Psalm Late 86
86
Hu natu Thungetna
1 Topa awng, hong ngai ta'n a, hong zo ta'n,
banghang ziam cile kei sia
cimaw in thazawm khi hi.
2Kei sia na tungah hong thumaan ka hikom thina pan hong hun ta'n;
kei sia na naseampa hi a nang hong muang ka hi ciang, hong hun ta'n.
3Nangma in ka Pathian na hikom,
kei hong hesuak ta'n; sunkhuateak nang tungah thu kong ngen hi.
4Topa awng, na naseampa hong lungdamsak ta'n,
banghang ziam cile ka thungetnate nang kungah hong paito hi.
5Ko tungah nangma na pha a, nong maisak hi,
nang tungah thu hong ngente theampo atu in
itna kip taw na kidim hi.
6 Topa awng, ka thungetna hong ngai ta'n;
hu ngen a kong auna hong za ta'n.
7Ngimna hunte sungah nang kong ko hi,
banghang ziam cile nangma in ka thungetnate nong zo hi.
8Topa awng, nang taw a kibang pathian om ngawl hi,
nang sep bang a seam kuama om ngawl hi.
9Na bitphua sa minam theampo
hong pai in na mai ah kun tu hi;
amate in na letna hong pok tu hi. #Tpl 15:4
10Nangma in thahat in a lamdang nate na vawt hi;
nangma bek Pathian na hi hi.
11Seam a nong oaite hong hil ta'n, Topa awng,
thumaan takin na thu kong ni tu hi;
a kicing kipiakna taw, na na ka sep natu hong hil ta'n.
12Topa ka Pathian awng,
ka thin theampo taw nang kong pok tu hi;
Na letna sia a tawntungin ka thangsak tu hi.
13Nong itna kip sia kei atu bangza in lian ziam!
thaankuul pan mama in nangma in kei nong hun zo hi.
14Pathian awng,
mihing kiphasakte in kei hong langpan tu in hong pai hi;
mihing tatkha hon pawlkhat
kei thatlum tu in hong hanciam hi —
nang hong thusim ngawl mihingte ahi uh hi.
15Ahihang Topa awng, nang sia,
a hesuak thei le a it thei Pathian na hi a,
a thin uai tawntung,
a dik tawntung le a thumaan tawntung na hi hi.
16Kei sang hong nga ta'n a kei hong hesuak ta'n;
hong thakhosak ta'n a hong hun ta'n,
banghang ziam cile ka nu ii sep bangma in na na ka seam hi.
17Na phatna a kitelna hong lak ta'n, Topa awng;
kei hong ensante in
heenepna le huna nong piak a mu uh ciangin a maizum tu uh hi.
Currently Selected:
Psalm Late 86: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
