Thiampite 17
17
Chisan ii Thianthona
1 Topa in Moses tungah Aaron le a tapate, 2le Israel mite theampo tungah a nuai a zui tu ngeinate a piak tu in thupia hi. 3-4Israel te khat in khui khat ahibuale tuu khat ahibuale keal khat Topa tungah biakpiakna khat bangin Topa ompuina Puanbuk kongbiang simngawl mundang ah a ngo le, Thukham paltan zo hi. Ama in chisan luangsak zo ahikom Pathian mi khat in kingaisun nawn ngawl tu hi. 5Hi thupiak ii a khiakna sia tu in Israel mite ii ngam sungah a ngaw bul ngannote Topa kungah paipui tu cinopna ahi hi. Amate in tu in tua ngannote Puanbuk kongbiang ah a om thiampipa kungah paipui tu a, pawlkhop biakpiakna in ngo tu hi. 6Thiampipa in Puanbuk kongbiang ah a om biaknatau pangh tengah a chi the tu a, a thau sia Topa ii a lungkim ngimnamtui a piangsak tu in hal tu hi. 7Israel mite in Topa tungah hong thumaan in, lo sung keal doaite biakna in sa ngo nawn ngawl tu hi. Israel mite in maisang hun theampo ah hi ngeina zui tu hi.
8Israel khat ahibuale a teen khoppui ngamdangmi khat pawpo in meihal biakpiakna ahizong a dang biakpiakna ahizong, 9Topa tungah biakpiakna a piak ciang Puanbuk kongbiang simngawl mundang ah a pia le, Pathian mi khat in kituat nawn ngawl tu hi.
10Israel te khat pawpo ahibuale a teen khoppui ngamdangmi khat pawpo in a sungah chi om lai sa a ne le, Topa in ama nungngat tu a, ama mi in sim nawn ngawl tu hi. #Pian 9:4; Thiam 7:26-27; 19:26; Thkna 12:16,23; 15:23 11A nungta theampo ii nuntakna sia chi sungah om hi, tua ahikom mihingte mawmai natu in chi theampo biaknatau tungah a kisun natu Topa thupiak ahi hi. Nuntakna a hi chisan in mawna teng lakeak hi. #Heb 9:22 12Tua ahi hu in, amate ahizong a teen khoppui ngamdangmite khat pawpo ahizong, a sungah chi om lai sa pawpo a neak ngawl natu in Topa in Israel mite tungah son zo hi.
13Israel te khat pawpo ahibuale a teen khoppui ngamdangmi khat pawpo in biakna taw kisai a thiang nganhing khat ahibuale vacim khat a man le ama in a chi lei ah sung nanak tu a lei huk tu hi. 14A nungta theampo ii nuntakna sia chi sungah om ahi hu in a sungah chi om lai sa pawpo a neak ngawl natu in, Israel mite tungah Topa in son zo a, a ne pawpo ama mi khat in kingaisun nawn ngawl tu hi.
15Israel te ahibuale ngamdangte khat pawpo in ama thu in a thi thawthong nganhing khat ahibuale ngamsa ii a mat khat ii sa a ne le, a puante sawp in kibual nanak tu a, biakna taw kisai in a thian mateng nitak dong ngak tu hi. 16Tuabang a vawt buale thupiangte a thuak kul tu hi.
Currently Selected:
Thiampite 17: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
