1 SAMUEL 17

David Nih Goliath A Thah

1Cun Filistin mi nih an ralkapbu hna cu raldoh awkah an pumh hna i Judah ram Sokoh khua ah; Sokoh le Azekah kar Efes-dammim ah an riak. 2Cun Saul le Israel mi cu an i pum i Elah nelrawn ah an riak i Filistin mi hna kha rak doh awkah an rak i tiang. 3Cun Filistin mi hna cu kam khattelei tlang cungah an dir i Israel mi hna cu a dang kam khattelei tlang cungah khan an dir ve, an karlak ah horkuang pakhat a um. 4Cun Filistin mi hna riahhmun cun an mi ṭhawng bik a min Goliath a simi, Gath khuami, a tung dong ruk le khap khat a timi cu a ra chuak. 5A lu ah dar luchin aa chinh i thir ngaphaw angki aa hruk i cu angki cu a rih leiah pawng za le kul le nga a si. 6Cun a ke ah ngal tuamnak dar phaw aa hruk i a liang ah dar fei aa bei. 7Cun a feihlung cu thiamtlang bantuk a si i a feihmur thir cu pawng hleinga a rit; cun a phaw putu cu a hmaiah a kal. 8A dir riangmang i Israel ralkap cu a hei hauh hna i, “Zeicahdah raldoh awk i i tian awkah nan hei chuah ve? Keimah cu Filistin mi ka si i nannih cu Saul sal nan si lo maw? Nanmah caah mi pakhat i thim u law, keimah sinah hin rung seh. 9Keimah kha a ka doh khawh i a ka thah ahcun, kannih cu nan sal kan si lai; sihmanhsehlaw amah cu keimah nih ka tei i ka thah ahcun, nannih cu kan sal nan si lai i kan rian nan ṭuan lai,” tiah a ti. 10Cun Filistin mipa nih cun, “Nihin ah hin Israel ralkap cu keimah nih kan zuam hna; mi pakhat i thim u law, kan i tawng tuah lai,” tiah a ti. 11Saul le Israel mi vialte nih Filistin mipa bia kha an theih tikah an lung a dong i an thin a phang ngaingai.

Saul Riahhmun Ah David

12Cun David cu Bethlehem khua i Jesse fapa a si. Jesse cu Efrath chung a si i fapa pariat a ngei. Saul chan ah khan cu pa cu a tar cang i a kum a upa cang. 13Jesse fapa upa bik pathum hna nih khan Saul cu raltuknak ah an zulh i raltuknak i a kalmi a fapa pathum hna min cu, a chuak hmasa bik Eliab le a hun changtu Abinadab le a pathumnak Shammah an si. 14David cu a hniang bik a si; a upa bik pathum hna nih cun Saul kha an zulh, 15sihmanhsehlaw David cu a pa tuu kha Bethlehem i va cawngh awkah khan Saul sin cun aa chawk aa let lengmang. 16Ni sawm li chung, Filistin mipa nih cun zingfa zanfa, a chuahhnawh hna i a dirhnawh lengmang hna.

17Ni khat cu Jesse nih a fapa David cu, “Na ule caah vaireu ephah pakhat le changreu tlang hra hi i lak law, na ule sinah, riahhmun ah cun, khulrang in va kal tuah; 18cun annih an thong khat haotu caah cawhnuk khal tlang hra hi i phorh fawn. Na ule kha zeitindah an um va zoh hna law, annih sinin hmelchunhnak pakhatkhat rak phor te,” a ti. 19Saul le a ule hna le Israel mi vialte cu Elah nelrawn chungah khan, Filistin mi hna he i do in an um, hna a ti. 20Cun David cu zingka tein a tho i tuu cu a cawngtu pakhat sinah a chiahtak hna i, thil kha a kalpi hna i Jesse nih a fial bantuk khan a kal; cun ralkapbu cu ral hla i sak pah in raldoh awk i i tiannak hmun i an chuah lioah khan riahhmun cu a va phan. 21Cun Israel mi le Filistin mi hna cu i tuk awkah an rak i tiang, ralkapbu le ralkapbu i enhtonh in. 22Cun David nih thil kha thilri zohkhenhtu sinah a chiah hna i ralkap hna sinah cun a va le i a ule cu a va biakchawnh hna. 23An sin i bia a chim lioah khan, zohhmanh, an miṭhawng bik, Gath khuami Filistin mi, a min Goliath a simi kha, Filistin ralkap chung cun a hung chuak i hmasa bantuk ṭhiamṭhiam khan Israel mi cu a zuamcawh hna. Cun David nih amah bia cu a theih.

24Israel mi vialte nih mipa kha an hmuh tikah an zam i an thin a phang ngaingai. 25Cun Israel mi hna nih cun, “Hi a hung chuak mipa hi na hmu maw? Israel zawmhtaih awk hrimhrim ah a hung chuak ko hi ta; cun hi pa a thattu hi cu siangpahrang nih laksawng tampi a pek lai i a fanu zong kha a pek lai i, a pa innchungkhar ngunkhuai a luatter lai,” tiah pakhat le pakhat an i ceih. 26Cun David nih a pawng i a dirmi hna cu, “Hi Filistin mipa a that i hi thangchiatnak Israel mi sinin a ṭhialtu cu, a cungah zeitindah tuah a si hnga? Hi cuarpartan lomi Filistin mipa hi aho rialmal dah a hei si i Pathian nung ralkapbu a hei zawmhtaih hna hnga cu!” tiah a ti. 27Cun mizapi nih cun an leh i, “Hi pa a thattu cu kan chim bantuk khan a cungah tuah a si ko lai,” tiah an ti.

28Cun a u upa bik Eliab nih mi hna sin i bia a chim kha a rak theih i David cungah cun a thin a hung i, “Zeidah na ra tuah?” Kha tuu, tlawmte kha ramlak ah khan aho sinah dah na kaltak hna? Na ninghngalte le raltuk zoh awkah na ra ko hih?” tiah a ti. 29Cun David nih, “Zei hen dah ka tuah i? Bia kaa khat chim thamtham cu,” tiah a ti. 30Cun amah sin cun a dang pakhat sin leiah aa mer i cu bantuk ṭhiamṭhiam cun a chim; cun mi nih khan hmasa i an leh bantuk khan an leh ṭhan.

31David nih a chimmi bia cu an theih tikah Saul kha an va chimh chin; cun amah kha a auh. 32Cun David nih Saul sinah cun, “Amah ruangah hin aho hmanh an lungdong hna hlah seh; na salpa nih ka va kal lai i hi Filistin mipa hi ka va doh lai,” tiah a ti. 33Cun Saul nih David cu, “Hi Filistin mipa va doh awkah hin na kal kho lai lo, zeicahtiah nang cu tlangvalte men na si i anih cu a tlanval ka in pei ralkap a si cang cu,” tiah a ti. 34Sihmanhsehlaw David nih Saul sinah cun, “Na salpa nih hin ka pa caah tuu ka khal tawn i chiandeih siseh, vom siseh a rat i tuufa kha tuurun chungin a seh tikah, 35ka dawi tawn i ka tuk i a ka chung khan ka chuah tawn; cun a rak ka zuanh a si ahcun a hmurhmul in ka tlaih i ka tuk i ka thah tawn. 36Na salpa nih hin chiandeih si hna seh, vom si hna seh, ka thah hna; cun hi cuarpartan lomi Filistin mipa hi anmah lak i pakhat cu a si ve lai, Pathian nung ralkapbu hna a zawmhtaih hna caah hin,” tiah a ti. 37Cun David nih, “Chiandeih tin chung le vom tin chungin a ka chuahtu Bawipa nih hi Filistin mipa kut chung hin a ka chuah ko lai,” tiah a ti. Cun Saul nih David cu, “Va kal law, Bawipa cu na sinah um ko seh,” tiah a ti. 38Cun Saul nih David cu a ralthuam khan a thuamh; dar luchin a lu ah a chinh i thir ngaphaw angki a hruk. 39Cun David nih cun ralthuam cungah cun a vainam cu aa bei, kal hnik aa zal i a kal kho lo, zeicahtiah cu bantuk cu aa hruk bal hna lo. Cu tikah David nih Saul sinah khan, “Hi hna he hin cun ka kal kho lo, zeicahtiah kaa nek hna lo,” tiah a ti. Cun David nih aa phoih hna. 40Cun David nih cun a ṭhiangṭhunh kha aa lak i tiva in lung mil tete panga aa thim hna i a tuukhal zal, a saphaw zal ah khan aa sanh hna; a lungherhchehnak cu a kut in aa put i Filistin mipa kha a hei fuh.

41Cun Filistin mipa kha a ra i David kha a rak naih, a phaw putu a hmai i a ummi he cun. 42Cun Filistin mipa nih khan a hei zoh i David kha a hmuh tikah, zeite ah a rel lo; zeicahtiah amah cu mi sen tertarte, mi chuak thiam ngai, tlangval kate hi a si. 43Cun Filistin mipa nih cun David cu, “Uico maw ka si i fung he na ka rathnawh?” tiah a ti. Cun Filistin mipa nih cun a pathian hna kha i chalh in David cu chiat a serh. 44Filistin mipa nih cun David cu, “Ka sinah ra tuah, na sa kha van i a zuangmi va hna le vawlei i a ummi saram hna ka pek hna lai,” tiah a ti. 45Cu tikah David nih cun Filistin mipa cu a thawh i, “Nang nih cun vainam le fei le fei nganpi he na ka chuahhnawh; sihmanhsehlaw kei nih cun ralkapbu Bawipa, Israel ralkapbu hna i an Pathian, na zawmhtaihmi min khan kan chuahhnawh. 46Nihin ni ah hin Bawipa nih nangmah cu keimah kut chungah a ka pek lai i kan thah lai i na lu kan tan lai; cun Filistin ralkapbu chung i a thimi ruak hna cu nihin ah hin van i a zuangmi va hna le vawlei i a ummi sahrang hna sinah ka pek hna lai; zeitintiah vawlei cung dihlak nih Israel mi lakah Pathian a um ti kha an hngalh nakhnga le 47hi aa pummi vialte nih hin, vainam le fei in Bawipa khamhnak hi a si lo ti kha an hngalh nakhnga; zeitintiah hi raltuknak cu Bawipa ta a si i nannih cu kan kut chungah pek nan si lai,” tiah a ti.

48Filistin mipa nih khan David kha tawngh awkah a hun naih tikah, David cu ralkap an i tiannak lei ah khan, Filistin mipa he i ton awkah cun, khulrang in a va tli. 49Cun David nih a zal kha a vun i purh i lung pakhat kha a vun lak i a herh i a hei chaih i Filistin mipa kha a calpadar ah a khen; lung kha a cal ah cun a pil i a bawktakhup in vawlei ah a tlu.

50Cuticun David nih Filistin mipa kha, lungherhchehnak le lung pakhat in a tei i, Filistin mipa kha a khen i a thah; David nih nam aa ken lo. #2Sam 21.19 51Khi tikah David nih cun a hei tlikhnawh i Filistin mipa cungah cun a dir i a nam kha a lak i a kawng in a zuh i a thah i nam cun a lu kha a tan. Filistin mi nih an miṭhawng bik kha a thi cang tiah an hmuh tikah an zam. #1Sam 21.9 52Cun Israel mi le Judah mi hna cu an tho i an au i Filistin mi cu Gath le Ekron hauka tiang an dawi hna, cucaah hliammi Filistin mi hna cu Shaaraim in Gath le Ekron tiang lampi ah an ril liangluang ko. 53Cun Israel mi hna cu Filistin mi an dawi hnanak khan an ra kir i an riahhmun kha an rok. 54Cun David nih Filistin mipa lu kha a lak i Jerusalem ah a ratpi; sihmanhsehlaw a ralthuam cu a thlam chungah khan a chiahtak.

55Saul nih David kha Filistin mipa va doh awk i a chuah kha a hmuh tikah, a ralkapbu haotu Abner sinah khan, “Abner, hi tlangvalpate hi aho fapa dah a si?” tiah a ti. Cun Abner nih, “Na nunnak chalh in ka chim, maw siangpahrang, kan chim kho lo,” tiah a ti. 56Cun siangpahrang nih khan, “Kha tlang valpa kha aho fapa dah a si hlat tuah u,” tiah a ti. 57Cun David cu Filistin mipa a thahnak khan a hung kir ah, Abner nih cun a kalpi i a kut i Filistin mipa lu he cun Saul hmaiah a chuahpi. 58Cun Saul nih a sinah, “Aho fapa dah na si, tlangvalpa?” tiah a ti. Cun David nih, “Bethlehem khuami na sal Jesse fapa ka si,” tiah a leh.

Currently Selected:

1 SAMUEL 17: HCL06

Highlight

Copy