යෙරමියා 40
40
යෙරමියා නිදහස් වීම
1ආරක්ෂක සේනාධිපති නෙබුසරදාන් රාමාහි දී යෙරමියා නිදහස් කළ පසු, ස්වාමින්වහන්සේගේ වචනය, ඔහු වෙත පැමිණියේ ය. යෙරුසලමෙහි හා යූදාහි සිට බබිලෝනිය දක්වා පිටුවහල් කරමින් සිටි සියලු පිටුවහලුන් අතරේ යදමින් බඳිනු ලැබ සිටි යෙරමියා, ඔහුට හමු විණ. 2ආරක්ෂක සේනාධිපති, යෙරමියා දුටු කල, ඔහුට කතා කොට, “ඔබේ දෙවියන්වහන්සේ වන ස්වාමින්වහන්සේ මේ ස්ථානයට සිදුවන විපත්තිය ගැන ප්‍රකාශ කර තිබුණා. 3ස්වාමින්වහන්සේ දැන් එය ඉෂ්ට වෙන්නට සලස්වලා. උන්වහන්සේ පැවසූ පරිද්දෙන් ම කළ සේක. මේ සියල්ල සිදු වී ඇත්තේ නුඹලා-ජනයා, ස්වාමින්වහන්සේට එරෙහිව පව් කළ නිසාත්, උන්වහන්සේගේ කටහඬට අකීකරු වූ නිසාත්; 4එනමුත් ඔබ අත්බැඳි දම්වැලින් මා අද ඔබ නිදහස් කරනවා. ඔබ කැමති නම්, මා සමඟ බබිලෝනියට යෑමට එන්න. මම ඔබ හොඳින් බලා ගන්නම්. එහෙත් ඔබ අකමැති නම්, මෙහි නැවතී සිටින්න. මෙන්න! මුළු දේශය ම ඔබ ඉදිරියේ! ඔබට හොඳයයි, හරියයි පෙනෙන තැනක යෑමට ඔබට පුළුවනැ” යි කීවේ ය. 5තවද යෙරමියා ආපසු හැරෙන්නටත් කලින් යළි ඔහු ඇමතූ, නෙබුසරදාන්, “යූදා නගර පාලනයට බබිලෝනියේ රජු විසින් පත් කරන ලද ෂාෆාන්ගේ පුත් අහිකාම්ගේ පුත් ගෙදලියා වෙත ආපසු ගොස්, ඔහු සමඟ ජනතාව අතරේ වාසය කරන්න. නැතහොත් ඔබ හොඳ යැයි සිතන ඕනෑ ම තැනක යන්නැ” යි පැවසී ය.
ඉන්පසු ආරක්ෂක සේනාධිපති, ඔහුට ආහාර සලාකයක් ද තෑග්ගක් ද දී, ඔහු යන්නට හැරියේ ය. 6එබැවින් යෙරමියා, අහිකාම්ගේ පුත් ගෙදලියා වෙත මිස්පා දක්වා ගොස්, දේශයෙහි නවතා යන ලද ජනයා අතරෙහි විසී ය.
ගෙදලියා මරනු ලැබීම
7බබිලෝනියේ රජු විසින් අහිකාම්ගේ පුත් ගෙදලියා දේශයේ ආණ්ඩුකාරයා කොට පත් කරන ලද බැව් ද බබිලෝනියට පිටුවහල් කොට ගෙන යනු නො ලැබූ දේශයේ අන්ත දුගී පුරුෂයින්, ස්ත්‍රීන් හා ළමයින්ගේ බාරකාරත්වය ඔහුට පැවරූ බැව් ද ඒ වන විටත් ගම් පෙදෙස්හි සිටි හමුදා නිලධාරීන් සියල්ලන්ට හා ඔවුන් සමඟ සිටි සෙබළුන්ට අසන්නට ලැබිණ. 8එවිට නෙතනියාගේ පුත් ඉෂ්මායෙල් ද කාරේයාගේ පුතුන් වූ යෝහානාන් සහ යොනාතාන් ද තන්හුමෙත්ගේ පුත් සෙරායා ද නෙටොෆාතීය ඒෆයිගේ පුතුන් ද මාකාතියාගේ පුත් යෙසනියා ද ඔවුන්ගේ මිනිස්සු ද මිස්පාහි ගෙදලියා වෙත ආහ. 9එවිට ෂාෆාන්ගේ පුත් අහිකාම්ගේ පුත් ගෙදලියා, ඔවුන්ට ද ඔවුන්ගේ මිනිසුන්ට ද දිවුරමින්, “කල්දිවරුන්ට සේවය කරන්නට භය වෙන්න එපා. දේශයෙහි වාසය කරමින්, බබිලෝනියේ රජුට මෙහෙ කරන්න. එයින් ඔබට සෙත සැලසේවී. 10අප වෙත පැමිණෙන කල්දිවරුන් ඉදිරියෙහි ඔබගේ නියෝජිතයා වශයෙන් පෙනී සිටින්නට මම මිස්පාහි නවතිමි. ඔබ මිදි යුෂ ද ගිම්හාන පලතුරු හා තෙල් ද යන අස්වනු ඔබේ ගබඩා බඳුන්හි එක් රැස් කරමින්, ඔබ අල්ලා ගත් නගරවල වාසය කරන්නැ” යි පැවසී ය.
11මේ අතර බබිලෝනියේ රජු විසින් යූදාහි ඉතිරි ස්වල්ප දෙනකු හැර දමා යන ලද වග ද ෂාෆාන්ගේ පුත් අහිකාම්ගේ පුත් ගෙදලියා ඔවුන්ගේ ආණ්ඩුකරු වශයෙන් පත් කරන ලද වග ද මෝවබ්හි සිටි යුදෙව්වරුන්ට ද අම්මොන්වරුන් අතරේ සිටියවුන්ට ද ඒදොම් හා සෙසු රටවල සිටි සියලු යුදෙව්වරුනට අසන්නට ලැබිණ. 12එවිට ඒ යුදෙව්වරුන් සියල්ලෝ තමන් විසුරුවනු ලැබ සිටි රට-රටවලින් යූදා දේශයට මිස්පාහි ගෙදලියා වෙත ආපසු ආහ. ඔවුහු මිදි යුෂ ද ගිම්හාන පලතුරු ද අස්වනු විශාල ප්‍රමාණයක් රැස් කර ගත්හ.
13මේ අතර කාරේයාගේ පුත් යෝහානාන් හා ගම් පෙදෙස්වල සිටි සියලු හමුදා නිලධාරීහු මිස්පාහි ගෙදලියා වෙත පැමිණ, 14ඔහු අමතමින්, “ඔබ දන්නේ නැති ද? අම්මොන්වරුන්ගේ රජු වූ බාලීස් ඔබ මරා දමන්නට නෙතනියාගේ පුත් ඉෂ්මායෙල් එවා ඇති වග” යි පැවසූහ. එහෙත් අහිකාම්ගේ පුත් ගෙදලියා ඔවුන් විශ්වාස කළේ නැත.
15ඉන්පසු කාරේයාගේ පුත් යෝහානාන් මිස්පාහි දී ගෙදලියාට රහසේ කතා කොට, “ගොසින්, නෙතනියාගේ පුත් ඉෂ්මායෙල් මරා දමන්නට මට ඉඩ දෙන්න. කිසිවකුත් එය දැනගන්නේ නැත. ඔබ වටා එක් රොක් වී සිටින සියලු යුදෙව්වරුන් විසුරුවා හැරීමටත්, යූදාහි ඉතිරි ස්වල්ප දෙනා විනාශවීමටත් තුඩු දෙන සේ ඔබ මරා දැමීමට ඔහුට ඉඩ හරින්නේ කුමකට දැ?” යි පැවසී ය.
16එහෙත් කාරේයාගේ පුත් යෝහානාන් ඇමතූ අහිකාම්ගේ පුත් ගෙදලියා, “එබඳු දෙයක් නො කරනු! මන්ද ඉෂ්මායෙල් ගැන ඔබ කියන දෑ බොරු යැ” යි පැවසී ය.
Currently Selected:
යෙරමියා 40: SCV
Highlight
Share
Copy
Want to have your highlights saved across all your devices? Sign up or sign in
Holy Bible, Sinhala Contemporary Version™ | © 1980, 1991, 1994, 2011, 2020, 2025 by Biblica, Inc. | Used with permission. All rights reserved worldwide.
