DANIEL 3
3
Sui Milem Biaknak
1Siangpahrang Nebukhadnezzar nih sui milem pakhat, a san pe sawm kua, a ngan pe kua a simi kha a ser i Babilon ram Dura nelrawn ah cun a dirter. 2Cun mangki, zipeng, vuanthok, upadi thiammi, tangka kengtu, biaceihtu, ram zohkhenhtu bawi le ram ukbawi vialte hna kha, a phunmi milem conglawmhnak i tel awkah cun a cah hna. 3Cuticun mangki vialte, zipeng vialte, vuanthok vialte, upadi thiammi vialte, tangka kengtu bawi vialte, biaceih bawi vialte, ram zohkhenhtu bawi vialte le ram uktu bawi vialte hna cu Siangpahrang Nebukhadnezzar nih a phunmi milem sunlawih awk caah cun an i pum; annih cu Nebukhadnezzar nih a phunmi milem hmaiah cun an dir. 4Khi tikah tlangautu nih khan fak piin a au i, 5“Maw miphun zakip le holh phun zakip hna, nannih nih muko thawng le tingtang thawng le thonglawi thawng le darkhing thawng le tummi phun kip thawng le hlasak thawng kha nan theih tikah nan bawk lai i Siangpahrang Nebukhadnezzar nih a phunmi sui milem cu nan biak lai, tiah nawl pek nan si. 6A bawk lo i a bia lomi paoh cu a alh hluahmahmi meiphu chungah paih nan si lai,” tiah a ti. 7Cu bantukte cun, miphun zakip le holh phun zakip hna nih khan muko le tingtang tummi a phunphun thawng le hlasak thawng kha an theih cangka tein an bawk i Nebukhadnezzar nih a phunmi milem cu an biak.
Judah Mi Pathum Nih An Bia Duh Lo
8Khi tikah Khaldi mi mi cheukhat cu an ra i Judah mi kha sual an phawt hna. 9Nebukhadnezzar Siangpahrang cu an chimh i, “Siangpahrang cu saupi nung ko seh! 10Siangpahrang nih nawlbia na chuah i muko thawng le tingtang thawng le tummi a phunphun thawng le hlasak thawng a theimi paoh nih nan bawk lai sui milem kha nan biak lai, na ti. 11Cu bantukin a tuah lomi paoh cu a alh hluahmahmi meiphu chungah paih an si lai, na ti fawn. 12Sihmanhsehlaw Babilon ram uknak zohkhenhtu ah na chiahmi Judah mi Shadrak, Meshak, le Abednego hna nih cun bawipa na nawlbia kha zei ah an rel duh lo i na phunmi sui milem kha an bia duh lo,” tiah an ti. 13Cu tikah Nebukhadnezzar nih cun a thinhun le a thinlinh in Shadrak le Meshak le Abednego cu va ko hna u, a ti i annih cu siangpahrang hmaika ah an hun chuahpi hna. 14Nebukhadnezzar nih cun a thawh hna i, “Shadrak, Meshak le Abednego, nannih nih ka pathian cu a rian ṭuanpiak nan duh lo i ka phunmi sui milem cu biak nan duh lo, an ti cu biatak a si maw? 15Nannih nih muko thawng le tingtang thawng le tummi a phunphun le hlasak thawng kha nan theih tikah, kan bawk lai i na phunmi milem cu kan biak lai, nan ti ahcun a ṭha ko lai. Sihmanhsehlaw nan biak lo ahcun, a alh hluahmahmi meiphu chungah nannih cu paih nan si colh ko lai; ka ṭhawnnak chungin an chuah khotu hna zei pathian tal a um lai, tiah nan ruat maw?” tiah a ti. 16Shadrak, Meshak le Abednego nih cun Nebukhadnezzar Siangpahrang cu an leh i, 17“Maw siangpahrang, hi kong ah hin kan in leh awk a herhmi a um ti awk zeihmanh kan hngal lo; a alh hluahmahmi meiphu chungin le na kut chungin kan biakmi Pathian nih a kan khamh khawh ahcun, kan khamh ko seh; 18a kan khamh lo hmanh ah na pathian cu kan bia hlei lai lo i na phunmi milem hmai zongah cun kan kun hlei lai lo, ti kha bawipa nangmah nih hngal ko,” tiah an ti.
Meiphu Chungah An Paih Hna
19Khi tikah Nebukhadnezzar cu Shadrak le Meshak le Abednego cungah cun a thin a hung tuk hringhran i a thin a hun tuk caah a hmai zong aa simsawi dih. 20Meiphu cu voi dang nak a let sarih in nan linhter lai tiah nawl a pek hna i a ralkapbu chung i ralkap ṭhawng bikbik hna kha Shadrak le Meshak le Abednego cu nan ṭem hna lai i a alh hluahmahmi meiphu chungah cun nan paih hna lai, tiah a fial hna. 21Cun an tawhrolh le an angki le an luchin he an thilpuan tling tein i hruk in a ummi hna cu an ṭem hna i meiphu alh chungah cun an paih hna. 22Siangpahrang nawl pekmi cu khulrang tuk in a si caah le meiphu cu a linh tuk hringhran caah Shadrak, Meshak le Abednego a cawitu hna cu a hung chuak sualmi meizik nih khan a thah hna; 23cun kha minung pathum, Shadrak, Meshak le Abednego hna cu ṭem buin meiphu alh chungah cun an thlak hna.
24Khi tikah Siangpahrang Nebukhadnezzar cu a khuaruah a har i therphang ngaiin a hung dir. A tlangpi pawl cu a thawh hna i, “Meiphu chung i ṭem buin kan paihmi hna kha pathum an si lo maw?” tiah a ti. Annih nih siangpahrang cu an leh i, “A si hrim hrim ko,” tiah an ti. 25Cun anih nih, “A si kun ahcun zeicahdah meiphu chungah zeihmanh poi loin aa chawkmi mi pali ka hmuh kun hna; cun a palinak cu pathian a lo fawn,” tiah a leh ve hna.
An Chuah Hna I Kainak A Pek Hna
26Nebukhadnezzar nih cun a alh hluahmahmi meiphu a kaa cu a hei naih i mi cu a hei auh hna i, “Shadrak, Meshak le Abednego, Cung Nung Bik Pathian sal hna, hung chuak u law hika ah hin ra tuah u,” tiah a ti hna. Cun Shadrak, Meshak le Abednego cu mei chung cun an hung chuak. 27Khi tikah mangki le zipeng le vuanthok le siangpahrang tlangpi hna cu an i pum i hi mi hna an pum cungah khan ṭhat lonak zeihmanh mei nih a tuah lo ti kha an hmuh; an lu cung samfa fa khat hmanh a kang lo i an thilthuam kha zeihmanh a kangh lo hlei ah mei rim hmanh an nam lo.
28Khi tikah Nebukhadnezzar nih cun aa thawh i, “Shadrak, Meshak le Abednego Pathian cu thangṭhat si ko seh. Amah an i bochan ca i siangpahrang nawlbia hmanh zul duh loin a um i an Pathian hleiah pathian dang biak nakcun mei chung i paih hmanh a duh deuhmi a salle hna cu, khamh awkah Amah nih a vancungmi kha a run thlah. 29Cucaah ahohmanh, mi zei miphun chung mi hmanh si ko uh, cun nan holh zong zei holh hmanh si ai kun, hi hna Shadrak le Meshak le Abednego hna Pathian a serhsatmi paohpaoh cu thlehbaoh dih nan si lai i nan inn kha chuh nan si lai, tiah keimah nih nawlbia ka chuah; zeicahtiah hi bantukin mi a khamh khotu pathian dang zeihmanh an um lo,” tiah a ti. 30Cun siangpahrang nih Babilon ram chungah Shadrak le Meshak le Abednego cu rian ngan deuh ah a kaiter hna.
Currently Selected:
DANIEL 3: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
