Psalm Late 118
118
Zawna hu a Lungdamko Thungetna
1 Topa tungah
lungdamko vun,
banghang ziam cile ama pha hi,
tuaciang ama hong itna in a tawntung kip hi. #1 Khang 16:34; 2 Khang 5:13; 7:3; Ezra 3:11; Ps 100:5; 106:1; Ps 107:1; 136:1; Jer 33:11
2Israel te in:
“Ama ii itna kip tawntung hi” ci tahen.
3Pathian thiampite in
“Ama ii itna kip tawntung hi” ci tahen.
4Ama a bia theampo in
“Ama ii itna kip tawntung hi” ci tahen.
5Ka ngim ngana sungah Topa ka biakpui hi;
ama in hong zo a hong suaktasak hi.
6 Topa in keima taw hong omkhawm a, kei ka lau buatu hi;
akua in kei bang hong law thei tu ziam? #Heb 13:6
7 Topa sia kei hong hu pa hi a,
ka ngalte ii lelna a thuak sia ka mu tu hi.
8 Topa muanna in
mihing suan tu sangin phazaw hi.
9 Topa muanna in
mihing lampuite suan tu sangin phazaw hi.
10Ngal tam mamate
ka kiim ah om hi;
ahihang Topa vaang taw
amate ka susia hi!
11Amate ka kiimkot mun theampo ah a om uh hi;
ahihang Topa vaang taw amate ka susia hi!
12Ka kiimkot panin amate in khuai bangin hong uumci hi,
ahihang lingkung kawm kaanghmei bangin amate kaanghtum paih hi;
Topa vaang taw
amate ka susia hi.
13Kei sia nasia takin hong kisim a hong zo uh hi,
ahihang Topa in kei hong hu hi.
14 Topa in vaang hong pia a hong hatsak hi;
ama in kei hong hun zo hi. #Pu 15:2; Is 12:2
15Pathian mite tuipuan bukte sungah
zawna lungdamna taw a auna ngai vun:
“Topa vaanglet thahatna in tu a bang a suaksak hi!
16Kidona sungah ama vaanglet thahatna in
eite zawna ah hong then zo hi!” ci uh hi.
17Kei ka thi buatu hi;
ka nungta zaw tu a, Topa sepsate ka thangsak tu hi.
18Ama in nasia takin kei daan hong pia zo hi,
ahihang ama in kei hong thisak bua hi.
19Biakinn kongpite kei hong hon tavun;
a sungah tumin, Topa tungah lungdam ka ko tu hi!
20Hisia in Topa kongpi hi;
thutangte bek tum thei hi.
21 Topa awng, nang kong pok hi,
banghang ziam cile nangma in ka aw nong za a,
zawna nong pia zo hi.
22Inn sate in mannung sa ngawl a,
a nil suangtum sia a thupibel hong suak hi. #Mt 21:42; Mk 12:10-11 #Lk 20:17; Sawl 4:11; 1 Pe 2:7
23Hisia in Topa ii sepsa ahi hi;
tua in bangza mu nop huai ziam!
24Hisia in Topa zawna ni ahi hi;
lungdam in poai vawt tawng!
25Hong hun ta'n, Topa awng, hong hun ta'n!
Kote zawna hong pia ta'n, Topa awng! #Mt 21:9; Mk 11:9; Jn 12:13
26 Topa min taw hong pai pa,
Pathian in thupha pia tahen!
Topa Biakinn panin
nang thupha kong pia uh hi. #Mt 21:9; 23:39; Mk 11:9; Lk 13:35; 19:38; Jn 12:13
27 Topa sia Pathian hi;
ama in ei tungah hong pha hi.
Na khut sung uh ah thingsawlte toai in
poai khaamna kipan vun a,
biaknatau kiimkot in pai vun.
28Nangma in ka Pathian na hi a, lungdam kong ko hi;
na letna ka thangsak tu hi.
29 Topa tungah lungdamko vun,
banghang ziam cile ama pha hi,
tuaciang ama ii itna a tawntungin kip hi.
Currently Selected:
Psalm Late 118: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
