Habakkuk 2
2
Topa ii Habakkuk A Zo kikna
1Ka ngalvilna tausaang tungah ka kaa tu a, ka lungkim ngawl nate taw kisai Topa ii hong zo kikna le ka pau natu in hong son tu thute ngakin ka en tu hi.
2 Topa in hi bangin hong zo hi: “Et po ciang a kisim thei tu in kong pualaak thu sia suangpheak tungah thiang takin at in. 3Lai taw at in, banghang ziam cile tuasia a taangtut tu hun theng ngawl lai hi. Ahihang hun sia a manlangin hong theng tu a, kong lak sia taangtung tu hi. Hong pian tu haisaang thei tha tu hi, ahizong tuasia ngak in; hong piang tatak tu a, hong haisaang ngawl tu hi. #Heb 10:37 4Hi sia in a thupuak ahi hi: ‘A tatsia mite nungta ngawl tu a, ahizong thutang mite in Pathian tungah thumaan ahikom nungta tu uh hi,’ ” hong ci hi.
Thutang ngawlte Lalna
5Hauna in hong theam thei hi. A duhop a huaiham mihingte kiphasakin thim om thei ngawl hi — thina mama taw kibangin amate lungkim hun nei ngawl hi. Tua hu in amate in ngam khat zawkciang ngam khat amate atu in suanthal hi. 6Ngallelte in ngalzote thato tu a, huasaakna lak tu hi. Amate in, “Noma neisa ahi ngawlte laaksak nu hi, ahihang a lal na hi uh hi! Note tungah leei hong bate zawthawk thu in na siikna taw bang tanvei na hau tan lai tu uh ziam?” ci tu uh hi.
7Ahizong tuasia na heak ma in, noma ngual zothalte mama in leiba na nei tu uh a, a meet taw na piak tu in zawthawk thu taw leiba hong kinot tu hi. Ngalte hong pai in hong liingsak tu hi. Na vanhte hong suttol tu uh hi! 8Ngam tam mama ah mihingte na suttol uh hi, ahizong tu in a nungta laite in no hong suttol tu hi, banghang ziam cile noma in mihing na that uh a, leitung mite tung le a khuapite tungah na ngongtatna hang ahi hi.
9Na lal zo hi! Ngongtatna taw na laak te taw na innkuan na hausak a, siatna le launa pan na inn ngam muang tu in na hanciam hi! 10Ahihang na tup na sawmnate in na bangkua maizumsak hi; minam tam ma na suksiatna taw nangma tungah lalna bek na piangsak hi. 11Luphung suangte ngawngawn in hong langpanin au a, zawlsaute zongh in tua aw thangko ma hong hawl kik hi.
12Na lal zo hi! Khuapi khat sia kithalupna le khialna lian doppha in na saat hi. 13Na zawthal minamte in a tha a ngal uh a thawthong in bosak a, amate saksate theampo kaanghtum siat hi. Hi sia Topa Vaanglianbelpa ii vawt hi. #Is 14:19 14Ahihang tuipi sia tui taw a kidim bangin leitung in Topa vaangletna heakna taw kidim tu hi.
15Na lal zo hi! Na thinso hu in na innpaamte zawngsak in maizum pia ni hi; zukham bang keakin amate na hoisak hi. 16Nangma zongh min phatna sangin maizumna taw na kituam zaw tu hi. Nangma zongh zu ne in na hoi vatut tu hi. Topa in daan piakna hai hong dawnsak tu a, na minphatna sia min siatna hong suak tu hi. 17Lebanon taamthing na phuktham zo a; tu in nang hong kiphuk vawk tu hi. A ngamsate na that a, tu in tua ngamsate in hong lausak tu hi. Leitung le a khuapite tungah na ngongtatnate hang le tual na tha uh hang in tuabang in piang tu hi.
18Milim ii kimanna bang ziam? Mihing ii vawt sa na khat hi bek a, leilot thu ngawl po bangma hong son ngawl hi. Tua a pau thei ngawl pathian — tua sia a vawtpa ii a muan sia bang phattuam pui tu ziam! 19Nang a lal na hi zo hi! Thingbek khat tungah “Khanglo in!” tua ahibuale suangtum khat tungah “Tho in!” ci ni hi. Milim in na khat pawpo hong lak thei ziam? Khamh le ngunn taw kituam tha tu hi, ahizong a sungah nuntakna om ngawl hi.
20 Topa in a Biakinnpi thiangtho sungah om hi; ama mai ah leitung mihing theampo in thim dide in om tahen.
Currently Selected:
Habakkuk 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016