Mi Simna 1
1
Israel te ii A masabel Mihing simna
1Israel mite Egypt pan a pusua zawk a kum niina, a tha niina ni masabel ni in, Sinai Sennealngam sung tua mun Pathian ompuina Puanbuk sungah Topa in Moses paupui hi. Topa in, 2“Nangma le Aaron in Israel mite ii bee le phungte le a innkuante zui in mihing simna nei tu nu hi. Pa a minpiang, 3kum kul le a tungsia ngalkap seam thei tu peuma a min sazian la vun. 4Hong hu tu in bee le phung khat sung pan ukpi khat veu ngen tavun,” ci hi. 5-16Hi mihingte sia hi na seam tu in taangpite sung pan a kiteal minam lampuite ahi uh hi:
| Minam | Bee le phung ukpi |
|---|---|
| Reuben | Shedeur tapa Elizur |
| Simeon | Zurishaddai tapa Shelumiel |
| Judah | Amminadab tapa Nahshon |
| Issachar | Zuar tapa Nethanel |
| Zebulun | Helon tapa Eliab |
| Ephraim | Ammihud tapa Elishama |
| Manasseh | Pedahzur tapa Gamaliel |
| Benjamin | Gideoni tapa Abidan |
| Dan | Ammishaddai tapa Ahiezer |
| Asher | Ochran tapa Pagiel |
| Gad | Deuel tapa Eliasaph |
| Naphtali | Enan tapa Ahira |
17Hi pasal sawm le niite ii huna taw Moses le Aaron in, 18a tha niina, ni masabel ni in, taangpi bup sam a, bee le phungte le innkuante zui in mihing theampo tepteena lai vawt hi, 19Topa thupiak bangin, kum kul le a tungsia pa peuma, kisimin a min kiciamtee hi. Sinai Sennealngam ah Moses in mihingte min tepteena lai vawt hi. 20-46Ngalkap na a seam thei tu kum kul pan a tungsia pa peuma bee le phungte le innkuante zui in min kikhum a, Jacob tapa lianbel Reuben minam taw kipan hi. A vekpi in a nuai a bang ahi hi.
| Minam | Mihing phaza |
|---|---|
| Reuben | 46,500 |
| Simeon | 59,300 |
| Gad | 45,650 |
| Judah | 74,600 |
| Issachar | 54,400 |
| Zebulun | 57,400 |
| Ephraim | 40,500 |
| Manasseh | 32,200 |
| Benjamin | 35,400 |
| Dan | 62,700 |
| Asher | 41,500 |
| Naphtali | 53,400 |
| A vekpi: | 603,550 |
47Levi te sia nam dangte min kikhumna ah kihel ngawl hi, 48banghang ziam cile Topa in Moses tungah, 49“Ngalkap na a seam thei tu mihingte na sim ciang, Levi namte kihelsak heak in. 50Ahizong Levi te ka ompui na Puanbuk le a vanhzak nate theampo a uk tu in koi in. Amate in Puanbuk le a vanhte pua tu uh a, a sungah naseam in tua Puanbuk kiim ah ngiaphual saat tu uh hi. 51Na ngiaphual na khiin simin Levi te in Puanbuk phel tu a, ngiaphual thak ah thua kik tu uh hi. Midang khat pawpo Puanbuk nai ah a pai le kithatlum tu hi. 52A taanglai Israel te in amate tek ii, laandial nuai ah a hon a hon in ngiaphual saat tu uh hi. 53Khat po in puanbuk nai ah pai in a neak le ka thin uuk tu a, Israel taangpite daan ka pia tu hi, tua ahikom Levi te in Puanbuk kiim ah ngiaphual saatin cing tu uh hi,” ci hi. 54Tuabangin Topa ii Moses a thupiakte theampo Israel mite in seam siat uh hi.
Currently Selected:
Mi Simna 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016