AMOS 9
9
Israel Cung Biaceihnak
1 Bawipa cu biakṭheng pawng i a dir
kha ka hmuh i hi bangin a ti:
“Innleng kha aa hninh dih nakhnga
tung par kha tu tuah hna,
Cun cuka i a ummi hna cu an lu ah
a tlak hna nakhnga kuai cikcek in
deng hna.
An dih cikcek tiangin vainam in
ka thah hna lai.
Ahohmanh a luatmi an um lai lo,
A tangmi him tein a ummi zong
an um lai lo;
2Sheol i an vung kal hmanh ah,
Khika hmanh cun ka kut nih a vun
hnuh hna lai;
Vancung i an kai zongah,
Khika hmanh cun ka va ṭhumh
hna lai.
3Karmel tlangpar zongah i thup hna
hmanh seh law
Khika zongah cun ka kawl hna lai i
ka char hna lai;
Rili a thuhnak hmun ka mit hmuh
lonak zongah i thup hna
hmanh seh law
Khika zongah cun rili chung rulpi kha
seh hna tiah ka fial lai.
4An ral hna nih sal ah a bubu in
an hruai hna zongah,
Khika zongah cun vainam kha that
hna ka ti ṭhiamṭhiam lai;
An ṭhatnak ding caah si loin
a chiatnak ding caah
An cungah ka mit kha ka chiah
peng ko lai.
5Bawipa ralkapbu Pathian nih vawlei
kha a tawngh i a ti dih,
A cung i a ummi vialte cu an ro dih;
Nail tiva lian bantukin vawlei cu
a tho i
Izipt Tivapi bantukin a ṭum ṭhan.
6Pathian nih a hlei cu van tawng in
a ser hna i
Van cu vawlei cungah siling bantukin
a khuh;
Pathian nih cun rili ti cu a kawh hna i
vawlei cungah a thlet hna.
Amah a min cu Bawipa a si.
7Israel mi hna, nannih cu ka caah
Kush mi bantuk nan si lo maw?
Israel mi cu Izipt ram in,
Filistin mi cu Kaftor ram in,
Aramean mi hna cu Kir ram in
ka hunpi hna lo maw?
8Zohhmanh, Bawipa Pathian nih hi
a sualmi pennak cungah hin ka mit
ka chiah i,
Vawlei cung hin ka hloh lai,”
tiah a ti.
A Tangmi A Zuah hna Lai I An Kir Ṭhan Lai
Asinain Jakob tefa hna cu an ci an ruang in ka hlo hna lai lo, tiah Bawipa nih a ti.
9Keimah nih nawlbia kha ka chuah
lai i
Miphun vialte hna lakah khan
Israel mi cu ka vamh hna lai,
Mi nih fingrilh an rilh i cu fingrilh
chungin lungtekem pakhat hmanh
vawlei ah a tlak lo bantukin
Israel mi cu ka rilh hna lai.
10Ka mi hna lak i misual,
‘Vanchiatnak cu kan pawng
na phakter lai lo i a ton zong na kan
tonter lai lo,’ a timi hna cu
vainam in an thi lai.
11Khi ni ah cun a tlu cangmi David
thlam cu ka tun ṭhan lai;
A vampang a awnnak hna cu ka phih
hna lai i
A rawhnak hna cu ka remh ṭhan
hna lai;
Hlanlio i a rak siningte ah khan
ka ser ṭhan lai i
12Edom ram a tangmi le ka min in
auh a rak simi miphun vialte kha
an co hna lai.
Mah hihi Bawipa bia hrimhrim a si i
amah nih cun a tuah lai.
13Hi bangin Bawipa nih a ti:
“Lei thuangtu nih rawl ṭuantu
a zulh colh le
Mitsur hang a nengtu nih a ci
a tuhtu a zulh colh caan kha
a ra lio.
Tlang cung khan mitsur hang thar
an luang thluahmah lai i
Tlang kip cu rawl kung in
an i hnin dulmal lai.
14Ka mi Israel mi hna cu an vanṭhatnak
kha ka pek ṭhan hna lai;
Chuahtak ciami khua kha an ser ṭhan
hna lai i an umhnawh ṭhan hna lai,
Mitsur dum kha an ser hna lai i
mitsur hang kha an din hna lai,
Dum kha an ser hna lai i an theitlai
kha an ei hna lai.
15Anmah cu anmahle an vawlei te
ah khan ka phun ṭhan hna lai i
Ka pekmi hna vawlei khan
zeitikhmanh ah phawi an si ṭhan
bal ti lai lo, tiah
Bawipa nan Pathian nih a chim.”
Currently Selected:
AMOS 9: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006