Psalm Late 104
104
A Bitphuapa Pokna
1Ka thaa awng, Topa pok in!
Topa ka Pathian awng, nang bangza in na lian ziam!
Kumpi zaletna le minthanna,
2nangma in puan bangin na silh hi;
Nangma le nangma khuavak taw na kituam hi.
Vantungte tuipuan buk khat bangin na phalh hi.
3Tuaciangin na inn sia tungsang
a om tuite tungah na sa hi.
Meeite sia siphu ngalleang bangin na zangh a,
vui ii thate tungah na to hi.
4Vui sia kamtaite bangin
na zangh a,
khualeng sia na naseamte
bangin na zangh hi. #Heb 1:7
5Simlei sia a tawdapte ii tungah kho takin na phut a,
a kikhiin ngei buatu hi.
6A tungah tuipi sia puantual khat bangin na koi a,
tui in mualte a khum hi.
7Tuite na teih ciangin amate tai uh hi;
na thupiakna aw hong zaak ciangin nawtai uh hi.
8Tua tuite sia mualte tung le
leikuamte sungah luang a,
na see sa mun zuan uh hi.
9Leitung a khuum kik nawn ngawl tu,
a kaantan thei ngeingawl natu in ngamngi na omsak hi.
10Ciktuite munkuam sungah na luangsak a,
ngunte mualte kilaklaw ah na luangsak hi.
11Tuate in ngamsate atu
tui ngasak hi;
tua munah ngam laate
a dangcim uh hi.
12A hui ah a om thingkungte tungah
vacimte bu vawtin lasa uh hi.
13Mualte tungah van panin nguatui na puaksuk a,
leitung sia na thuphate taw kidim hi.
14Khuite atu in lopa na posak a,
mihingte zak tu in thingnote na posak hi,
tua ahikom amate in lo ante ciing thei a,
15a lungdam natu in sapittui,
a maitai natu in olive thau,
a thahat natu in anluumte piangsak hi.
16Lebanon mual tungah Topa ii a suan a neisa
Cedar thingkungte in nguatui tam mama a nga uh hi.
17Tua munah vacimte in a bu vawt uh hi;
hilniang vacimliante in mang taakthing tungah a bu vawt uh hi.
18Sathakte in mualdawn saangte tungah teang a,
ngalhvangte in suangliangte ah buu uh hi.
19A ni a thate teptee natu in tha na bitphua hi;
ni in a tum tu hun he hi.
20Nangma in zan na vawt a,
khuazing sungah ngamsa theampo pusuak hi.
21Tawpi moite in sa a vai ciang hawk uh a,
Pathian ii piak an zong uh hi.
22Ni a sua ciangin amate akua zuanin lum uh hi.
23Tuasia ciangin mihingte in naseam tu in kuan a
nitak dongin na seam suak uh hi.
24 Topa awng, nangma in na tam mama na vawt zo hi!
Ciimna taw tuate theampo na vawt hi!
Simlei sia na bitphua nuntakna neite taw kidim hi.
25A kisim zo ngawl nganhingte
a lian, a no a teen khopna tuipi sia lianin zai hi.
26A tungah teambawte
khualhaw a,
a sungah na vawtsa
tuipi nganhingpui Leviathan kimai hi. #Job 41:1; Ps 74:14; Is 27:1
27Tuate theampo in an
a taangsap hun ciang
a pia tu in nang
hong suang hi.
28Nangma in amate an na pia a, a ne uh hi;
an na piak ciang amate a lungkim uh hi.
29Na nungngat ciangin amate lau uh hi;
a husan na laak ciangin amate thi in,
amate pianna leivui ah cia kik uh hi.
30Ahihang amate hu na mop ciang a kibitphua uh hi;
Nangma in leitung ah nuntakna thak na pia hi.
31 Topa minthanna kikhomsuan tahen!
Ama vawt sate tungtaang ah Topa lungdam tahen!
32Ama in simlei en a,
leitung a liing hi;
ama in mualte tham a,
tuate sung pan meikhu pusuak hi.
33Ka nuntak lai tawntung Topa tungah la ka sa tu hi;
ka nuntak laiteng ka Pathian tungah pokna la ka sa tu hi.
34Ka la in ama lungkimsak tahen,
banghang ziam cile ka lungdamna sia ama kung pan hong pai ahi hi.
35Mawneite leitung panin kilalcipsak tahen;
mihing seksolte
om nawn heak hen.
Ka thaa awng, Topa pok in!
Topa pok in!
Currently Selected:
Psalm Late 104: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
