Psalm Late 103
103
Pathian ii Itna
1Ka thaa awng,
Topa pok in!
Ka nuntakna theampo awng,
ama min thiangtho pok in!
2Ka thaa awng, Topa pok in a,
ama bangza dik ziam ci sia mangil heak in.
3Ka mawna theampo ama in hong maisak a,
ka natna theampo hong damsak hi.
4Ama in thaankuul thet natu panin hong keam a,
itna le hesuakna taw thupha hong pia hi.
5Muvanlai bangin hatin ka moisua kik natu in
ka nuntakna sia naphate taw ama in hong dimh hi.
6A kinengcipte panpuina taw Topa in thukhen a,
amate ii nga tuakte pia hi.
7Ama ii ngealnate Moses tungah ama in pualaak a,
ama ii sepna liante Israel mite musak hi.
8 Topa in hong hesuak a
hong it in,
thin uuk hak a,
itna kip taw kidim hi. #Jas 5:11
9Ama in hong teih
thapaai ngawl hi;
a tawntungin
a thin uuk ngawl hi.
10Ama in eite taw a kiphu bangin
daan hong pia ngawl a,
ih mawnate le ih tat khialnate
bangin hong thuk ngawl hi.
11Van sia lei panin a saan za in
ama a zaktate a itna sia lian mama hi.
12Nisuana sia nitumna pan a kikhualat za in
ih mawnate sia eite sung pan tuabangza ma kikhuala in hong khiinsak hi.
13Pa khat in a tate tungah dik ahi bangma
Topa sia ama a zaktate tungah dik hi.
14Eite sia bang taw kivawt ci sia ama in he hi;
ama in eite leivui ih hi sia phawk nginge hi.
15Eite ih hile ih nuntakna sia lopa bang ahi hi.
Ngam paak khat bangin ih khang a ih palh hi;
16Tua zawkciang a tungah vui hong va a,
tua paak bo in- kuama in mu kik ngawl hi.
17Ahihang Topa a zaktate atu in
ama ii itna in a tawntungin kikhomsuan a,
ama phatna sia khang tawntungin kikhom hi,
18Ama thuciamna sungah a thumaante le
ama thupiakte citakna taw a zuite atu in
ama phatna sia khang tawntungin kikhom hi.
19 Topa in a kumpi tokhum sia vantung ah koi hi;
ama in mun theampo a uk kumpipa ahi hi.
20Ama thupiakte zui a, ama ci bang a ni,
no, a thahat vantunglalangte awng Topa pok vun.
21Ama deina bangin a ngamta no,
ama naseam, vantung a om vaang nei theampo awng, Topa pok vun!
22 Topa pok vun,
ama ukna sung mun theampo ah ama ii bitphua sate awng.
Topa pok in, ka tha awng!
Currently Selected:
Psalm Late 103: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
