Psalm Late 119
119
Topa Thukham
1 Topa thukham bangin nungta a,
a nuntakna a sit baang ngawlte in mihing lungdamte ahi hi.
2Ama thupiakna a zuite,
a thin theampo taw ama thu a nite in mihing lungdamte ahi uh hi.
3Amate in ngamtat khial a nei ngei bua uh hi;
Topa lampi a tawn uh hi.
4 Topa awng, na thukhamte ko nong pia zo a,
thumaan takin ka zui natu nong sawl hi.
5Nong hilnate thumaan tak a,
ka kepcing natu sia bangza in lametna nei khi ziam!
6Na thupiakte theampo
ka nadon le,
ka mai hong zumsak buatu hi.
7Thutang taw na thu khennate ka heheak ciangin,
thinsung thiangtho taw nang kong pok tu hi.
8Na thukhamte ka zui tu hi;
Kei hong nusia ngei heak in!
Topa Thukham Zuina
9Khangno khat in ama nuntakna
bangbangin a thiangtho in a keam thei tu ziam?
Na thupiakte zuina taw keam thei tu hi.
10Ka thin theampo taw nang atu sep tu ka hanciam hi;
na thupiakte a zui ngawlin hong koi heak in.
11Nang tungah kong maw ngawl natu in
na thukham ka thinsung ah ka keam hi.
12Nang kong pok hi, Topa awng;
nangma paiziate hong hil ta'n.
13Nong piaksa thukhamte theampo
nging takin ka lo kik tu hi.
14Hau mama tu sangin
na thupiakte zuina sungah lungpilna ka nei zaw hi.
15Nong lamlaknate ka kantel hi;
nong hilnate ka mitsuan hi.
16Na thukhamte sungah nuam ka sa hi;
nong thupiaknate ka mangil buatu hi.
Topa Thukham sungah Lungdamna
17Ka nuntak thei natu le
nong hilnate kong nit thei natu in,
kei na naseampa tungah hong dik ta'n.
18Na thukham sungah a lamdang
thumaante ka mu thei natu in ka mit hong honsak ta'n.
19Hi sung leitung ah tawm vei bek ka om tu hi;
na thupiakte kei kung pan seal heak in.
20Na thu khennate a tawntungin ka he nuam a,
thangai in ka thin na hi.
21A kiphasakte na mawsak hi;
na thupiakte a ni ngawlte haamsiatna thuak tahen.
22Na thukhamte ka kepcing hu in kei hong selno a,
hong nomute taw hong kipealsak ta'n.
23Ngam ukte kisitua in kei hong thasawm uh hi,
ahihang nangma hilnate ka kantel tu hi.
24Na lamlaknate in kei thinnopna hong pia hi;
tuate in ngaisutna hong piate ahi hi.
Topa Thukham Zui natu Thin Khensatna
25Leivui sungah lelna taw
ka lum hi;
nong kamciamsa bangma in
hong hingsak ta'n.
26Ka sepsa theampo
nang tungah kong pualaak a, nangma in nong zo hi;
nangma ii paiziate hong hil ta'n.
27Na thukhamte ka tel thei natu in hong hu ta'n,
tua ciangin a lamdang nong hilnate ka ngaisusun tu hi.
28Heena in keima hong khucip hi;
nong kamciamsa bangin hong hatsak ta'n.
29A maan ngawl lampi ka zui ngawl natu in hong keam ta'n a,
na phatna zui in na thukham hong hil ta'n.
30Thu nit tu ka teal zo hi;
na thu khennate ka nadon zo hi.
31Na lamlakna ka zui zo hi,
Topa awng;
maizum hong ngasak heak in.
32Na thupiakte thalawp takin ka zui tu hi,
banghang ziam cile nangma in tel theina a tamzaw nong pia tu hi.
Tel thei natu Thungetna khat
33 Topa awng, na thukhamte ii khiakna hong hil ta'n,
tua hile a tawntungin ka zui tu hi.
34Na thukham kei tungah hong thiangson ta'n,
tua hile ka zui tu hi; ka thin theampo taw ka keam tu hi.
35Na thupiakte hong zuisak ta'n,
banghang ziam cile
tuate sungah lungdamna
ka mu hi.
36Hau natu sangin
na thukhamte zui nopna thin hong pia zaw ta'n.
37A man nei ngawl nate nadon na panin hong keamcing ta'n a,
nong ciamsa bangma kei tungah hong dik ta'n.
38Na thu hong nite tungah na piak kamciam sia
na naseampa kei tungah hong tungsak ta'n.
39Selnona thuak tu ka launa panin hong hun ta'n;
na thu khennate bangza in lamdang ziam!
40Na thupiakte ka zui nuam hi;
nuntakna thak hong pia ta'n,
banghang ziam cile nangma in thumaan thutang na hi hi.
Topa Thukham Muanna
41 Topa awng, kei bangza hong it ni ziam hong lak ta'n a,
na kamciamsa taw kizui in, kei hong ngum ta'n.
42Tuasia ciang kei hong selnote pauna ka zo thei tu hi
banghang ziam cile na kammal ka muang hi.
43A tawntungin thumaan hong pausak thei ta'n,
banghang ziam cile
ka lametna sia
nangma thukhen nate
sungah om hi.
44Na thukham sia a tawntung
a tawntungin ka zui tu hi.
45A cialcing suatakna sungah ka nungta tu hi,
banghang ziam cile na hilnate zui tu ka hanciam hi.
46Kumpipate munah na thupiaknate ka son tu a,
ka mai a zum buatu hi.
47Na thupiakte zuina sungah thinnopna ka nga hi,
banghang ziam cile tuate ka it hi.
48Na thupiakte thasia in ka it hi;
na lamlaknate thuk takin ka ngaisusun tu hi.
Topa Thukham tungah Kimuanna
49Na naseampa kei tung a, nong kamciam sia phawk in;
tuasia in lametna hong pia hi.
50Ka ngimna sung ngawngawn ah keima hong kiheneam hi,
banghang ziam cile na kamciamna in kei nuntakna hong pia hi.
51A kiphasakte in kei hong zawnsak tawntung hang,
na thukham panin ka pial ngei bua hi.
52 Topa awng, taanghlai a na thukhennate ka ciamtee a,
tuate in heenepna hong pia hi.
53Mihing seksolte ii na thukham a paltan ka mu ciangin
thin uukna taw ka kidim hi.
54Leitung ka nuntak hun tom no sungah
na thupiakte huvau la in ka phuak hi.
55 Topa awng, zanin nang kong phawk a,
na thukham ka ngaisun hi.
56Na thupiakte zuina in ka lungdamna ahi hi.
Topa Thukham tungah Kipiakna
57 Topa awng, ka dei theampo sia nangma na hi hi;
na thukhamte zui tu in kong kamciam hi.
58Nong kamciamsa bangma kei tungah
hesuakna nong nei natu in ka thin theampo taw kong ngen hi!
59Ka ngamtat nate ka ngaisun zo a,
nong lamlaknate zui natu kamciam kong pia hi.
60Na thupiakte zui natu
ka haisaang bua a,
ka manlang hi.
61Mihing seksolte in kei thaang hong sia zo hi,
ahihang na thukham ka mangil bua hi.
62Thutang taw na thu khennate hangin
nangma pok tu in zan kimlai in ka khanglo hi.
63Keima in nang atu hong sepsakte theampo le,
na thukhamte a zuite theampo ii lawm ka hi hi.
64 Topa awng, leitung in na itna kip taw kidim hi;
na thupiakte hong hil ta'n.
Topa Thukham ii Manphatna
65 Topa awng, na kamciam, na kholet zo a,
na naseampa keima ii tungah nong dik hi.
66Ciimna le heakna hong pia ta'n,
banghang ziam cile na thupiaknate ka muang hi.
67Daan nong piak ma in ka pai khial bul hi,
ahihang tu in na pau kong ni hi.
68Nang sia na pha a, na thuthiam hi!
Na thupiakte hong hil ta'n.
69Mihing kiphasakte in kei huvau leilot thu son zo uh hi,
ahihang na lamlaknate ka thinsung theampo taw ka zui hi.
70Hi mihingte in tel theina bangma nei ngawl hi,
ahihang kei in na thukham sungah nuam ka sa hi.
71Daan ka thuakna in kei atu in pha hi,
banghang ziam cile na thupiakte hong hesak hi.
72Leitung ah a om sum le vanh manpha theampo sangin
nong piak na thukham in kei atu in khiakna nei zaw hi.
Topa Thukham sungah Thutang khenna
73Nangma in kei nong bitphua a, nong keamcing hi;
tel theina hong pia ta'n, tua hile na thukhamte ka he tu hi.
74Nang hong upatte in
kei hong mu ciangin a lung uh dam tu hi,
banghang ziam cile na kamciam ka muang hi.
75 Topa awng, na thukhennate tang hi ci in ka he hi,
tuaciang daan nong piak zongh nangma thumaan hang ahi hi.
76Na naseampa kei tungah nong kamciamsa bangma in
na itna kip in kei hong heeneam tahen.
77Kei hong hesuak ta'n, tua hile ka nungta tu hi,
banghang ziam cile na thukham sungah thinnopna ka nei hi.
78A kiphasakte in a maan ngawl bulin
kei hong suanhkhial ahikom maizumna nga tahen;
kei ka hile nangma lamlaknate thuk takin ka ngaisusun tu hi.
79Nang hong zaktate
na thupiakte a hete theampo kei kungah hong pai tahen.
80Lelna maizumna taw ka kipeal natu in
na thupiakte a cing takin hong zuisak thei ta'n.
Suatak natu Thungetna
81 Topa awng, nong ngup tu kong ngakna in, ka tha tul zo hi;
na kammal sungah muanna ka nei hi.
82“Bang hun ciang hong hu tu ni ziam?” ci in kong dok kawmin
nong kamciamte muangmaw a
ka e etna in ka mit taak zo hi.
83A kivawk sa savun tuithawl bangin
kei sia kimanna ka nei nawn bua hi;
ahihang na thupiakte ka mangil bua hi.
84Bang tanvei hong ngak lai tu khi ziam?
Kei hong vawtsiate bang hun ciangin daan pia tu ni ziam?
85Na thukham a zui ngawl mihing kiphasakte in
kei thaang hong sia natu in vuum a to zo uh hi.
86Na thupiak theampo muan thamman hi;
mihingte in leilot thu taw kei ngim hong pia hi — kei hong hu ta'n!
87Amate in kei hong thatlum dektak zo hi,
ahihang na thupiakte ka ngaingon ngei bua hi.
88Na itna kip hu in kei tungah hong dik ta'n,
tua hile na thukhamte ka zui thei tu hi.
Topa Thukham Upna
89 Topa awng, na kammal in kikhomsuan tu hi;
tua in vantung ah kip tawntung hi.
90Na thumaanna sia
khang theampo dong kikhomsuan hi;
nangma in simlei sia a om natu munah na nga a,
tuabang ma in om top hi.
91Tuni dong na theampo amate om babang tekin om hi,
banghang ziam cile nangma thupiak hang le
amate theampo sia na naseamte a hi siat uh hang ahi hi.
92Na thukham in ka lungdamna ii naak hi buathong le
ka thuaknate taw ka thi zo tu hi.
93Na lamlaknate ka ngaingon ngei buatu hi,
banghang ziam cile tuate taw keima a nungta in nong keam hi.
94Kei sia nangma aa ka hi hi — kei hong hun ta'n!
Na thupiakte zui tu ka hanciam zo hi.
95Mihing seksolte in kei hong thatlum tu in hong ngak hi,
ahihang na thukhamte a thukin ka ngaisusun hi.
96Na theampo sia a kiciangtan in om hi ci in ka he hi;
ahihang na thupiakna sia sitbaang ngawl hi.
Topa Thukham Itna
97Na thukham bangza in
it khi ziam!
Tua thu nitangtumin
ka ngaisun hi.
98Na thupiak sia kei taw a tawntungin omkhawm a,
kei sia ka ngalte sangin hong ciimsak zaw hi.
99Ka syate theampo sangin ka tel zaw hi,
banghang ziam cile keima in nong lamlaknate thuk takin ka ngaisusun hi.
100Pasal haamte sangin ciimna lianzaw ka nei hi,
banghang ziam cile na thupiakte ka zui hi.
101Ngamtat sia theampo ka pial hi;
banghang ziam cile na thu ka ni nuam hi.
102Na lamlaknate
ka ngaingon bua hi;
banghang ziam cile nangma in
ka syapa na hi hi.
103Na lamlaknate thum mama a,
khuaitui sang ngawngawn in thum zaw hi!
104Na thukhamte panin ciimna ka nga hi;
tua ahikom a sia ngamtatna theampo ka ensan hi.
Topa Thukham pan Khuavak
105Na kammal in kei lam hong lak tu meiinn hi a
ka lampi atu khuavak ahi hi.
106Na lamlakna maante zui natu in,
a ciliaphuai ka kamciam sia ka len tu hi.
107 Topa awng, ka thuaknate sia lauhuai takpi hi;
nong kamciamsa bangma in hong nungtasak ta'n.
108 Topa awng, lungdamko
ka thungetna hong saang ta'n a,
na thupiakte hong hil ta'n.
109Ka nuntakna khaamh tu in ka kinging tawntung hi;
na thukham ka mangil bua hi.
110Mihing seksolte in thaang taw kei hong sia hi;
ahihang na thupiakte zui ngawlin ka om bua hi.
111Na thupiakte sia a tawntungin keima neisa ahi hi;
tuate in ka lungdamna ahi hi.
112Ka thi ni matengin
na thukhamte zui tu in ka khensat zo hi.
Topa Thukham sungah Ngammuanna
113Nang tungah a pha tak
hong thumaan ngawlte ka ensan hi,
ahihang na thukham ka it hi.
114Nangma in kei hong hungpa le hong dalpa na hi a;
na kamciam sungah lametna ka nei hi.
115No, mawnei mite awng, kei kung panin tai vun.
Ka Pathian thupiakte ka zui tu hi.
116Nong ciamsa bangma in thahatna hong pia ta'n,
tua hile ka nungta tu hi;
ka lametna sungah hong thinkiamsak heak in!
117Ka ngammuan natu in
hong len ta'n,
tuaciang na thupiakte
a tawntungin ka nadon tu hi.
118Na thukhamte a zui ngawl peuma na nial hi;
amate thimthel ngiimnate sia a mannung bua hi.
119A seksol theampo sia ninteak bangin na ngaisun hi,
tua ahikom na lamlaknate ka it hi.
120Nangma hu in ka lau hi;
na thukhennate hu in launa taw ka kidim hi.
Topa Thukham Zuina
121A phate le a maante
ka seam zo hi;
ka ngalte khut sungah hong nusia heak in!
122Na naseampa na hu tu sia kamciam pia in;
a kiphasakte in hong zothawsak heak in.
123Nong hut natu kong etna,
nong kamciamsa ngupna ka etna in ka mit taak zo hi.
124Nong itna kip taw kizui in
kei tungah hong vawt ta'n a,
na thupiakte hong hil ta'n.
125Keima in na naseampa ka hi hi;
na hilnate ka heak thei tu in, tel theina hong pia ta'n.
126 Topa awng, na sep tu hun zo hi,
banghang ziam cile, mihingte in na thukham hong zui ngawl hi.
127Khamh le, khamh ciitak sangin
na thupiakte ka itzaw hi.
128Tua ahiciang na lamlaknate theampo ka zui a,
lam khialna theampo ka ngaimaw hi.
Topa Thukham Zui nopna
129Na hilnate lamdang hi;
ka thin theampo taw ka zui hi.
130Na hilnate na thiang sonna in khuavak pia a,
a he ngawlte ciimna pia hi.
131Na thupiakte ka deina hangin
kamkaa in ka haihaw liang hi.
132Kei sang hong nga ta'n a,
nang hong itte theampo
tungah na ngamtat bangmain
kei hong hesuak ta'n.
133Nong kamciamsa bangin liik natu pan hong keam ta'n;
siatna in hong zosak heak in.
134Na thupiakte ka zui thei natu in
kei hong zothawte kung panin hong hun ta'n.
135Nong ompuina taw thupha hong pia ta'n a,
na thukhamte hong hil ta'n.
136Mihingte in na thukham hong zui ngawl hu in
ka thitui ngun bangin luang hi.
Topa Thukham ii Thukhaikimkhenna
137 Topa awng, nangma in
thumaan thutang na hi a, na thukhamte maan hi;
138zui tu ngeina na piakte sia pha tatak a, maan hi.
139Ka ngalte in, na thupiakte
thusim ngawl ahikom ka thin uukna sia, ka sungah mei bangin kuang hi.
140Na kamciam sia
bangza in maan ziam!
Tuasia bangza in
diksa khi ziam!
141Kei sia a thupi ngawl ka hi a, zawnsak ka thuak hi,
ahihang na hilnate ka ngaingon bua hi.
142Na thutang sia a tawntungin kikhomsuan tu a,
na thukham sia maan tawntung hi.
143Ngimna le thintoina taw
ka kidim hi,
ahihang na thupiakte in
lungdamna hong puak hi.
144Na lamlaknate a tawntungin thutang ahi hi;
telthiamna hong pia ta'n, tua hile ka nungta tu hi.
Suatak natu Thungetna khat
145Ka thin theampo taw
nang kong sam hi;
Topa awng, hong zo ta'n,
tuaciang na thupiakte
ka zui tu hi!
146Nang kong sam hi;
hong hun ta'n, na thukhamte ka tang tu hi.
147Nisua ma in hu ngenin nang kong sam hi;
na kamciam sungah ka lametna om hi.
148Na lamlaknate ka thuk ngaisusutna in zankhuateakin
khangciim in ka lum hi,
149 Topa awng, nong itna in kip ahikom hong za ta'n;
nong hesuakna hong lak ta'n a,
ka nuntakna hong
keamcing ta'n.
150A ngilo kei hong vawtsiate in hong neak vaial hi;
amate sia na thukham a tang ngeingawlte ahi hi.
151Ahihang Topa awng, nangma in keima nai ah nong om a,
na thupiakte theampo kho top hi.
152Na lamlaknate ka heak zawk ngei zo hi;
tuate sia a kikhomsuan tu in na vawt ahi hi.
Hu nget Maangkaana
153Ka thuakna hong en ta'n a,
hong ngum ta'n,
banghang ziam cile
na thukham ka ngaingon bua hi.
154Ka vai hong panpui ta'n a, hong suaktasak ta'n;
nong kamciamsa bangin hong hun ta'n.
155A seksolte kingum ngawl tu hi,
banghang ziam cile amate in na thukhamte a ni bua uh hi.
156Ahihang, Topa awng, na mulkimna in lian hi;
na hesuakna hong lak ta'n a hong hun ta'n!
157Keima in ngalte le hong zothaw theite tam mama ka nei hi,
ahihang na thukhamte ka zui khial ngei bua hi.
158Tua ngual leeheak theite ka et ciangin kiihuai ka sa hi,
banghang ziam cile amate in na thupiakte a len bua uh hi.
159 Topa awng, na lamlaknate
bangza in it khi ziam cisia, hong mu ta'n.
Na itna in kikheal ngeingawl ahiciang hong hun ta'n!
160Na thukham laingil in thumaanna hi a,
a tangin na thukhennate theampo sia kip tawntung hi.
Topa Thukham sungah Ki aapna
161Mihing vaang neite in a maan ngawlin kei hong do hi,
ahihang na thukham
ka thasia hi.
162Na kamciamte hu in bangza ka lungdam ziam —
Sumngum kikholna a mu khat bangin ka lungdam hi.
163Leilot thu theampo ngaimaw in ka huatsa hi,
ahihang na thukham ka it hi.
164A tang na thukhennate hu in
ni simin salivei nang tungah lungdam kong ko hi.
165Na thukham a itte in ngammuanna tatak nei a,
amate a puksak thei bangma a om bua hi.
166 Topa awng, nong ngup tu ngakin ka om a,
nong sawl po ka seam hi.
167Na hilnate ka ni hi;
ka thinsung theampo taw tuate ka it hi.
168Na thupiakte le nong lamlaknate ka zui hi;
ka sep ka vawt theampo na mu hi.
Hu natu Thungetna
169Hu ngen a kong auna nang kung hong theng tahen,
Topa awng!
Nong kamciamsa bangin tel theina hong pia ta'n!
170Kong thungetna hong ngai ta'n a,
na kamciamsa om bangin hong hun ta'n!
171A tawntungin nang
kong pok tu hi,
banghang ziam cile nangma in
na thukhamte nong hil hi.
172Na thukham tungtaang ah la ka sa tu hi,
banghang ziam cile na thupiaknate maan hi.
173Kei hong hu tu in a tawntungin hong kinging ta'n,
banghang ziam cile na thupiakte ka zui hi.
174 Topa awng, hong ngum tu nong huna sia bangza in thangai khi ziam!
na thukham sungah lungdamna ka mu hi.
175Nang kong pok thei natu in nuntakna hong pia ta'n;
na lamlaknate in kei hong hu tahen.
176Ngam amh tuuno khat bangin
ka vakthap hi;
Tua ahikom hong pai in,
na naseampa keima hong zong ta'n,
banghang ziam cile na thukhamte ka ngaingon bua hi.
Currently Selected:
Psalm Late 119: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
