1 SAMUEL 3
3
Pathian Nih Samuel A Auh
1Cun ngakchiapate Samuel cu Eli tangah Bawipa rian kha a ṭuan lengmang ko. Cun cu caan lioah cun Bawipa bia kha a tlawm ngaingai; langhnak kha a um set lo.
2Cun khi caan lioah, a mit khua hmuh lo hram aa thawk cang caah khua a hmu kho set ti lomi Eli cu amah hmun ah khan a it; 3Pathian meiinn cu a mit rih lo i Pathian kuang a umnak Bawipa biakinn chungah khan Samuel cu a it. 4Cun Bawipa nih, “Samuel! Samuel!” tiah a kawh i anih nih, “Hika ah hin ka um!” tiah a ti. 5Cun Eli sinah cun a va tli i, “Hika ah hin ka um, na ka kawh caah,” tiah a ti. Sihmanhsehlaw anih nih, “Kan ko lo, va it ṭhan ko,” tiah a ti. Cucaah a kal i a it. 6Cun Bawipa nih, “Samuel!” tiah a auh ṭhan. Cun Samuel cu a tho i Eli sinah a va kal i, “Hika ah hin ka um, na ka auh caah,” tiah a ti. Sihmanhsehlaw anih nih, “Kan au lo, ka fapa, va it ṭhan ko,” tiah a ti. 7Samuel nih cun Bawipa kha a hngal rih lo i Bawipa bia kha a sinah phuan a si rih lo. 8Cun Bawipa nih Samuel cu a voi thumnak a kawh ṭhan. Cun a tho i Eli sinah khan a va kal i, “Hika ah hin ka um, na ka auh caah,” a va ti. Bawipa nih ngakchiapa kha a auh tiah khi tikah Eli nih a hun hngalh. 9Cucaah Eli nih Samuel sinah cun, “Va kal law, va it ṭhan ko; cun an kawh ṭhan ahcun, ‘Chim tuah, Bawipa, zeitintiah na salpa nih a theih ko,’ tiah na ti lai,” tiah a ti. Cucaah Samuel cu a kal i a umnak ah khan a va it ṭhan.
10Cun Bawipa cu a ra i a rung dir i voi dang bantuk khan, “Samuel! Samuel!” tiah a auh. Cun Samuel nih, “Chim ko, zeitintiah na sal nih a theih,” tiah a ti. 11Cun Bawipa nih Samuel sinah cun, “Zohhmanh, Israel chungah hin, a theitu paoh an hna a pahnih in a khenh lai dingmi thil pakhat ka tuah dengmang cang. 12Khi ni ah a innchungkhar kong i ka chimmi vialte, a hramthawk in a donghnak tiang, Eli cungah ka tlinter lai. 13A fapa hna nih Pathian an vawlhpamhnak sualnak kha a hngal ko nain a thlauh hna lo caah, a innchungkhar cu zungzal ca in dantatnak ka pek dengmang cang, tiah amah kha ka chimh. 14Cucaah Eli innchungkhar hna cu raithawinak in siseh, pekchanhnak in siseh, sualthianhpiak khawh, zungzal in an si lai lo, tiah Eli innchungkhar hna sinah cun chiat ka ser cang,” tiah a ti.
15Samuel cu zinglei tiang a it; cun Bawipa inn i innka hna kha a hun hna. Cun Samuel nih kha langhnak kha Eli chimh cu a ṭih. 16Sihmanhsehlaw Eli nih Samuel cu a kawh i, “Samuel, ka fapa,” tiah a ti. Cun anih nih, “Hika ah hin ka um,” tiah a ti. 17Cun Eli nih, “An chimhmi cu zeidah a si? Ka sinin thup hlah. An chimhmi vialte chungah khan zeihmanh ka sinin na thuh ahcun, Pathian nih na cungah cu bangin le tam deuh in tuah ko seh,” tiah a ti. 18Cucaah Samuel nih zeizong vialte a chimh dih i a sinin zeihmanh a thup lo. Cun anih nih, “Mah cucu Bawipa a si; a ṭha tiah a timi cu tuah ko seh,” tiah a ti.
19Cun Samuel cu a ṭhang i Bawipa cu a sinah a um i a bia kha pakhat hmanh vawlei ah a lohlakter lo. 20Cun Israel mi vialte nih, Dan in Beersheba tiang, Samuel cu Bawipa profet ah fehter a si ti kha an hngalh dih. 21Cun Bawipa cu Shiloh ah a lang ṭhan, zeicahtiah Bawipa cu Samuel sinah Shiloh ah khan Bawipa bia in aa langhter.
Currently Selected:
1 SAMUEL 3: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
