Psalm Late 85
85
Minam Noptuam natu Thungetna
1 Topa awng, na leitang na hesuak zo hi;
nangma in Israel te na nuamsasak kik zo hi.
2Nangma in na mite ii mawnate na maisak zo a,
amate ii tatkhialna theampo na pengsak zo hi.
3Amate tungah na thin uukna teng na thaisak zo a,
na thin uuk thangsiatna zongh na vei kenkon kik zo hi.
4Hong puuapha kik ta'n, Pathian kote ngumpa awng,
kote dik nong sak ngawlna thaisak in!
5Ko tungah a tawntungin nong thin uuk tu ziam?
Na thin uukna thai ngei nawn ngawl tu ziam?
6Kote hong thahatsak kik ta'n;
tua hile ko na mite in nangma kong pok kik tu uh hi.
7 Topa awng, nong itna kip hong lak ta'n,
tuaciang nangma ii ngupna le huna kote hong pia ta'n.
8 Topa Pathian paunate ka ngai nginge hi;
ih mawmawtziate zui kik bua po leang
ama in ei a mite tungah
kilemna hong kamciam hi.
9Ama a upatte hun tu in ama kinging takpi a,
ama hong ompuina taw hong huutna in ih ngam ih lei ah kho top tu hi.
10Itna le thumaanna kisitua tu hi;
thutang le kilemna kingawngkoai tu hi.
11Mihingte thumaanna in lei panin van banto tu a,
tuaciang Pathian thutang in
vantung panin ensuk tu hi.
12 Topa in eite
hong nuamsasak tu a,
ih leitang in anlaak tu
tam mama piangsak tu hi.
13Thutang suana sia Topa mai ah pai tu a,
ama atu lampi sial khol tu hi.
Currently Selected:
Psalm Late 85: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
