Paunakte 25
25
Solomon Paunak Dangte
1Judah Kumpipa Hezekiah kumpi zum sung pan ettee in a ki at kik Solomon paunakte om thua lai hi.
2Pathian ii a seal thute hu in ama zatak ih pia hi; kumpipate sia tua thu a thiangin a sontel uh hu in zatak ih pia hi.
3Kumpipa khat ii ngaisut sia na he ngei bua uh hi; ama ngaisutnate in ei bat zawk ahi ngawl, van saang bang, tuipi thuk bang ahi hi.
4Ngunn sung panin a nin teng a laakkeak ciangin ngunn seakpa in na hoi mama khat piangsak thei hi. 5Kumpipa kung panin ngaisutna pia mihing siate heam le uhte a kumpi ukna sia thukhaikim thu om hi ci in thang tu hi.
6Kumpipa mai ah na din uh ciangin hong nasia ngaisut natu in hanciam heak vun a, mihing thupi bangin kiheang heak vun. 7A thupi zaw ngualdang khat atu na dinmun awn a hong kisawl sangin dinmun saangzawna ah kaato a hong kisawl tu sia phazaw hi.
8Na muna uh khat taw kisai in thukhenzum theng papaih heak vun. Tetti dang khat in nang muna sia maan ngawl hi ci in hong lak thei le bang law tu ni ziam?
9Na innpaamte taw ngaisut kisik ngawlna khat na nei uh le noma sungah kilemtua tavun a, thuku khat po pualaak se heak vun. 10Tua ahibuale mihing theampo in thuku keamcing thei ngawlte ci in hong he tu a, tua maizumna na pu zo ngei buatu uh hi.
11Ngaisutna khat pha tak a, pualaak theina in ngunn tung khamh taw zep bang ahi hi.
12Thuakna a nei ngeisa mihing khat ii kidop tu thupiakna a saang nuamte sia khamh khutzungbute ahibuale khamh pha belte taw a kivawt kizepnate sangin phazaw hi.
13A muanhuai kamtaipa sia anlaak hun nisat laitak tuivot bangin, a sawlpa atu lungpilna ahi hi.
14Piak tu kamciam napi a pia ngeingawlte sia nguatui paai ngawl meeikaai le vuite bang ahi hi.
15Thin sau takin zolna in a tha khobel kinanna sutham thei a, ngamukte thinsung ngawngawn zo thei hi.
16Na kisap za sangin a tamzaw khuaitui ne heak vun; a tam lei le hong luasak tha tu hi. 17Na innpaamte mun haw vazut leih heak vun; amate in hong cimtak tu a, hong ngaimaw thei tu hi.
18A maan ngawl kimawsakna sia, namsau, moltawng, ahibuale thaltang hiam bangin kiitakhuai hi.
19Phatmawk hun sungah a muanhuai ngawl khat muan thaakna sia ha ngawk sa taw an thai nop bang, ahibuale peangbai sa in lampai taw kibang hi.
20A thin kiamcip khat kungah lasakna sia khuasik laitak a puan suusakna, ahibuale a liamma sung ci noisakna taw kibang hi.
21Na ngalte a ngil a kial le an pia in; a dang a ko le amate ii dawn tu khat pia in.#Rom 12:20 22Maizumna taw ama na kaanghsak tu a, tuaciang Topa in thaman hong pia tu hi.
23Saksang vui in ngua hong puak bangma ngual ngensiatna in thin uukna hong puak takpi hi.
24A nge hat zi khat taw inn khat sungah teenkhop sangin innkhum tungah teang leang phazaw hi.
25A khak belin, a khualana mun pan thupha zaakna in na dangko laitak tuivot neak bang ahi hi.
26Mihing pha khat in mihing ngilo khat ii thu a zawp ciang ciktui nin ahibuale nguu a kitha tuikhuk khat hong phawksak hi.
27Khuaitui tam lei sia nang atu pha ngawl hi, tuasia bangma, pokna tam lei nga tu hanciam zongh pha ngawl hi.
28Na thin uukna na khaam zo buale luphung taw a ki uum ngawl, a kisim thei khuapi dongdai bangin na cimaw tu hi.
Currently Selected:
Paunakte 25: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
