Paunakte 8
8
Ciimna kipok
1Ngai vun! Ciimna in hong sam hi.
Thu tuatna in ama le ama hong kihiil hi.#Pau 1:20-21
2Lampi hui mualdawnte le
lamkaate ah ding hi.
3Khuapi sung tumna mun,
kongpite hui ah ama in hi bangin au hi:
4“Mihingte awng, hong maangkaa khi hi;
leitung ah a om theampo sam khi hi.
5Puicing ngawl lai nu ziam?
Puicin natu in kisin vun.
Mawmaw nu ziam?
Ngaisut theina na nei natu in sin vun.
6Ka kammal pha mamate hong ngai tavun;
kong son theampo maan hi.
7Ka ci teng thumaan hi;
leilot thu ngaimaw khi hi.
8Ka pau theampo thumaan hi;
a maan ngawl ahibuale lampui khialna bangma om ngawl hi.
9Thuthuk a mu thei mihing khat atu in thiang sitset hi;
pha tak a, a kihil sa khat atu in tel ol hi.
10Ngunn sangin kong lamlakna teal zaw vun;
khamh phabel sangin heakna teal zaw vun.
11“Keima in Ciimna ka hi hi,
suangmanphate sangin ka phazaw hi;
na dei theampo, kei taw a kitee ngat thei bangma om ngawl hi.#Tpl 3:14
12Keima in Ciimna ka hi hi,
thuthuk mu theina ka nei hi;
keima in heakna le
thukhenna maan ka nei hi.
13 Topa zatakna in
a sia ngaimawkna ahi hi;
kiphatsakna le kisaktheina,
siatna lampite le a maan ngawl kammalte ka ngaimaw hi.
14Ngealnate ka nei a,
tuabangin ka seam suak hi.
Telthiamna ka nei a,
ka thahat hi.
15Kumpite ngamukna le
ngamukte ii upadi phate a vawtna ah ka hu hi.
16Leitung ah ngam uk theampo in
keima huna taw ngam uk hi,
ngam uliante ahizong
nam liante ahizong ka hu hi.
17Kei hong itte ka it hi;
kei hong zong po in hong mu thei hi.
18Haunate le minphatna,
nopsakna le matutna piak tu ka nei hi.
19Kei tung pan na ngate in
khamh phabel sangin
phazaw a,
ngunn ciitak sangin phazaw hi.
20Thutang lampi ka tawn a;
thukhaikim lampi ka zui hi,
21kei hong itte hauna ka pia hi,
a innte uh sum le vanh manpha te taw ka dimsak hi.
22“Topa in a masa phitbel in kei hong bitphua a,
khuangeipi lai in a nasep phitbel ka hi hi.
23A kipatciil hun mama in kei hong kivawt hi,
simlei a kipat ma in a masabel ka hi hi.
24Tuipite a pian ma,
ciktui te a om ma in
ka piang zo hi.
25Mualpite pian ma,
mualnote a om natu tek ah
a kikoi ma in ka piang zo hi,
26Pathian in leitung le a lote a vawt ma,
ahibuale leitang masabel sia
khutdim a vawt ma ngawngawnin ka piang zo hi.
27Van sia a om natu munah ama ii a koi hun lai,
tuipi kaantan in vanmong a phalh lai,
28van ah meeikaaite a koi lai,
tuipi tuinaakte a hon lai le,
29tuipi tuite ama ii ciza sangin
a saangzawin a khanto ngawl natu thu a piak lai,
leitung tawdapte a phaa lai in tua munah kei ka om zo hi.
30Keima in ama kungah
inn limsuaithiamte bangin ka om hi,
kei sia ni simin ama ii lungdamna naak ka hi hi,
tuaciang ama taw ka om sia nuam ka sa tawntung hi,
31simlei taw lungdam in
mihing namte dik a sa pa ka hi hi.
32“Tu in, khangmoite awng, hong ngai tavun.
Ka ci bangin vawt vun, na lung uh dam tu hi.
33No hong kihilte ngai vun.
Ciim vun a; ngaingon heak vun.
34Kei thu hong ngaipa in lungdam tu hi —
Ni simin ka kongbiang ah om a,
ka inn sung tumna pan hong ngak pa sia mihing lungdam ahi hi.
35Kei hong mu pa in nuntakna mu a,
tuaciang Topa in ama diksa tu hi.
36Kei hong mu ngawl pa in ama le ama kiliamsua hi;
a kuama po kei hong ensan sia in thina dei ahi hi.”
Currently Selected:
Paunakte 8: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
