Psalm Late 145
145
Pokna La
1Na letna ka thangsak tu hi,
ka Pathian le ka kumpipa awng;
a tawntung a tawntungin
lungdam kong ko tu hi.
2Ni simin nang tungah lungdam kong ko tu hi;
a tawntung a tawntungin nang kong pok tu hi.
3 Topa sia lian ahikom,
nasia takin pok tu ahi hi; ama ii letna in tel zawk ahi bua hi.
4Na sepsate hu in khang khat panin khang khat ah hong kipok tu hi;
amate in a nasia mama na sepnate thangsak tu hi.
5Amate in na minthanna le na letnazia son tu uh a,
a lamdang na sepnate thuk takin ka ngaisusun tu hi.
6Mihingte in a lianpi na sepnate son tu a,
na letna ka thangsak tu hi.
7Amate in na phatna theampo son tu a,
na thuthiamna la in sa tu uh hi.
8 Topa in itna le hesuakna nei a,
thinsau in itna kip taw kidim hi.
9Ama sia mihing sim tungah
pha in,
a vawt theampo tungah
mulkimna nei hi.
10 Topa awng, na bitphua sa nuntakna nei theampo in nang hong pok tu a,
na mite theampo in lungdam hong ko tu hi.
11Amate in na kumpi vaangletna ii minthanna sia thuson in nei tu a,
na thakhona thu son tu uh hi,
12tuasia ciang mihing theampo in
na sepna lianpite he tu a,
na kumpingam sungah na
minthanzia hong he tu uh hi.
13Na ukna kip tawntung a,
nang sia a tawntungin kumpipa na hi hi.
Topa in a kamciamnate tungah thumaan a,
a ngamtatna sung theampo ah hesuak thei hi.
14Ama in ngim a ngate theampo hu hi;
a puksa theampo phongto hi.
15Nuntakna a nei theampo in lametna taw
nang hong mitsuan a, amate kisap ciangin an na pia hi.
16Amate a kikhom in na pia a,
kitaangsapna theampo ah a lung na kimsak hi.
17 Topa in ama ii sepna theampo sungah thutang a,
a ngamtatna sung theampo ah hesuak thei hi.
18Ama a kote, thintak taw a samte nai ah ama om hi.
19Ama a zaktate ii kitaangsapnate ama in sik hi;
amate auna za in hun hi.
20Ama a it theampo ama in sungsia hi,
ahihang a seksolte susia tu hi.
21 Topa ka pok tawntung tu hi;
ama bitphua sa nuntakna nei theampo in
a min thiangtho a tawntungin pok tahen.
Currently Selected:
Psalm Late 145: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
