Teu Maan Caoh 24

Ihz Yio keui maap Paul

1Moh hanz seu ngihz, ceu beunz Ananias boh ihz peur aacz teur ka tang ihz khaam upz, mus hnhz daz Tertullus truz phraeoz weng Kaesarea. Keuh kut cu aacz ngaai khunz Phelis, teur aacz daehz maap Paul. 2Meuz leh Paul truz aacz ngaai keuh ne Tertullus nae Paul, daz khunz nahz, “Khunz myaat Phelis aez, kawp daz ehz moh eupz bunz mih, bawnz moh katz moh ngang, kawp daz bunz mih mawh, mih kyaam mok khriungz mok laep baaiz rae, prih an ni kaw keur truz.

3An tahz ehz cih aez klawhz ceu klawhz meoz klawhz ti ne kez cuz mawh baaiz. 4Yak daz ohz upz heungz, ohz maanyz aez tahz ehz nyeun teuk ngarz mony reu ma ohz nyaenz. 5Ehz mas hnhz an ni naeh ihz srawz srawz ihz Yio keui ronyz klawhz ti. Hnhz naeh ihz peur aacz tuhz cumz ihz weng Nasaret. 6Hnhz kyaam cih teuk woi wat rae ehz cawpz hnhz. Ehz sunz tatz traz tawiz sinz ehz kaw, 7Lisias an naeh ihz mawh siukz truz rimz leh hnhz tuhz tihz ehz, 8lao ihz sunz maap keui aez truz cu aacz ngaai tahz ehz. Beuk toz tahz ehz caetz hnhz kaw tahz ehz te bawnz mas an ehz maap kaai hnhz.” 9Ihz Yio keui kaw teur aacz daehz maap ceun Tertullus daz ne leun.

Paul upz khraez toz daehz

10Khunz Phelis cih plaez tihz cao Paul lao plaez thaz daehz. Paul kaw daz, “Ohz mas boh tahz ehz naeh ihz tatz traz kaai kheuz ihz keu ni heungz wit baaiz, ohz seuz phawmz upz khraez toz daehz aacz ngaai tahz ehz. 11Ohz lan koz kwaai Phraz Pen Caoh tuhz weng Yerusalem taamz bawnz taw seu kawlz aarz seu ngihz pan, tahz ehz cawp khahz reu oiz an diz kaw mas boh. 12Ihz maap ohz keui yaeh nam awlz ohz teun akz an ohz thiangz ihz seu hawkz hawkz, srawz srawz aez ihz ronyz tuhz wat, tawiz crawp rawz traz boh tawiz weng keui. 13Keuh nam caang plaez ceun nae an keuh nae ohz seu ni ne. 14Keuiz daz ohz khaam aacz ngaai tahz ehz, ohz naeh ihz koz kwaai Phraz Pen Caoh an naeh ihz keu daehz keu daepz ehz keui koz kwaai, traz Tahz an ohz cih tawiz, an keuh daz ihz yum pleung ne, ohz yum tang traz an naeh tuhz kyaamz Moses boh tang kyaamz ihz taangz phraz keui. 15Ohz mang Phraz Pen Caoh teur deuiz tang keuh, an naeh ihz rak boh ihz raai keui meu rae imz thaz reung dengz yam. 16Kawp ceun diz ohz khatz phawmz aez mas toz daehz, nam maang ti nae. Yak aez kawi aacz ngaai Phraz Pen Caoh boh aacz ngaai ihz.”

17Waaiz ohz praasz weng Yerusalem heungz wit baaiz, ohz lan mial a diz bawnz truz paekz lu aez kuanz mai ihz phaanz keui nahz boh aez bawnz pukz caw Phraz Pen Caoh nahz. 18Keuh awlz ohz tuhz wat waaiz ohz a wa cih aez daehz seu ngamz ne wungz ihz keui nam naeh kawmz ohz, samz nam ronyz naehz. 19Ihz Yio teur ka an truz thaz prih Asia keui kaw naeh a diz, khanz daz keuh maang ti lo nae ohz kaw keuh taan daehz truz lao aacz ngaai tahz ehz nahz a niz. 20Nam anz kaw aez ihz an naeh a niz keui lao plaez, meuz ohz ceng boh aacz ngaai rumz ne keuh awlz ohz pleung naehz. 21Naeh taw seu meoz pan, meuz ohz bawnz ceng raak boh aacz ngaai ihz mawh rumz ne, ohz daz, “Talz ihz caetz daehz seu ngihz meu ni ne kawp ohz yum ihz yam meu rae imz.”

22Khunz Phelis mas rak rak traz Tahz rae mok ton a muz an diz. Hnhz daz keuh nahz, “Beuk ihz mawh siukz Lisias phraeoz kaw caang kai siupz caetz thaengz pehz eunz.” 23Khunz lao ihz mawh siukz an upz seu peur ya daehz, aez siuk keui pao Paul, aez hnhz bawnz moh yoh taan taan, aez kuanz mai Paul keui damz hnhz.

Paul boh khunz Phelis kaar tahz yah

24Nam paw moh heungz seu ngihz khunz Phelis boh yah hnhz Drusilla an naeh kheuz Yio ne phraeoz truz raak Paul rae teuk ngarz lawng yum Tahz Khris Yesuhz. 25Meuz khunz ngarz Paul rawz lawng reung dengz keu sangz, lawng toz daehz bawnz nyeun, boh lawng tatz traz waaiz an ni ne hnhz doz baaiz rae daz, “Mih a wa lan bawnz, beuk ohz lo tui raak thaengz.” 26Waaiz an diz khunz mang Paul munz daehz nahz paekz aez daehz lawt rae taan taan raak teur upz tang hnhz.

27Moh thaengz aarz wit Porsius Phestus penz khunz taangz khunz Phelis. Khunz Phelis dawhz mawk mael kaai kheuz Yio rae mok Paul tuhz thang.

Currently Selected:

Teu Maan Caoh 24: ril

Highlight

Compare

Copy