Thiampite 18
18
A Kikhaam Numei le Pa Omkhopnate
1 Topa in, 2Israel mite a sonsawn tu in Moses tungah, “Keima in Topa na Pathian ka hi hi, 3Na om ngeina uh Egypt mite omziate ahizong ahibuale tu in note kong paipuina Canaan ngamsung a teang mihingte ii omziate ahizong zui heak vun. 4Ka thukhamte zui in kong thupiakte seam vun. Keima in Topa noma Pathian ka hi hi. 5Sep tu kong sawl te seam vun a, kong piak thukhamte zui vun; tuabang na hina uh taw na nuntakna na hu tu uh hi. Keima in Topa ka hi hi,” ci hi. #Neh 9:29; Eze 18:9; 20:11-13; Lk 10:28; Rom 10:5; Gal 3:12
6 Topa in a nuai a zui tu ngeinate pia hi. Na mealheakte khat pawpo taw omkhop khialna vawt heak vun. 7Na nu taw numei le pa khialna vawtin na pa maizum pia heak in. Na nu maimawlsak heak in. 8Na pa zino dangte khat pawpo taw numei le pa khialna vawtin na pa maizum pia heak in. #Thiam 20:11; Thkna 22:30; 27:20 9Inn khat sungah khangkhawm na hi uh zong, na hi bua uh zong, na suapuinu ahibuale na suapuisealnu taw numei le pa khialna vawt heak in. #Thiam 20:17; Thkna 27:22 10Na tunu taw numei le pa khialna vawt heak in; na maizum natu hi tu hi. 11Na suapuisealnu taw numei le pa khialna vawt heak vun, ama zongh na suapuinu ma ahi hi. 12-13Na pa suapuinu ahibuale na nu suapuinu taw omkhop khialna vawt heak in. #Thiam 20:19-20 14Na pa suapuipa ii zi khialpui heak in; ama zongh na nu khat ma ahi hi. 15Na tapa zi khialpui heak in. #Thiam 20:12 16Na suapuipa zi khialpui heak in. #Thiam 20:21 17Na khialpui nu ii tanu ahibuale a tunu khialpui heak in; na mealheakte ma hi a, chi kinai omkhop khialna ahi hi. #Thiam 20:14; Thkna 27:23 18Na zi nuntak laiteng na zi tu in na nuphal nu la heak in.
19Numei khat nin a nei laitak omkhoppui heak in, banghang ziam cile ama biakna taw kisai in thiang ngawl hi. #Thiam 20:18 20Ngual zi khialpui heak in; na khialpui le biakna taw kisai in hong ninsak tu hi. #Thiam 20:10 21Molech pathian biakna ah zak tu in na tate khat zongh pia heak in, banghang ziam cile tua in Topa ahi Pathian ii min daisak tu hi. #Thiam 20:1-5 22Pa le pa omkhop khialna vawt heak in; Pathian in ngaimaw hi. #Thiam 20:13 23Pa ahizong numei ahizong kuama in nganhing taw omkhop khialna vawt heak hen; tuabang khialna in biakna taw kisai in no hong ninsak hi. #Pu 22:19; Thiam 20:15-16; Thkna 27:21
24Hi ngamtatnate taw a thiang ngawl kisua tawm heak vun, hi ngam na thet ma a, a teangsa doai biate in hi bangin amate kininsak ahikom noma tum thei natu in Topa in bengkeak hi. 25Amate ngamtatna in ngam le lei ninsak ahikom Topa in leitang daan pia in tualai ah a teang mite leitang in nialsak hi. 26-27Amate in hi bang a kiihuainate taw a leitang ninsak uh a, ahizong note tuabang na hi bua het tu uh hi. Note theampo, Israel te ahibuale no taw teang khawm ngamdangmite in Topa thukhamte le thupiakte zui hamtang tu nu hi, 28tua hile note mai ah a teang doai biate leitang ii a nial bangin, no hong nial ngawl tu hi. 29Hi bangza in a thasiathuai in a ngamta peuma sia Pathian mi khat in kingaisun nawn ngawl tu a hina thu na he uh hi.
30Tuaciang Topa in, “Kong thupiakte zui in hi ngam le lei ah note mai a teang masate ii ngamtat luheaknate na zui heak vun a, hi bang khat pawpo vawtna taw na kininsak heak vun. Keima in Topa note ii Pathian ka hi hi,” ci hi.
Currently Selected:
Thiampite 18: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
