Teu Maan Caoh 25

Paul maanyz khaam caetz tawz khunz longz

1Waaiz khunz Phestus phraeoz prih Yio moh waiz seu ngihz, hnhz tae leh weng Kaesarea lan weng Yerusalem. 2A diz beunz caangz keui, ihz peur aacz Yio keui teur aacz daehz maap Paul. Keuh krio khunz Phestus, 3cih kez cuz rae leh truz Paul cu weng Yerusalem, keuh biapz kyaam piamz Paul tawiz reung dengz. 4Khunz Phestus daz, “Paul naeh tuhz thang weng Kaesarea, nam paw ceu nawhz leui toz ohz ngaz lan a diz. 5Aez ihz peur aacz pehz keui lan tawiz ohz, beuk maang ti nae an Paul cih pleung seu meoz meoz kaw teur aacz daehz lao raez.”

6Khunz Phestus moh tuhz weng Yerusalem kraao tahz seu ngihz, nam anz kaw kraao kawlz seu ngihz caang kai lan weng Kaesarea. Moh thaengz seu seu ngihz hnhz keu dez ti tatz traz rae lao aez Paul truz cu a diz. 7Meuz Paul phraeoz truz ne ihz Yio an truz thaz weng Yerusalem keui teur aacz daehz moh wit wit, maap hnhz an keu can keui heungz meoz baaiz kaw keuh nam caang plaez ceun nae. 8Paul kaw upz kraez toz daehz daz, “Ohz nam cih khatz traz Yio, nam cih khatz wat, nam cih khatz khunz longz Rom.”

9Keuiz daz khunz Phestus dawhz mawk mael tawz Yio keui rae daz Paul nahz, “Anz mih sunz lan weng Yerusalem, khaam caetz aacz ngaai ohz an keuh maap keu ni hiuz?”

10Paul kaw daz, “Nam, an ni naeh ti tatz traz khunz longz Rom, taan caetz ohz a niz. Ceun tahz ehz mas caem ne ohz nam cih pleung naehz kaai kheuz Yio. 11Beuk ohz cih pleung meoz an theukz yam kaw ohz nam wiar taam yam. Keuiz daz an keuh maap ohz ne nam anz hawkz hawkz kaw yaeh nam bawnz leh ohz aapz aez keuh nahz. Ohz maanyz khunz longz tatz traz a daehz.”

12Waaiz khunz Phestus teur lao tang ihz aez a kyaam daehz keui rae daz Paul nahz, “Kawp mih maanyz khunz longz tatz traz a daehz rae bawnz lan a diz.”

Khunz Phestus lao plaez khunz Akrippa nahz lawng Paul

13Waaiz an diz, nam paw moh heungz seu ngihz ne khunz Akrippa boh yah hnhz Bernice phraeoz truz weng Kaesarea, truz tak khunz Phestus. 14Meuz kaar thangz heungz seu ngihz ne khunz Phestus lao plaez khunz Akrippa nahz lawng Paul daz, “A niz maang ihz hawkz an khunz Phelis sapz mok tuhz thang. 15Meuz ohz lan weng Yerusalem ne beunz caangz boh ihz mawh Yio keui nae hnhz, cao ohz aez taam. 16Keuiz daz ohz lao plaez keuh nahz lawng traz Rom ehz, ehz nam aez luat taam kaai ihz talz a muz aez ihz maap hnhz keui lao plaez maap daehz kawp naehz, aez hnhz upz khraez toz daehz aacz ngaai keuh, waaiz an diz ihz tatz traz keui caang aez hnhz nahz taam. 17Meuz keuh phraeoz teun peu ohz weng a niz ne ohz nam khaam aez kraao hacz maat. Ceun kap siz ne ohz keu dez rumz, ohz cao raak Paul truz cu ti tatz traz. 18An ihz keui ceng maap hnhz kaw nam cih pleung ceun ohz thaang. 19Keuh teur thiangz lawng traz an keuh koz kwaai boh lawng Yesuhz a wa yam, keuiz daz Paul daz mawn Tahz Yesuhz yeung imz boh. 20Kawp ohz nam mas rak rak ngaz tatz traz a muz keuh eunz ceun nae rae ohz maanyz Paul, ‘Anz mih sunz khaam ihz caetz daehz tuhz weng Yerusalem hoh?’ 21Keuiz daz Paul maanyz khunz longz caetz daehz rae ohz cao hnhz moh tuhz thang thonz taw leh hnhz phuhz lan tawz khunz longz.”

22Khunz Akrippa daz khunz Phestus nahz, “Toz ohz sunz ngarz mony reu ma Paul.”

Khunz Phestus kaw daz, “Kap siz mih ngaz ngarz boh.”

Paul phraeoz aacz ngaai khunz Akrippa

23Kap siz ne khunz Akrippa boh yah hnhz Bernice, kaar phaamz pung daehz rae kut tuhz rumz. Tang ihz mawh siukz an upz seu rengz boh ihz peur aacz tuhz weng keui truz a rumz ne. Meuz ceun diz khunz Phestus lao ihz leh Paul kut. 24Khunz Phestus daz, “Khunz Akrippa boh ihz an truz naeh a niz keu ni aez, ihz Yio an naeh tuhz weng an ni boh an naeh weng Yerusalem keui daz ohz nahz, hnhz an ni nam theukz moh ceu nawhz. 25Keuiz daz ohz nam awlz reung dengz kawi hnhz cih taam yam naehz. Samz maanyz daehz ngaz khaam caetz aacz ngaai khunz longz rae ohz daz ohz ngaz phuhz hnhz lan tawz prih Rom. 26Keuiz daz ohz nam maang mony lao khunz longz nahz naehz lawh. Kawp ceun diz rae ohz leh hnhz raak truz cu aacz ngaai pehz. Neuz lak an diz ohz raak hnhz truz cu aacz ngaai khunz Akrippa. Waaiz a wa caetz ne aez ohz maang lik taemz cu khunz longz nahz. 27Kawp daz ohz thaang nam lao bawnz ti pleung naehz rae phuhz ihz klaez thang ne nam anz meoz doz.”

Currently Selected:

Teu Maan Caoh 25: ril

Highlight

Compare

Copy