Psalm Late 135
135
Pokna La
1 Topa pok vun!
No Topa naseamte awng, ama min pok vun.
2 Topa ii inn sung le,
ih Pathian Biakinnpi sungah
a dingte awng, Topa pok vun!
3 Topa pok vun, banghang ziam cile ama pha hi;
ama ii min pokna late sa vun,
banghang ziam cile ama dik hi.
4Ama in ama atu in Jacob teal a,
ama aituam tu in Israel mite teal hi.
5Ih Topa lian hi ci in ka he a,
pathian dang theampo sangin lianzaw hi.
6Vantung le leitung ah ahizong,
tuipi sung le a nuai a thuknate ah ahizong ama uuk pawpo a vawt hi.
7Ama in leitung mong panin vuipi meeite hong puak hi;
ama in vuipi suangvalte atu in khualeng vawt a,
tuaciangin vuite sia ama ii kholna sung panin pusua hi.
8Egypt ngam ah ama in mihing
le nganhingte ii taciil tek a kibangin thatlum hi.
9Tua munah nalamdangte le a lamdadangte
kumpipa le a upate daan piak natu in vawt hi.
10Ama in ngam tuatuam tam ma susia a,
a thahat kumpite thatlum hi.
11Tuate sungah
Amor kumpipa Sihon,
Bashan kumpipa Og, le
Canaan kumpi theampo kihel hi.
12Amate ii leitangte sia ama in a mite pia hi;
ama in tuate Israel mite pia hi.
13 Topa awng, nangma sia Pathian hi ci in
a tawntungin hong kithangsak tu hi;
khang theampo in nang hong phawk tu hi.
14 Topa in ama ii
mihingte hung tu hi;
ama in a naseamte
hesuak tu hi.
15Tua minamte ii pathiante sia
mihingte ii khut taw a vawt tawm khamh le ngunn taw a kivawtte ahi hi. #Ps 115:4-8; Tpl 9:20
16Amate in kam nei ahihang a pau thei bua hi,
mit nei ahihang a mu thei bua uh hi.
17Amate in bil nei ahihang khua a za thei bua uh hi;
amate sia hu ngawngawn a sang thei bua uh hi.
18Tuate a vawtte le a muangte theampo sia
amate vawt sa milimte bangma suak tahen!
19Israel mite awng, Topa pok vun;
no Pathian thiampite awng, ama pok vun!
20No Levi mite awng,
Topa pok vun;
no ama a biate theampo awng,
ama pok vun!
21 Topa sia Zion ah pok vun,
a inn ahi Jerusalem ah pok vun.
Topa pok vun!
Currently Selected:
Psalm Late 135: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
