DANIEL 2
2
Nebukhadnezzar Mang
1Nebukhadnezzar cu a bawi kum hnihnak ah khan mang pakhat a ngei i a lung a suk tuk caah aa hngilh kho lo. 2Khi tikah siangpahrang nih cun mitlehthiam hna le camhthiam hna le khuachia ṭhawlthiam hna le eihthiam hna kha a kawh hna i ka mang cu a sullam ka chim u, tiah a ti hna. Annih nih an rat i siangpahrang hmaiah an dir tikah khan a thawh hna i, #Gen 41.8 3“Mang pakhat ka manh i cu nih cun ka lungre a ka theih ngaingai. Cu mang a sullam cu hngalh ka duh,” tiah a ti hna. 4Khaldi mi hna nih cun Aramaik holh in an leh i,#2.4 Hika thawk hin angan 7 a dongh tiang Aramaik holh in ṭial a si, Hebru holh a si lo. “Siangpahrang cu saupi nung ko seh! Na manhmi cu kan chim law a sullam cu kan in chimh lai,” an ti. 5Siangpahrang nih cun a leh hna i, “Ka mang le a sullam kha nan ka chimh khawh lo ahcun nan liang vang in kan thleh dih hna lai i nan inn cu tlaih an si dih lai. 6Sihmanhsehlaw nannih nih ka mang cu a sullam he nan ka chimh khawh ahcun laksawng tampi le upatnak kha kan pek hna lai. Cucaah ka mang le a sullam cu ka chim tuah u,” tiah a ti hna.
7Cun annih nih, “Siangpahrang nih na mang cu kan chim law a sullam cu kan in chimh lai,” tiah an leh ṭhan. 8Siangpahrang nih cun aa thawh i, “Nan chimmi hi ka rak ruahning tein a si. Kaa tinhmi ka thanhmi kha a donghnak a si cang ti kha nan hngalh caah, caan rauhter deuh men kha nan i zuam ti kha ka hngalh. 9Mang cu nan ka chimh lo ahcun dantatnak cu nan dihlak in aa khat in pek nan si lai. Cuhleiah, a caan ningin a lung cu aa thleng te lai lo maw tiin keimah cu lih kha chimh awkah lungthin khat in nan um. Cucaah ka mang cu ka chim u, cu cun pei a sullam zong cu nan ka chimh khawh lai ti kha ka hngalh fam lai cu,” tiah a leh hna. 10Siangpahrang cu Khaldi mi hna nih cun an thawh i, “Siangpahrang nih hngalh na duhmi hi vawlei cung khuazeihmanh ah a chim khomi an um lai lo. Siangpahrang ahohmanh nih, a ngan bik le a ṭhawng bik hna hmanh nih, hi bantuk ngelcel in mitlehthiam hna le khuachia ṭhawlthiam hna le Khaldi mi hna kha an ti bal hna lo. 11Bawipa nih nan tuah lai, tiah na kan timi hi a har tuk, a thi khomi minung hna sin i a um lomi pathian hna dah ti lo nih cun, ahohmanh nih an tuah kho lai lo, an ti. 12Hi bia a theih tikah siangpahrang cu a thin aa sum kho ti lo i Babilon ram chung i mifim vialte kha that dih hna u, tiah a ti. 13Mifim vialte cu thah dih awk an si lai tiah nawlbia cu chuah a si i cucaah Daniel le a hawile hna zong kha thah awk i va lak awkah mi an thlah hna.
14Siangpahrang pum ralvengtu bawi Ariok cu, Babilon mifim pawl kha thah awkah aa thawh tikah khan, Daniel nih ralring te le fim tein a va nawl i, 15“Bawipa, nangmah cu siangpahrang aiawhtu na si, zeicahdah hi bantukin siangpahrang nih a donghnak rumro in nawlbia a chuah?” tiah a ti. Ariok nih khan zeizong vialte kha fiang tein a sullam a chimh dih. 16Cucaah Daniel cu siangpahrang hmaiah cun a vung lut i siangpahrang cu a mang sullam kha a chimh khawh nakhnga a caan ka pe rih tuah, tiah a vung nawl. 17Cun Daniel cu inn ah a ṭin i thil umtuning vialte cu a hawile, Hananiah, Mashael le Azariah kha a chimh hna. 18Amah Daniel le annih le Babilon mifim hna kha thah an si nakhnga lo, vancung Pathian kha a zaangfahnak kan nawl awk a si, tiah a ti. 19Cun langhnak in zan ah cu biathli sullam cu Daniel sinah phuan a si i vancung Pathian cu hitihin a thangṭhat:
20Fimnak le ṭhawnnak vialte cu
a ta a si caah
Pathian min cu chan khat hnu chan
khat thangṭhat si ko seh.
21Khuacaan siseh, caan kha siseh,
a thlen lengmang hna,
Siangpahrang kha a ṭhumh hna i
a kaiter hna;
Mifim kha fimnak a pek hna i
a hngalmi kha
hngalhnak vialte cu a pek hna;
22A thukmi biathuk kha a phuan;
mui lakah zeidah aa thup ti kha
a hngalh i ceunak nih amah cu
a kulh.
23Ka pupa hna Pathian, nangmah cu
kaan lawmh i kaan thangṭhat,
Zeicahtiah nangmah nih fimnak le
ṭhawnnak kha na ka pek;
Ka thlacamnak kha na ka leh i
Siangpahrang nih hngalh a duhmi kha
na kan chimh.
A Mang Cu A Sullam He A Chimh
24Cucaah siangpahrang nih Babilon mifim pawl cu thah awkah nawl a pekmipa Ariok sinah khan a va kal i, “Babilon mifim hna cu that rih hna hlah. Siangpahrang hmaiah ka chuahpi law atu cu a mang sullam kha ka chimh lai,” tiah a ti. 25Ariok nih cun therphang lengmang in Daniel cu siangpahrang hmaiah cun a hei chuahpi i, “Judah mi saltangmi hna lakah hin na mang a sullam an chim khotu ding pakhat ka hmuh cang,” tiah a ti. 26Khi tikah siangpahrang nih Daniel cu a thawh i, “Ka mang i ka hmuhmi kha zeidah a si le a sullam cu na ka chim kho lai maw?” tiah a ti. (Daniel cu Belteshazzar ti zongah ti a si). 27Daniel nih cun siangpahrang cu a leh i, “Siangpahrang nih hngalh a duhmi biathli cu mifim ahohmanh nih si hna seh, khuachia ṭhawl thiam ahohmanh nih si hna seh, mang ihthiam ahohmanh nih si hna seh, na sinah an phuang kho lai lo. 28Sihmanhsehlaw vancung ah khin biathli a phuang khotu Pathian pakhat a um i amah nih cun Siangpahrang Nebukhadnezzar cu hmailei ah zei thil dah a um lai, ti kha an chimh cang. Mah hihi na mang, naa hngilh lioah langhnak na hmuhmi cu a si: 29Maw siangpahrang, na ihkhun cung i na ih lioah hmailei thil kong kha na manh i biathli a phuang khotu Pathian nih zeidah a um dingmi thil cu an si kha an hmuhsak. 30Hi biathli keimah sinah phuan a sinak cu, keimah cu minung vialte lakah ka fim bik caah a si lo, sihmanhsehlaw siangpahrang nih na lung chungah a lutmi ruahnak cu na hngalh khawh nakhnga le a sullam na fian khawh nakhnga caah a si.
31“Khua na cuanh lioah, maw siangpahrang, milem nganpi pakhat na hmuh. Hi milempi cu a ngan ngaingaimi a si i cer dekduk piin a um i na hmaiah cun a dir zengzung ko i zoh ah khin ṭihnungpi a si. 32Cu milem lu cu sui thiang a si, a ṭang le a ban cu ngun an si, a paw le a phei cu dar an si, a ke cu thir an si, a kepha cu a cheu thir, a cheu tlak an si. 33-34Na zoh ko lioah cun, minung kut i cawhmi a si lomi lung pakhat tlang cungin a rung ril i milempi cu thir le tlak aa cawhmi a ke ah khan a den ciammam i a kuai dih. 35Khi tikah thir le vawlei le dar le ngun le sui cu an i cheu an i hmal dih cikcek i ṭhal caan i phuhri i favai cu thli nih a choih hna bantuk khin an choi dih i an lohnak zawn hmanh hngalh an si lo. Sihmanhsehlaw milem a dengtu lungpi cu tlang nganpi ah a cang i vawlei vialte kha a khat dih.
36“Cucu na mang cu a si. Atu cu siangpahrang kha na mang sullam kha kan chimh lai. 37Maw siangpahrang, nangmah cu siangpahrang hna siangpahrang na si i vancung Pathian nih siangpahrang ah cun an canter i ṭhawnnak le nawlngeihnak le sunparnak an pek cang; 38nangmah na kut chungah minung siseh, saram siseh, van i a zuangmi va si hna seh, a chiah hna i khuazei ka i an um hmanh ah an dihlak cung i nawl ngeih khawhnak ding cu nangmah cu an pek — cu sui lu cu nangmah na si. 39Nangmah hnuah hin pennak pakhat a hung chuak lai i cucu nangmah pennak nakin a nauta deuhmi a si lai, cun pennak pathumnak a hung chuak rih lai i cu pennak cu dar pennak cu a si lai i cu nih cun vawlei cung dihlak a uk lai. 40Cun pennak palinak a um lai i thir bantukin a ṭhawng lai; thir nih zeizong vialte a den a hrawh dih bantukin cu nih cun hmasa pennak vialte kha a khuai a den dih hna lai. 41Cun a kepha hna le a kedong hna cu a cheu umsertu tlak, a cheu thir an si zong kha na hmuh fawn. Cu a sullam cu cu pennak cu aa ṭhenmi pennak a si lai. Thir cu tlak he aa cawh caah khan ṭhir ṭhawnnak a tlawmpal cu a ngei lai. 42A kedong cu a cheu thir, a cheu tlak an si bantuk khan, cu pennak cu a ṭhawng lai nain fawi tein den khawh a si lai. 43Thir cu tlak he aa cawh zong kha na hmuh fawn. Cu bantuk cun ram uktu hna nih cun i ṭhitumhnak in pakhat le pakhat i fonh kha an i zuam lai, sihmanhsehlaw thir cu tlak he aa fonh khawh lo bantukin an i fonh kho ve lai lo. 44Cu siangpahrang hna chan ah cun vancung Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai. 45Ahohmanh tawngh loin zeitindah lungpi cu lungpang cungin a rung rilh i thir le dar le tlak le ngun le sui in sermi milempi cu a den ti kha na hmuh. A liannganmi Pathian nih siangpahrang Bawipa cu hmailei ah zeidah a tlung lai ti kha an chimhnak a si. Na manhmi hrimhrim cu kan chimhmi hi a si i a sullam taktak kha kan pek cang,” tiah a ti
Daniel Laksawng
46Khi tikah Siangpahrang Nebukhadnezzar cu a bawk i Daniel kha a biak i amah cu raithawinak le rimhmui khanghnak kha nan pekchanh lai, tiah nawl a pek hna. 47Cun aa thawh i, “Nan pathian hi pathian hna Pathian le siangpahrang hna cung i Siangpahrang a si taktak, amah cu biathli a phuangtu a si i cucaah nangmah nih hi biathli cu na phuan khawh,” tiah a ti. 48Siangpahrang nih cun Daniel cu rian kainak a pek i laksawng man sungsung tampi a ṭhenh i Babilon ram vialte uktu le Babilon mifim vialte hna haotu bik ah a ser. 49Cuhleiah Daniel nih a nawl bantukin siangpahrang nih cun Shadrak, Meshak le Abednego cu Babilon ram uktu ah a ser hna. Sihmanhsehlaw Daniel tu cu siangpahrang inn ah khan a um.
Currently Selected:
DANIEL 2: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
