1 SAMUEL 2
2
Hannah Hla
(Luk 1.46-58)
1Cun Hannah nih thla zong a cam i,
“Bawipa cungah ka lung aa lawm;
Bawipa thawngin ka thazang cu
hlorh a si.
Na khamhnak ah khan kaa lawmh caah,
Ka ral hna cu ka kaa nih a nihsawh hna. #Luk 1.46-55
2“Bawipa bantukin a thianghlim
ahohmanh an um lo
Nangmah hleiah ahohmanh an um lo;
Kan Pathian bantuk lungpi zong
an um lo.
3Ninghngal tuk in
bia chim ti hlah u,
Ruamkainak cu nan kaa chung in chuak hlah seh;
Zeitintiah Bawipa cu fimnak Pathian
a si,
Amah nih tuahnak hna kha an khing
a thlai tawn hna.
4A ṭhawngmi an likuk cu an kiak,
Sihmanhsehlaw a derthawmmi nih thazang an i hruk.
5A khim tawnmi cu rawl kawl ah
kuli an ṭuan,
Sihmanhsehlaw a ṭam tawnmi cu
an ṭam ti lo.
A cingmi nih pasarih a hrin cang hna.
Sihmanhsehlaw fa tampi a ngeimi kha cihai in a um.
6 Bawipa nih a thah tawn hna
a nun zong a nunter tawn hna.
Sheol ah a kalter tawn i a chuah zong a chuahter tawn hna.
7 Bawipa nih a pamter tawn hna i
a rumter tawn hna;
A ṭhumh tawn hna i a hlorh zong
a hlorh tawn hna.
8Bawi hna sinah ṭhutter awk le
Upatnak ṭhutdan coter awk caah,
Sifakmi kha leidip lak in
a thawh hna i
Retheimi kha vutcam pumhmi lak in a cawi hna.
Zeitintiah vawlei tung hna cu Bawipa ta an si i
An cungah vawlei cu a chuan.
9“A mithiang hna an ke kha a ven lai;
Sihmanhsehlaw miṭhalo cu khuamui lakah hrawh an si lai;
Zeitintiah mi nih teinak an hmuhnak
cu zaang ṭhawnnak in a si lai lo.
10 Bawipa a raltu cu kek cikcek in
den an si lai;
Annih cu van in khuarit in a rithnawh hna lai.
Bawipa nih vawlei cung dihlak
bia a ceih lai,
Amah siangpahrang cu ṭhawnnak
a pek lai,
Chiti a thuhmi lianhngannak cu
a hlorh lai,” tiin a ti.
11Cun Elkanah cu Ramah khua ah inn ah a tlung. Cun ngakchiapa cu tlangbawi Eli hmaiah Bawipa rian kha a ṭuan.
Eli Fapa Hna Sualnak
12Cun Eli fapa hna cu mizeiruaramlo an si; Bawipa kha an hmaizah lo. 13Mi zapi hna sinah tlangbawi nih an tuah tawnmi phung cu hi bangin a si, mi pakhatkhat nih raithawinak a pekchanh tikah tlangbawi sinum kha a ra lai i sa cu a tlawh hluahmah lioah a kut i a rak i putmi keuṭe ṭe thum ngei khan 14ukang chungah khan siseh, marlei chungah khan siseh, tawngca chungah khan siseh, um chungah khan siseh, a vun chunh lai i fungṭe nih a thur khawh zat paoh kha tlangbawi nih amah caah aa lak lai. Cu bantukin Shiloh ah khan, cuka i Israel mi a rami vialte hna kha an rak tuahpiak tawn hna. 15Cuhleiah, a thau kha an khangh hlanah, tlangbawi sinum kha a ra tawn i rai a thawi liomi sinah cun, “Tlangbawi ca i em awkah na sa cu ka pe; zeitintiah a hring dah ti lo cu, chuan ciami sa cu an cohlang lai lo,” tiah a ti tawn. 16Cun mipa nih khan a sinah cun, “A thau kha khaang hmasa rih hna seh, cun na duh zat in naa lak lai,” a ti ahcun, anih nih, “Asilo, atu hrimhrim ah na ka pek lai, cu ti a si lo ahcun, hramhram in keimah nih ka lak lai,” a ti tawn. 17Cu bangin tlangval hna sualnak cu Bawipa mit hmuh ah khan a ngan ngaingai ko, zeicahtiah annih nih Bawipa sin pekchanhnak kha zawmhtaih serhsat in an tuah.
18Asinain Samuel cu ngakchia si hmanh seh law Bawipa hmaiah la hmang ṭhia tlangbawi angki i aih in rian a ṭuan. 19Cun a nu nih angkifual hmete a serpiak tawn i kumfate an raithawinak pekchanh awk i a va he an hung kal tikah, kum fate in a hei phorh tawn. 20Cun Eli nih Elkanah le a nupi cu thluachuah a pek hna i, “Bawipa sin i a hlanhmi thawng hin, hi minu hin Bawipa nih fa in pe hna seh,” tiah a ti; cun annih cu an inn leiah an tlung ṭhan.
21Cun Bawipa nih Hannah cu a vung ven i fa a pawi i fapa pathum le fanu pahnih a hrin hna. Cun ngakchiapate Samuel cu Bawipa hmaika ah cun a ṭhang.
22Eli cu a tar ngaingai cang i Israel mi vialte hna cungah a fapa hna nih an tuahmi vialte le zeitindah tonnak thlam luhnak i rian a ṭuantu nu hna an ihpi hna kha a theih. 23Cun amah nih annih cu, “Zeicahdah mah bantuk thil hna cu nan tuah? Zeitintiah mi vialte sin hin nan tuahnak ṭhalo hna cu ka theih. 24Asilo, ka fale hna, Bawipa mi hna nih a kenkip i an chim lulhmalhmi thawng cu thawng ṭha a si hrimhrim lo. 25Mi nih mi cungah a sual ahcun Pathian nih remnak a serpiak lai, sihmanhsehlaw mi nih Pathian cungah a sual ahcun, aho nih dah a nawlpiak ti lai?” tiah a ti. Sihmanhsehlaw a pa bia cu an ngai duh lo; zeitintiah annih thah awk kha Bawipa duhnak a si.
26Cun ngakchiapate Samuel cu pum in siseh, Bawipa le minung duhning in siseh a ṭhang lengmang. #Luk 2.52
27Cun Eli sinah Pathian mi pakhat a ra i amah sinah cun, “Hi bangin Bawipa nih a ti, Izipt ram i Farote chung sal i an um lioah khan, na pa chungle hna sinah keimah hrimhrim kaa langhter. 28Cun amah cu ka biakṭheng i hung kal awk le zihmui khangh awk le keimah hmai i tlangbawi angki i hruk awkah, Israel mi phun vialte chungin ka tlangbawi si awkah ka thim; cun na pa chungle hna sinah cun Israel mi sinin ka hmuhmi mei in khanghmi pekchanhnak vialte kha ka pek. #Exo 28.4; Lev 7.35-36 29A si kun ahcun zeicahdah ka umnak ah pekchanh awk tiin nawl ka pekmi ka raithawinak hna le pekchanhnak hna cu hakkauh mit in nan zoh i keimah nakin na fapale hna cu na upat deuh hna i ka mi Israel mi nih an pekchanhmi thil lak i a ṭha bik hna cun nan i cenh? 30Cucaah Bawipa Israel Pathian nih, “Na chungle hna le na pa chungle hna cu zungzal in ka hmaiah an lut an chuak lai,” tiah ka rak ti taktak, sihmanhsehlaw atu cu Bawipa nih hitin a thanh: A si naisai ti lai lo, zeitintiah a ka upatmi cu ka upat hna lai i a ka zawmtaimi cu zei ah ka rel hna lai lo. 31Zohhmanh, na ban le na pa innchungkhar ban ka tan lai ni cu a ra lio, cucaah na chungle lakah tar tlung in a nungmi an um lai lo. 32Cun Israel mi cungah pek a si laimi rumnak cu lungrethei in le hngarnak mit in na zoh lai i na inn chungah zeitikhmanh ah tar tlung in a nungmi pakhat hmanh an um lai lo. 33Ka biakṭheng in ka hlonh lai lo ding na mi cu na mit zettertu le na lungretheihtertu ah zuah a si lai i na inn chungah hrinmi fa vialte cu vainam in an thi lai. 34Cun na fapa pahnih Hofni le Phinehas cungah a tlung lai dingmi hi nangmah caah hmelchunhnak a si lai: an pahnih tein ni khatte ah an thi lai. #1Sam 4.11 35Cun keimah hrimhrim nih zumhawktlak tlangbawi pakhat, ka lung chung le ka ruahnak chungah a ummi ningin a tuahtu ding cu ka chuahter lai; cun amah cu a fekmi innchungkhar ka sakpiak lai i ka chiti thuhmi hmaiah a zungzal in a lut a chuak lai. 36Cun na inn i a tangmi paohpaoh nih ngun phar khat caah siseh, changreu tlang khat caah siseh, amah kha nawl awkah an ra lai i, ‘Changreu tlawmte tal ka ei nakhnga, tlangbawi rian zei tal ah dik ka chia ko sawh,’ tiah an ti lai, a ti,” tiah a ti.
Currently Selected:
1 SAMUEL 2: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
