhuai
11 Bawipa nih Moses cu a thawh i, 12“Israel mi kha na rel hna tikah, mi pakhat nih anmahle an nun man cio kha Bawipa an pek awk a si lai, zeicahtiah milu rel lioah an cungah harnak a tlun sual nakhnga lo, cuticun an pek awk a si lai. 13Milu relnak ah aa telmi paoh nih cun, pek awk a simi zat kha an pek hrimhrim awk a si lai i biakinn i hmanmi cuaithlainak in pekmi cu thlai an si lai. Cu an pekmi cu Bawipa sin pekmi laksawng a si lai. #Exo 38.25-26; Mat 17.24 14Milu relnak i relmi, cucu kum kul le kum kul in a cunglei a simi paohpaoh nih khan pek awk timi zat, shekel cheu cu Bawipa sinah khan an pek hrimhrim lai. 15Nan nunnak man ca Bawipa sinah nan pek tikah, a rummi nih tam deuh in nan pe hlei lai lo; cun sifakmi nih tlawm deuh in nan pe hlei fawn lai lo. 16Hi tangka cu Israel mi sin khan na lak lai i pumhnak thlam chung rianṭuannak caah khan na hman lai. Cu tangka nih cun Bawipa kha Israel mi cu a hngalhter ṭhan hna lai i cu tangka cu nan nunnak ca i nan pekmi kha a si,” a ti.
Kut Ṭawlnak Hmaihum
17 Bawipa nih Moses cu a thawh i, 18“Kut ṭawlnak caah dar hmaihum pakhat na ser lai i a hunnak zong dar in na ser lai. Pumhnak thlam le biakṭheng karlak ah khan na chiah lai i a chungah ti na chiah lai. #Exo 38.8 19Aaron le a fapa hna nih khan cu ti cu an kut le an ke ṭawlnak ah an hman lai. 20Mei in khanghmi thawinak kha Bawipa sin i pekchanh awkah pumhnak thlam chung i an luh ah siseh, tlangbawi rian ṭuan in biakṭheng cu an hei fuh ah siseh, tiin an i ṭawl hmasa ahcun thihnak an huat lai lo. 21An thih sual nakhnga lo an kut le an ke kha an i ṭawl awk a si lai. Hi phung hi anmah le an tefa hna nih zungzal in an zulh awk hnga phung a si,” a ti.
Thuh Awk Chiti le Zihmui
22 Bawipa nih Moses cu a thawh i, #Exo 37.29 23“Zihmui phun ṭha bik kha la hna: mura zihmui a ti pawng kul, a rim a hmui in a hmuimi nakzik pawng hra, a rim a hmuimi fu pawng hra, 24kassia zihmui pawng kul, (hi vialte hi biakinn i hmanmi cuaithlainak in tah an si lai), cun oliv chiti pawng hleihnih. 25Hi vialte hi na cawh hna lai i thuh awkah hmanmi chiti ah na ser hna lai; zihmui sertu nih a sermi zihmui bantuk a si lai i thuhnak ah hmanmi chiti thiang a si lai. 26Cu chiti cun pumhnak thlam le biakamnak kuang le 27cabuai le a cung thilri vialte le mei vannak tung le a thilri vialte le, zihmui khanghnak caah hmanmi biakṭheng le 28khangh thawinak caah hmanmi biakṭheng le a thilri vialte le kut ṭawlnak hmaihum le a hunnak kha, na thuh dih hna lai. 29Cuticun hi thil hi na thianh hna lai i a zarh ngaingaimi thil ah an cang lai; cucaah a tawngmi hna paoh cu thil zarh ah an cang ve lai. 30Cun Aaron le a fapa hna kha chiti cu na thuh hna lai i ka tlangbawi rian ṭuan awkah thianh an si lai. 31Israel mi cu na thawh hna lai i, ‘Hi chiti thiang, thuhnak ca i hmanmi hi nan caah hmailei chanpi tiangin a thiangmi a si lai. 32Mi sawhsawh kha nan toih hrimhrim hna lai lo i hi chiti he aa lomi chiti dang ser awkah hi bantuk cawhmi zong nan hmang fawn lai lo. Chiti thiang a si i cucaah cun a thiang in nan ruah awk a si lai. 33Hi bantuk chiti a sermi siseh, tlangbawi a si lomi thuhnak ca i hi chiti a hmangmi siseh, cu bantuk mi cu a phunhawi sinin thlei an si lai,’ tiah na chimh hna lai,” a ti.
34 Bawipa nih Moses cu, “A tanglei zihmui, stakte, onikha, galbunum le frankinsen thiang kha aa zat cio ah la hna law 35zihmui sertu nih a ser bangin zihmui ser tuah. Cite na thlah lai, a thiangmi le a zarhmi zihmui a si lai. 36A cheu cu dip tein na rial lai, cun a cheu cu pumhnak thlam chung ummi biakamnak kuang hmaiah khan na chiah lai, cuka hmun cu nangmah kan ton lainak hmun a si lai. Hi zihmui cu a zarh hringhranmi zihmui ah na ruah lai. 37Nangmah hman awk caah hi zihmui he aa lomi zihmui kha na ser lai lo. Hi zihmui cu Pathian sinah pekchanhmi zihmui thiang ah na ruah lai. 38Ahohmanh hi bantuk zihmui mah hman awkah aa sermi cu a phunhawi sinin thlei a si lai,” a ti.
Currently Selected:
EXODUS 30: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
