Psalm Late 51
51
Mawmaisak Thungetna #2 Sa 12:1-15
1Pathian awng,
nong itna kip hu in kei hong hesuak ta'n,
A lian na hesuakna hu in
ka mawnate hong melsak ta'n!
2Ka ngitlona theampo hong silsak ta'n a,
ka mawna panin hong thiangthosak ta'n!
3Ka tatkhialnate ka he a,
ka mawnate ka phawk tawntung hi.
4Nangma tung tatak ah hong maw zo khi hi,
sia na sakte ka vawt zo hi.
Tua ahiciangin,
thu nong khenna sia maan hi;
kei nong mawsak sia khial ngawl ni hi. #Rom 3:4
5Ka pian ni pan ma in
a sia ka hi hi;
ka nu ngil sungah ka om lai pan ma in mimaw ka hi zo hi.
6Citakna le thumaanna sia na dei thu ahi hi;
ka khua ngaisutna sia na ciimna taw hong dim ta'n.
7Ka mawna hong laakkeaksak ta'n, tua hile ka thiangtho tu hi,
hong sil ta'n, tua hile vuuk sang ka ngo zaw tu hi.
8Thinnopna le lungdamna awte hong zasak ta'n;
na delpeak, na sukthap sa ka hi tazong
khatvei ma ka lungdam kik tu hi.
9Ka mawnate hong etsak
heak in a,
ka siatnate theampo
hong melmaisak ta'n.
10Pathian awng, ka sungah
thin thiangtho hong bitphua ta'n a,
a thak le a thumaan thaa hong nguan ta'n.
11Na omna mun panin hong beng heak in;
ka tung panin na thaa thiangtho lakeak heak in.
12Na ngupna tungtawn a hong pai
lungdamna sia hong pia kik ta'n a,
na thu a ni nuam tu in hong siam ta'n.
13Tuasia ciangin mimawte sia
nangma thupiakte ka hil tu a,
amate in nang hong zuan kik tu uh hi.
14Pathian awng, ka nuntakna hong khoaikhe ta'n a, hong hun ta'n,
tuaciang thutang na hina lungdam takin ka thangsak tu hi.
15Topa awng, ka pau thei natu in hong hu ta'n,
tuaciang nangma kong pok tu hi.
16Sangaw biakpiaknate
na dei bua hi,
tua hi buale tuate
kong pia zo tu hi;
meihal biakpiaknate taw na lung a kim zo bua hi.
17Pathian dei sangaw
biakpiakna sia
a kiniamkhiak
thinsung ahi hi;
Pathian awng, a kiniamkhiak le
a kisiik kik thinsung na nial bua hi.
18Pathian awng, Zion tungah thuthiam in na hu in;
Jerusalem luphungte na ciangto kik in.
19Tuasia ciang a kilawm sangaw biakpiaknate le
koma ii meihal biakpiaknate dik na sa tu hi;
tuaciang na biaknatau
tungah khuitalte
biakpiakna in hong kipia tu hi.
Currently Selected:
Psalm Late 51: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
