Habakkuk 3
3
Habakkuk Thungetna
1Hisia in kamsaangpa Habakkuk thungetna ahi hi.
2 Topa awng,
na sep na vawtte ka za zo a,
zakta in lamdang ka sa mama hi.
Tu in ko hun sung zongh ah
nasep lianpi na sep ngeite
hong seam kik ta'n.
Na thin uuk ciang zong
hesuakna hong nei ta'n.
3Edom panin Pathian
hong pai kik tu hi;
Paran mualte pan a thiangtho
Pathian hong pai tu hi.
A hoina in vantungte siin a;
leitung in ama pokna taw kidim hi.
4Ama khualeng taanna taw
hong pai tu a;
a khut pan khuavak tee keak a,
tualai ah a vaangletna kiseal hi.
5Ama in natnate a mai ah puak a,
thina ii a zui tu in thupia hi.
6Ama a tawlngak ciang,
leitung kithing a;
Ama ii a et ciang
minamte liinglawng hi.
A tawntungin a om
mualte kektham a;
taanghlai hunin,
a va ngeina mualte,
a kip tawntung mualte kiasuk hi.
7Cushan mite launa ka mu a,
Median mite liinglawng uh hi.
8 Topa awng, ngunte in
hong thin uuksak ziam?
Nang hong thinsosak sia
tuipi ahi ziam?
Meeite tungah na to hi;
na mite zawna na puak ciang
vuipi suangval meeikaai sia na leang ahi hi.
9Na thal zangh tu in
na kinging zo hi,
thaltangte kap tu in
na kithoai hi.
Na khualeng in simlei
khentham hi.
10Mualte in nang hong mu ciangin
liing uh a,
van panin tui hong buasuk hi.
Leinuai a tuite hawk vabuat a,
a tuihualte khangin saangto hi.
11A manlang na thaltangte
a teet vazal ciang le
na teitee te a taan ciang
ni le tha te a omna ah tawlnga hi.
12Thin uuk sa in leitung
na kaantan a;
thinsona taw minamte
na tuanhcil hi.
13Na mite le na teal kumpipa
hun tu in na kuan hi.
Mi ngilote lampui pa
na vaatvawk a,
a nungzuite na lalcipsak hi.
14A zawngkhalte
a zawthawk uh ciang
a oaiaam mite bangin
kote hong thethaang tu in
a ngalkapte vuipi bangin
hong pai ciang
na thaltangte in
a ngalkaphonpi ukpa kaaplet hi.
15Na siphute taw
tuipi na tuanhcil a,
tuaciang a thahat tuite phuan hi.
16Hite theampo ka za a,
lau in ka liing hi;
ka muk zongh liing hi.
Ka pumpi zaw vaneal hi,
ka nuai ah ka peang sui tha in ka liik hi.
Keima in ko hong simte
Pathian ii daan piak hun
hong tun tu thim dide in
ka ngak tu hi.
17Theikungte nga ngawl a,
sapitkungte a nga bua zong,
olive kungte nga ngawl a,
lote sungah an a piang bua zong,
tuute thi siat a,
khuibukte a hawm zong,
18ka lungdamin ka thinnuam
veve lai tu hi.
Banghang ziam cile
Topa Pathian in ka ngumpa ahi hi.
19Vaanglianpipa Topa in
thahatna hong pia hi.
Ama in sangai bangin
ka peang hong khosak a,
mualte tungah hong keamcing hi.
Currently Selected:
Habakkuk 3: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016