Job 22
22
Thumvei A Kipaupuina
22:1—27:23
Eliphaz
1-2Mihing khat pawpo, a ciimbel ngawngawn
Pathian ii zak thei a suak ngei om ziam?
3A maan na sep na vawtte in
Pathian phatuamsak ziam,
tua ahibuale a peuma in
na phatna in ama hu ziam? #Job 35:6-8
4Nangma in Pathian
na zatak hu in ama in
nang hong hil a,
hong sitna hi ngawl hi.
5Hi ngawl hi, tuasia na maw lei lam hang hi a;
na tatsiatna teng theampo hang ahi hi.
6Na suapui khat ii hong bat sum
na losakna in a puan teng na laaksak a, bangma na kheetsak bua hi.
7A toite tui na pia nuam bua a,
tuaciang a ngilkialte an na pia nuam bua hi.
8Leitang theampo na sungsuam natu in
na vaang neina le na za neina na zangh hi.
9Meingongte na hu nop ngawl bek dom ngawlin
tangate zongh na suttol a, na vawtsia hi.
10Tua ahikom tu in na kiim theampo ah na taak natu vuumte om a,
tuaciang thakhat thu in launa taw na kidim hi.
11Khua hong zing mama ahikom
khua na mu thei bua a,
tuaciang namthuam in
nang hong khuum hi.
12Pathian sia a saangbel vantungte ah teangin,
tuaciang aksite a omna saang napi ensuk hi ngawl ziam?
13Ahitazong nangma in, “Pathian in bang he ziam?
Ama meeikaai in seal hi —
bangbangin ama in ei tungah thu hong khen thei tu ziam?”
ci in na dongh lalai hi.
14Van khuvum tungah
ama a pai ciang
meeikaai saate in khua a mu ngawl tu in ama seal hi ci in, na ngaisun hi.
15Mi ngilote tot tawntung na lampi ma tawn tu in na khensat ziam?
16A hun uh a tun ma ngawngawnin namthuam in amate taaikeak hi.
17Hi mite sia Pathian a nialte le
Pathian in amate bangma law zo ngawl tu in a um mite ahi hi.
18Ahihang amate nuamsa in
a khangtosak sia Pathian hi a —
mi ngilote thinsung ka tel thei bua hi.
19Mi ngilote daan a kipiak
a mu uh ciang miphate lungdamin
maw baanna nei ngawl mite nui uh hi.
20Mi ngilote neisa theampo kisusia siat a,
tuaciang a taanglai sun peuma
kaanghmei in kaanghtum hi.
21Job awng, tu in Pathian taw kilemna vawt in a,
ngalte khat bang a ama na vawtna teng tawlnga in,
tuabang hi lete ama in nangma thupha hong pia tu hi.
22Ama ii hong thuhilnate saang in a,
a kammalte na thinsung ah ciamtee in.
23Hi hi, Pathian kungah kiniamkhiakna taw heak kik hamtangin,
na bangkua sungah a sia ngamtatna theampo na bosak ta in.
24Na khamhte vawk in;
na khamh pha belte luamko sungah sung in.
25Vaanglianbelpa Pathian sia na khamh hisak in,
nang atu a saangin a kiciang ngunn hisak in.
26Tuasia ciang Pathian na muang tawntung tu a,
ama, na lungdamna ii naak ahi hunlam na mu tu hi.
27Thu na nget ciang ama in hong zo tu a,
tuaciang na kiciamnate na len tu hi.
28Na sep na vawt theampo na taangtun tu a,
na paina lampi ah khuavak taang tu hi.
29Pathian in a kiphasakte
khia suk a,
a kiniamkhiakte hun hi.
30Na sepna maanin,
maw baanna na nei buale
ama in nang hong suatak tu hi.
Currently Selected:
Job 22: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
