Paunakte 11
11
1 Topa in khaikhin maan ngawl a zanghte ensan hi. Toaisuang maante hangin ama lungdam hi.
2Mihing kiphasak te hai ngawlin maimawl tu hi. Kiniamkhiakna sia ciimna hizaw hi.
3Mihing pha na hile thumaanna in lam hong lak hi. Mihing a muanhuai ngawlte sia amate thumaan ngawlna in susia hi.
4Na thi ni hong thet ciang haunate in bangma phattuamna hong pia zo ngawl tu hi, ahihang thumaanna in na nuntakna hong ngum thei hi.
5Thumaanna in mihing pha khat ii nuntakna olsak zaw hi, ahihang mihing seksol khat in ama puk natu ama mama in piangsak tu hi.
6Thutang hina in a thumaante suatak hi, ahihang a muanhuai ngawlte sia amate duhopna thaang sungah awk hi.
7Mihing seksol khat a thi ciangin ama lametna zongh ama taw thi khawm hi. Haunate sungah thinmuanna sia bangma ahi bua hi.
8A thutangte sia ngimna pan kidal hi; a seksolte tungah ngimna tung zaw hi.
9Pathian sel mihingte thu sonna in nang hong lalsak thei a, ahizong thutangte ciimna in nang hong hun thei hi.
10A thumaante in hamphatna a nei uh ciangin khuapi sungah lungdamna om a, a seksolte a thi uh ciang lungdamna aw nging hi.
11A thutangte ii thupha a piak uh ciangin khuapi khat sia khua thupi suak hi; ahihang khuapi khat sia a seksolte kammalte taw kilalsak hi.
12Ngual zawnsak kampauna in mawmawtna hi. Khuangaisun thei khat na hile na thim khipkhep tu hi.
13Thu nawnsan son khat sia thuku huvau ah kimuang thei ngawl hi, ahihang a muan taak khat sia na muang thei hi.
14Lampuina a nei ngawl minam khat sia puk tu hi. Ngaisutna a pia thei tam mama a om le ngammuanna om hi.
15Khualmi khat ii leiba losak tu in kamciam na pia le na kisiik tu hi. Kamkumh bua lete nangma atu in phazaw hi.
16A thuthiam numei khat kizakta a, ahizong ngamtat pha ngawl numei khat sia a maizum huai khat ahi hi.
A datham mihing khat in sum a nei ngei buatu a, ahihang a hanciam mama khat sia hau tu hi.
17Na dik le nangma le nangma kiphatvawt na hi hi. na ngilo le nangma le nangma kiliamsua na hi bek hi.
18Mihing seksolte in a tatakin bangma meetna a nga bua hi, ahihang a maan in na ngamta le thaman hong kipia takpi tu hi.
19A maan a, ngamta tu khensatna a nei sia nungta tu hi, ahihang akua po ahizong a maan ngawl ngamtatna a vawt hamtang sia thi tu hi.
20 Topa in mihing thinsiate ngaimaw hi, ahizong a maan a ngamtate it hi.
21Mihing ngilote daan kipia tu ci sia a pealmaw hi, ahihang thutang mite ahile suakta tu hi.
22Thu khensatna pha a nei ngawl numei khat ii mealphatna in vok naak ah khamh naakba taw kibang hi.
23Mihing phate ii deite sia phatna taw tawp tawntung hi; mihing seksolte ii a deite a nga uh ciang a kuama po thin uuk hi.
24Mihing pawlkhat sia a sum uh zangh vapeak a hau vaial hi. A dangte sia kidawm in zangh hi napi zawng vaial hi.
25Ngo vapeak vun, tua hile na nuamsa tu uh hi. Ngual hu vun, no zongh hong kihu tu hi.
26A man khan tu ngak a, antang a kholte sia mihingte in haamsiat hi, ahihang tuabang khol ngawlin a zuak paihte sia ngual in pok hi.
27Na mungtupnate a pha le nang hong kizakta tu hi, ahihang ngimna na zong le tuasia ma na nga tu hi.
28A hauna uh a suangte in tangngam lai a, thingteete bangin a pul tu uh hi, ahihang thutangte in khaal lai a, thingteete bangin a khang tu uh hi.
29Amate ii bangkuate sungah ngimna a piangsakte in a tawpna ah bangma a nei buatu uh hi.
Mi mawmawte sia miciimte ii naseam a suak tawntung tu uh hi.
30Thutang in nuntakna pia a, ahihang ngoltolna in nuntakna bosak hi.
31Mihing phate hi leitung ah thaman kipia ahiciang mihing seksolte le mimawte daan kipia tu hi ci sia na he hamtang tu hi. #1 Pe 4:18
Currently Selected:
Paunakte 11: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
