AMOS 8
8
1Bawipa Pathian nih a ka hmuhtermi cu hihi a si: Ṭhal caan thei bawm pakhat a um i, 2“Zeidah na hmuh, Amos?” tiah a ka ti. Cun kei nih ka thawh i, “Ṭhal caan thingthei a hminmi#8.2 Hebru holh ah hmin ti le dongh ti hi a aw aa lo dengmang i Israel mi hna caah caan cu a hmin cang, ti a si. bawm pakhat,” tiah ka ti. Cun Bawipa nih cun a ka thawh i, “Ka mi Israel mi hna caah caan cu a hmin cang. Zeitikhmanh ah ka ngaithiam ṭhan ti hna lai lo. 3Khi ni ah cun siangpahrang inn i hla a sa tawnmi nu hna kha a ai in an ai lai i, ‘A kenkip ah miruak tam tuk an hlonh liangluang ko hna. Hnachet loin um u,” an ti lai,” tiah a ti.
4“Sifakmi kha a rialchih i retheimi kha a ramhmi hna, hihi ngai tuah u; 5nannih nih nan i thawh i, ‘Zeitik ah dah thla thar puai cu a dih lai i kan rawl cu kan zuar lai? Zeitik ah dah sabbath cu a dih lai i kan changvut kha zuar awkah kan chuah lai,’ nan ti. Cun ephah kha hmetter deuh u sih law shekel kha nganter deuh u sih; cun cuailung kha zanter deuh u sih; 6cun sifakmi kha ngun in caw hna u sih law retheimi kha kedan tuah khat caah tlai hna u sih, nan ti fawn. Cucaah hihi ngai tuah u: 7Bawipa nih Jakob lianhngannak in chiat a ser cang: An tuahmi kha ka philh bal lai lo, a ti.
8Hi ruangah hin vawlei hi i hnin loin
a um kho hnga maw?
A cung i a ummi vialte hna cu
ngaihchia loin
an um kho hnga maw?
Ram cu a pumpi in Nail tiva lian
bantukin a tho lai i
Izipt Tivapi bantukin a hlonh in
aa hlonh lai.
9 Bawipa nih hi bangin a ti:
Khi ni ah cun ni kha chun ah
ka tlakter lai i
Vawlei kha chun lingpi ah
ka muihter dup lai.
10Nan puai cu ṭahnak ah ka ser hna lai i
Nan hla hna cu mithi ngaihnak hla ah
ka canter hna lai.
Nannih cu nan dihlak in buri kha
kan kaihter hna lai i nan lu kha
kan kawngh dih hna lai.
Fapa ngeih chunte a thih i an ṭah
bantuk ah khin nan puai cu
ka ser lai,
A donghnak cu a khaat in a khami
ni a si lai.
11Cun Bawipa nih hi bangin a ti:
Ram chungah mangṭam,
Rawl ca i mangṭam si loin le ti ca i
tihal si loin,
Bawipa bia theih duh ca i mangṭam cu
ka tlunter lai ni a ra lio.
12Mi cu Bawipa bia kawl ah rili in rili
tiang an kal lai i
Chaklei in nichuahlei tiang an kal lai,
Sihmanhsehlaw an hmu lai lo.
13Khi ni ah cun ngaknu dawhdawh hna
le tlangval hna cu tihal in an baa lai;
14Cun Samaria pathiannu Ashimah in
chiat a ser i,
‘Maw Dan, na pathian nunnak in
chiat ka ser,’ a ti i
‘Beersheba lei lam tiangin
chiat ka ser,’ a timi vialte cu
Tho ti lo dingin an tlu lai.
Currently Selected:
AMOS 8: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006