PHUNGCHIMTU 3

Zeipaoh Nih Hin Caan An Ngei Cio

1Zeizong vialte caah hin caan a um cio

i vanrang tang i a ummi thil vialte

nih hin caan an ngei dih:

2Hrin caan a um, thih caan a um;

cin caan a um, phawi caan a um;

3Thah caan a um, damter caan a um;

ṭheh caan a um, sak caan a um;

4Ṭah caan a um, nih caan a um;

ngaihchiat caan a um, lam caan a um;

5Nu le pa si caan a um, si lo caan

a um; i pom caan a um, i pom lo

caan a um;

6Kawl caan a um, thlau caan a um;

chiah caan a um, hlonh caan a um;

7Thleh caan a um, belh caan a um;

dai tein um caan a um,

chim caan a um;

8Huat caan a um, dawt caan a um;

i doh caan a um, i rem caan a um;

9Rianṭuantu nih rethei ngaiin a ṭuanmi

chung hin zeidah a miak a hmuh?

10Pathian nih kan cung i a kan khinhmi rian cu ka hngalh cang. 11Zeizong vialte hi anmahle an caan te a serpiak cio hna; cun hmailei thil hngalh duhnak kha minung kan lungthin chungah a chiah i asinain Pathian nih a tuahmi kha tling tein hngalh khawhnak kha cu a kan pe lo. 12Cucaah minung nih a ṭha bik a tuah khawhmi cu a nun rih lioah i lawmh le a ṭha bik a timi kha a tuah khawh chungin tuah kha a si ko. 13Kan dihlak in ei u sih law ding u sih law kan ṭuan man kha i nuamhpi u sih. Cucu Pathian laksawng a si ko. 14Pathian nih a tuahmi paoh cu zungzal in a hmun ti kha ka hngalh; zeihmanh chap khawh an si lo i zeihmanh zuh khawh zong an si lo; minung nih a hmaiah ṭihnak a ngeih nakhnga Pathian nih cu bantuk cun a tuah. 15A um liomi hi a um cangmi an si dih ko; a um dingmi hi hlanah a rak um diam ding cangmi kha an si; Pathian nih a um ciami thil kha a um ṭhanter lengmang hna.

Vawlei Cungah Dinlonak A Tam Tuk

16Cuhleiah vanrang tangah hin ṭhat lonak nih dinnak le a hmaanmi thil kha an hmun a rolh lengmang hna ti kha ka hmuh. 17Ka lung chungin Pathian nih miding le miṭhalo cu aa khat rep in bia a ceih ko hna lai, zeicahtiah kan hmailei vawlei zong hmanh ah khin zeizong vialte hi anmahle an caan te cio ah an tling cio ko lai, ka ti. 18Minung hi saram nakin zeihmanh kan si hlei lo ti hngalhnak caah Pathian nih minung hi a hneksak hna ti kha ka hngalh. 19A ngaingai ti ahcun, minung le saram hi kan donghnak aa khat ko. Saram cu minung bantukin a thi i minung zong cu saram bantukin a thi ve ko. An pahnih in nunnak thaw a ngeimi an si. Nunnak hi minung caah siseh, saram caah siseh, sullam a ngeih lo caah minung hi saram nakin zeihmanh a si hlei lo. 20An pahnih tein an fuhmi hmun cu aa khat ko — leidip kha a si ko. An pahnih in cuka cun an chuak i an pahnih in cuka ah cun an kir ṭhan lai. 21Minung thlarau cu cunglei ah a kai i saram thlarau cu tanglei ah vawlei ah a lut tiah aho nih dah fiang tein an hngalh khawh lai? 22Cucaah minung nih a ṭha bik a tuah khawhmi cu a ṭuan man a hmuhmi i nuamhpi hi a si ti kha ka hngalh. Cu pinah a tuah khawhmi dang zeihmanh a um lo. A thih hnuah zeidah a hung um te lai ti a hngalh khawhnak lam zeihmanh a um lo.

Currently Selected:

PHUNGCHIMTU 3: HCL06

Highlight

Copy