1 SAMUEL 18
18
Jonathan le David Biakamnak
1Saul sinah bia kha a chim dih tikah, Jonathan nunnak cu David nunnak ah aa ṭhitchih i Jonathan nih amah nunnak aa dawt tluk khan a dawt. 2Cun cu ni cun Saul nih khan a lak i a pa inn ah kirter a siang ti lo. 3Khi tikah Jonathan nih David sinah khan biakamnak a ser, zeitintiah amah nunnak bantukin a dawt. 4Cun Jonathan nih aa aihmi puan kha aa phoih i David kha a pek, a ralthuam le a vainam le a likuk le a taisawm zong. 5Cun David cu Saul nih a kuatnak paoh ah khan a hlawhtling; cucaah Saul nih ralkap hna haotu ah khan a ser. Cun mah hihi mi vialte mithmuh le Saul sinum hna mithmuh zongah khan thil ṭha a si.
Saul Nih David A Nahchuah
6Inn lei i an tlun lio, David nih Filistin mipa a thahnak in a kir tikah khan, Israel khua vialte in nu hna kha, hlasak pah le lampah in Siangpahrang Saul kha, khuang tete le lawmhnak hla le aw dawh tumnak hna he rak don awkah an chuak. 7Cun nu hna cu lawmhnak an tuahpah khan hla in an i chawn i,
“Saul nih a thong thong in a thah hna,
David nih a sang sang in,”
tiah an ti. #1Sam 21.11; 29.5 8Cun Saul cu a thin a hung ngaingai i hi chimnak nih hin a lawmh loter ngaingai; aa thawh i, “David vial cu a sang sang that ah an rel i kei tu cu a thong thong that ceo ah an ka rel; pennak hi dah ti lo cu zeidah cu hleiah a ngeih ding a um ti?” tiah a ti. 9Cun cu ni thawk in Saul nih David cu a ngiat ziar.
10Cun a thaizing ah thlarau ṭhalo Pathian sinin a rami kha Saul cungah a tlung i David nih ni khat hnu ni khat a tum tawn bang khan tingtang kha a tum lioah, a inn chungah molh bia kha a chim lengmang ko. Saul nih a fei kha a kut in aa put i 11“David kha vampang ah hlinh chih ning,” tiah a ti i fei khan voi hnih a khawh. Sihmanhsehlaw David nih amah kha voi hnih a pianh manh.
12Saul nih David kha a ṭih; zei-cahtiah amah sinah khan Bawipa a um, sihmanhsehlaw Saul kha cu a chuahtak cang. 13Cucaah Saul nih amah sin khan a ṭhial i thong khat haotu ah a ser i mi zapi hmaiah khan a chuak a lut lengmang. 14Cun Bawipa kha amah sinah a um caah David cu a thil tuahmi vialte ah a hlawhtling. 15Cun Saul nih a hlawh a tling ngaingai ti kha a hmuh tikah amah kha a zeuh ngaingai. 16Sihmanhsehlaw Israel mi vialte le Judah mi vialte nih David kha an duh; zeitintiah amah cu annih hmaiah a chuak a lut lengmangmi a si.
17Cun Saul nih David cu, “Hika ah hin ka fanu upa deuh Merab a um ko; nupi caah kan pek lai; keimah caah na ral bel ṭha ko law, Bawipa raldohnak cu do ko hna,” tiah a ti. Zeitintiah Saul nih, “Keimah kut cun thi hlah seh, sihmanhsehlaw Filistin mi hna kut tu in thi deuh seh,” tiah a ruah. 18Cun David nih Saul sinah cun, “Keimah cu ahodah ka si i ka rualchan Israel mi lak i ka pa innchungkhar cu ahodah an si, siangpahrang tupa ka si hnga cu?” tiah a ti. 19Sihmanhsehlaw Saul fanu Merab cu David he ṭhitter awk caan ah khan, Meholah mi Adriel sinah nupi caah a pek.
20Saul fanu Mikhal nih David kha a duh i cucu Saul kha an chimh i cu nih cun a lung a lawmhter. 21Saul nih, “Amah cu a caah rap a si nakhnga le Filistin mi hna kut cu amah dotu a si nakhnga, amah cu pe ning,” tiah a ruah. Cucaah Saul nih David cu a voi hnihnak a chimh i, “Atu cu ka tupa na si lai,” tiah a ti. 22Cun Saul nih a sinum hna cu, “David sinah a thli tein, ‘Zohhmanh, siangpahrang nih nangmah cungah lawmhnak a ngei i a sinum vialte nih an in dawt; cucaah siangpahrang tupa cu si cang ko,’ tiah nan chim lai,” tiah nawl a pek hna. 23Cun Saul sinum hna nih hi bia cu David hna theih ah an chim. Cun David nih, “Keimah bantuk misifak le aho zei rel a tong lomi caah hin, siangpahrang tupa si hi thil hmetuai ah dahra nan rel hi?” tiah a ti. 24Cun a sinum hna nih khan Saul cu, “David nih, cuti'n, khati'n, a ti,” tiah an chimh. 25Khi tikah Saul nih, “Hi bangin David sinah cun, ‘Siangpahrang nih, siangpahrang ral hna cungah khan phu a hlam nakhnga, Filistin mi hna cuarpar za khat dah ti lo cu man zei hmanh a duh lo,’ tiah nan chim lai,” tiah a ti. Saul nih David cu Filistin mi hna kut in thihter awk kha a ruah. 26Cun a sinum hna nih khan amah bia cu David kha an chimh tikah, David cu siangpahrang tupa sinak ding nih khan a lawmhter. A caan kha a luan hlanah, 27David cu a mi hna he khan an tho i an kal i Filistin mi kha za hnih an thah hna i David nih an cuarpar cu a rak phorh hna i siangpahrang tupa a si nakhnga, siangpahrang sinah cun tling tein a pek hna. Cun Saul nih a fanu Mikhal cu nupi caah a pek. 28Sihmanhsehlaw Saul nih Bawipa kha David sinah a um ti le Israel mi vialte nih an duh ti kha a hmuh i a hngalh tikah, 29Saul nih cun David kha a ṭih chinchin. Cucaah Saul cu David ral a si zungzal ko.
30Cun Filistin bawi hna kha raltuknak ah an ra chuak tawn i an ra chuah fate David cu Saul sinum vialte hna nakkhan a hlawhtling deuh; cucaah a min cu an thangṭhat ngaingai ko.
Currently Selected:
1 SAMUEL 18: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
